ރާއްޖޭގައި ގޭންގް ކުށްތައް ހުއްޓުވުމަށް ފުލުހުން ހިންގި ވަރުގަދަ އޮޕަރޭޝަންތަކުގެ ތެރެއިން 10 ގޭންގް ލީޑަރެއްގެ މައްސަލަ ބަލައި ތަހުގީގުކުރަމުންދާ ކަމަށް ހޯމްލޭންޑް ސެކިއުރިޓީ މިނިސްޓަރު އަލީ އިހުސާން ވިދާޅުވެއްޖެއެވެ.

ސަލްޓަން ޕާކުގައި ބޭއްވި "އަހާ" ފޯރަމްގެ ހަތްވަނަ ސެޝަންގައި ވާހަކަދައްކަވަމުން މިނިސްޓަރު ވިދާޅުވީ، ގޭންގުތަކާ ދެކޮޅަށް މިހާތަނަށް 52 އޮޕަރޭޝަނެއް ހިންގާފައިވާ ކަމަށެވެ.

މިނިސްޓަރު އިހުސާން ފާހަގަކުރެއްވި ގޮތުގައި 2007 ވަނަ އަހަރާއި 2023 ވަނަ އަހަރާ ދެމެދު ކޮންމެ އަހަރަކުވެސް ގޭންގް މާރާމާރީތަކުގައި 2 އާއި 5 އާ ދެމެދުގެ އަދަދަކަށް މީހުން މަރާފައިވެއެވެ.

ނަމަވެސް، މި ސަރުކާރު އައިފަހުން މިފަދަ މާރާމާރީއެއްގައި އެއްވެސް ދިވެހިއެއްގެ ފުރާނަ ގެއްލިފައި ނުވާކަމަށާއި، ގޭންގް މާރާމާރީތަކުގެ ހަބަރުތައް ކުރިއާ އަޅާބަލާއިރު ވަރަށް ބޮޑަށް މަދުވެފައިވާކަން އޭނާ ފާހަގަކުރެއްވިއެވެ.

މި ނުރައްކާތެރި ހާލަތަށް ދާއިމީ ހައްލެއް ހޯދުމުގެ ގޮތުން ގޭންގުތަކުގެ ނުފޫޒު ބޮޑު ސަރަހައްދުތަކުގައި ފުލުހުންގެ ހާޒިރީ އިތުރުކުރަމުންދާ ކަމަށް އިހުސާން ވިދާޅުވިއެވެ.

އަދި ކުށުގެ ވެށީގައި އުޅޭ ޒުވާނުންނަށް ކުށުން ދުރުހެލިވެ، ވަޒީފާއާއި ވިޔަފާރީގެ ފުރުސަތުތައް ހިޔާރުކުރުމުގެ މަގު ދައްކާފައިވާ ކަމަށާއި، ގިނަ ފަރާތްތަކުން އެ މަގު ހިޔާރުކޮށްފައިވާ ކަމަށްވެސް ވިދާޅުވިއެވެ. މީގެއިތުރުން، ކުޑަކުދިން ގޭންގުތަކަށް ރެކްރޫޓްކުރަން ބޭނުންކުރި 26 "ސޭފް ހައުސް" އެއް ރެއިޑްކޮށް، އެތަންތަން ނުބޭނުންކުރެވޭނެ ގޮތް ހަދާފައިވާކަން މިނިސްޓަރު ހާމަކުރެއްވިއެވެ.

ފުލުހުން ހިންގި 52 އޮޕަރޭޝަންގެ ތެރެއިން 10،450 މީހުން ބަލައިފާސްކޮށް، 517 މީހަކު ހައްޔަރުކޮށްފައިވާއިރު، އެމީހުންނާ ގުޅުންހުރި 670 ސައިކަލު ވަނީ ޓޯކޮށްފައެވެ.

މިދިޔަ ޖޫން މަހުން ފެށިގެން 10 ގޭންގް ލީޑަރެއްގެ މައްސަލަ ތަހުގީގުކުރަމުންދާކަން ފާހަގަކުރައްވައި މިނިސްޓަރު ވިދާޅުވީ، އާ ގާނޫނުގެ ދަށުން އެމީހުންނާމެދު ފިޔަވަޅު އެޅިގެންދިއުމުން ރާއްޖޭގައި އޯގަނައިޒްޑް ކްރައިމް އަދި ގޭންގުތަކުގެ މައްސަލައަށް ދާއިމީ ނިމުމެއް އަންނާނެ ކަމަށެވެ.