ދިވެހިރާއްޖޭގެ ކުޅިވަރު ދާއިރާއަށް ބޮޑު އިންގިލާބީ ބަދަލެއް ގެނައުމުގެ ގޮތުން، މުޅި ރާއްޖޭގައި ޖުމްލަ 27 އިންޑޯ ކޮމްޕްލެކްސް ތަރައްޤީ ކުރުމުގެ މަސައްކަތް ސަރުކާރުން ފަށާފައިވާ ކަމަށް ޒުވާނުން ބާރުވެރިކުރުވުމާއި، ކުޅިވަރާއި ހަށިހެޔޮކަމާ ބެހޭ ވަޒީރު އަބްދުﷲ ރާފިއު ވިދާޅުވެއްޖެއެވެ.

ވަޒީރު މިހެން ވިދާޅުވީ ސަރުކާރުން ބޭއްވި "އަހާ" ފޯރަމްގައި މައުލޫމާތު ދެއްވަމުންނެވެ.

މި މަޝްރޫޢުގެ ދަށުން މާލެ ސަރަޙައްދުގެ ކުޅިވަރު ވަސީލަތްތައް އިތުރުކުރުމަށް ޚާއްޞަ އިސްކަމެއް ދެވޭނެއެވެ. އެގޮތުން، ހުޅުމާލެ ފޭސް 2 ގައި އަޅާ އިންޑޯ ކޯޓުގެ މަސައްކަތް ދާދި އަވަހަށް ފެށިގެންދާނެ ކަމަށާއި، އޭގެ އިތުރުން ހުޅުމާލެ ފޭސް 1 އަދި ވިލިމާލޭގައިވެސް އިންޑޯ ފެސިލިޓީތައް ޤާއިމުކުރުމަށް ނިންމާފައިވާ ކަމަށް ވަޒީރު ހާމަކުރެއްވިއެވެ.

މާލެ ސަރަޙައްދުގައި ވޭތުވެދިޔަ 33 އަހަރު ދުވަހުގެ ތެރޭގައި ހުރީ މާލޭ ޒުވާނުންގެ މަރުކަޒުގެ އެންމެ އިންޑޯ ކޯޓެއްކަން ފާހަގަކުރައްވަމުން، ވަޒީރު ވިދާޅުވީ މި އާ ފެސިލިޓީތަކާއެކު އެކަމަށް ބޮޑު ހައްލެއް ލިބިގެންދާނެ ކަމަށެވެ.

ކުޅިވަރުތައް ލާމަރުކަޒީ ކޮށްގެން މުޅި ރާއްޖެއަށް ފުޅާކުރުމަކީ ސަރުކާރުގެ މައިގަނޑު އަމާޒެވެ.

ވަޒީރު ފާހަގަކުރެއްވި ގޮތުގައި މި އިންޑޯ ކޮމްޕްލެކްސްތައް ބިނާކުރުމުގެ މައިގަނޑު މަޤްޞަދަކީ އެތުލީޓުންނަށް ތަފާތު ސްޓޭޑިއަމްތަކުގައި ވާދަކޮށް، ވާދަވެރި ތަޖުރިބާ މުޅި ރާއްޖެއިން ހޯދައިދިނުމާއި، އިންޑޯ ކުޅިވަރުތަކުގެ މުބާރާތްތައް ތަރުތީބުކޮށް ފަސޭހަކާމާއެކު ކުރިއަށް ގެންދިއުމުގެ ފުރުޞަތު ފަހިކޮށްދިނުމެވެ.

މީގެ އިތުރުން، ކުޅިވަރާ ބެހޭ ޤާނޫނަށް ސަރުކާރުން ގެނެސްފައިވާ އިޞްލާޙުތަކާއެކު، ކުޅިވަރު އެސޯސިއޭޝަންތަކުގެ އަސާސީ ޤަވާއިދުތަކަށް ބަދަލުު ގެނެސް، ރާއްޖޭގެ ތަފާތު ސަރަޙައްދުތަކުގައި އެސޯސިއޭޝަންތަކުގެ އޮފީސްތައް ހުޅުވައި، ޚިދުމަތްތައް ފުޅާކުރުމުގެ މަސައްކަތްވެސް މިހާރު ދަނީ ކުރެވެމުންނެވެ.