ހުޅުމާލެ ފޭސް 1 ގައި އޮތް ސިންތެޓިކް ޓްރެކް ބައިނަލްއަޤްވާމީ ފެންވަރަށް އަލުން ތަރައްޤީކުރުމުގެ އަމަލީ މަސައްކަތް އަންނަ މަހުގެ 1 ވަނަ ދުވަހު ފެށުމަށް ނިންމައިފިއެވެ.

ކުޅިވަރާ ބެހޭ ވަޒީރު ޢަބްދުﷲ ރާފިއު ވިދާޅުވި ގޮތުގައި، މުޅި ސިންތެޓިކް މެޓީރިއަލްއާއި ބޭސް އެއްކޮށް ނަގައިގެން ކުރިއަށްގެންދާ މި މަސައްކަތް އަންނަ ޖަނަވަރީ މަހުގެ ނިޔަލަށް އެއްކޮށް ނިންމާލެވޭނެއެވެ.

ރައީސް ޢަބްދުﷲ ޔާމީން އަބްދުލް ގައްޔޫމްގެ ވެރިކަމުގައި ހުޅުމާލޭގައި އެޅި މި ސިންތެޓިކް ޓްރެކް މިހާރު ވަރަށް ބޮޑަށް ހަލާކުވެފައިވުމުގެ ސަބަބުން، ތަމްރީނުތަކުގައި އެތުލީޓުންނަށް ތަފާތު އަނިޔާތަކާ ކުރިމަތިލާންޖެހޭކަން ވަނީ ފާހަގަކުރެވިފައެވެ.

މީގެއިތުރުން، މިހާރު އޮތް ޓްރެކަކީ ވޯލްޑް އެތުލެޓިކްސްއިން ގަބޫލުކުރާ ބައިނަލްއަޤްވާމީ މިންގަނޑުތަކަށް ފެތޭ ތަނަކަށް ނުވާތީ، އެ ޓްރެކްގައި ދިވެހި އެތުލީޓުން ގާއިމުކުރާ ރެކޯޑްތައް ދުނިޔޭގެ އެތުލެޓިކްސް އިދާރާއިން ރަސްމީކޮށް ބަލައިނުގަންނަކަން ވަޒީރު ފާހަގަކުރެއްވިއެވެ.

މި މައްސަލައަށް ހައްލެއް ހޯދައިދިނުމުގެ ގޮތުން، އަލަށް ގާއިމުކުރެވޭ ޓްރެކް ވެގެންދާނީ ވޯލްޑް އެތުލެޓިކްސްގެ ފުރިހަމަ އެޕްރޫވަލް ލިބޭނެ މިންގަނޑުތަކަށް ފެތޭ ތަނަކަށެވެ.

މީގެ ސަބަބުން ދިވެހި އެތުލީޓުން ނެރޭ ނަތީޖާތަކާއި ހަދާ ރެކޯޑްތައް ބައިނަލްއަޤްވާމީ ފެންވަރުގައި ގަބޫލުކުރެވިގެންދާނެއެވެ. ހުޅުމާލޭ ޓްރެކްގެ އިތުރުން، މާލޭގެ ސިންތެޓިކް ޓްރެކްވެސް ބައިނަލްއަޤްވާމީ ސްޓޭންޑަޑަށް ބަދަލުކުރުމުގެ މަސައްކަތްތައް ސަރުކާރުން ދަނީ ކުރަމުންނެވެ.