މަސްތުވާތަކެތި ބޭނުންކުރާ މީހުންނަށް ފަރުވާ ދިނުމުގައި އޮތް އެންމެ ބޮޑު އެއް ހުރަހަކީ ޖާގައިގެ ދަތިކަން ކަމަށާއި، ކ. ހިންމަފުށީގައި އަލަށް އިމާރާތްކުރާ ރިހެބިލިޓޭޝަން ސެންޓަރާއެކު އެ މައްސަލައަށް ދާއިމީ ހައްލެއް ލިބިގެންދާނެ ކަމަށް ހޯމް މިނިސްޓްރީގެ ސްޓޭޓް މިނިސްޓަރު އަދި ނޭޝަނަލް ޑްރަގް އޭޖެންސީ (އެންޑީއޭ) ގެ ޗެއާޕާސަން އަހުމަދު ސިއްދީގު ވިދާޅުވެއްޖެއެވެ.

ހިންމަފުށީގައި ތަރައްގީކުރާ ޑްރަގް ޓްރީޓްމެންޓް އެންޑް ރިހެބިލިޓޭޝަން ސެންޓަރުގެ އާ އިމާރާތުގެ ބިންގާ އެޅުމުގެ ރަސްމިއްޔާތުގައި ވާހަކަދައްކަވަމުން ސިއްދީގު ވިދާޅުވީ، މަސްތުވާތަކެތީގެ ވަބާގައި ޖެހިފައިވާ ފަރާތްތަކަށް އެކަށީގެންވާ ރަނގަޅު ފަރުވާ ފޯރުކޮށްދިނުމަށްޓަކައި ސަރުކާރުން ގިނަ މަސައްކަތްތަކެއް ކުރަމުންދާ ކަމަށެވެ.

އަދި އާ އިމާރާތުގެ މަސައްކަތް ނިމުމުން ފަރުވާ ބޭނުންވާ ފަރާތްތަކަށް އެންމެ ފުރިހަމަ ހިދުމަތް ލިބި، މުޖުތަމައަށް ބޭނުންތެރި، ހެޔޮލަފާ ބަޔަކަށް ވެގެން ނުކުތުމުގެ ފުރުސަތު ފަހިވެގެންދާނެ ކަމަށް އޭނާ ފާހަގަކުރެއްވިއެވެ.

ހިންމަފުށީގައި މިހާރު ހުރި ރިހެބިލިޓޭޝަން ސެންޓަރުގެ ހުސް ބިމުގައި އަޅާ މިއާ އިމާރާތަކީ 5 މިލިއަން ޑޮލަރު ހަރަދުކޮށްގެން، އެއްފަހަރާ 500 މީހުންނަށް ފަރުވާ ދެވޭގޮތަށް ތަރައްގީކުރާ ތަނެކެވެ.

ހޯމް މިނިސްޓްރީން މަޢުލޫމާތު ދޭ ގޮތުގައި މި މަޝްރޫއަށް ހަރަދު ކުރަނީ އެންކޯ ހޯލްޑިންގްސް ޕްރައިވެޓް ލިމިޓެޑުންނެވެ.

މި އާ ފެސިލިޓީގައި ރިހެބިލިޓޭޝަން ހިދުމަތުގެ އިތުރުން ސްކިލް ޑިވެލޮޕްމެންޓް، ކައުންސިލިންގ، އަދި ހިންމަފުށީގެ ރައްޔިތުންނަށްވެސް ހިދުމަތް ހޯދޭނެ ފަދަ ހެލްތް ފެސިލިޓީއެއް ގާއިމުކުރެވިގެންދާނެއެވެ.

ހިންމަފުށީގައި މިހާރު ހުރި ސެންޓަރަކީ 174 މީހުންގެ ޖާގައިގެ ތަނެއް ނަމަވެސް، އިމާރާތް ބާވެ ހަލާކުވުމުގެ ސަބަބުން މިހާރު އެތަނުގައި ފަރުވާ ދެވެނީ އެންމެ 80 ވަރަކަށް މީހުންނަށެވެ.