ސަރުކާރުން ދިން ފުރުސަތުގެ ބޭނުން ހިފައި، ގޭންގުތަކުގައި އުޅުނު ގިނަ އަދަދެއްގެ ޒުވާނުން މިހާރު ކުށުގެ ވެށިން ދުރުވެ، ވިޔަފާރިކުރުމާއި ވަޒީފާތަކުގައި ހަރަކާތްތެރިވަމުންދާ ކަމަށް ހޯމްލޭންޑް ސެކިއުރިޓީ އެންޑް ޓެކްނޯލޮޖީ މިނިސްޓަރު އަލީ އިހުސާން ވިދާޅުވެއްޖެއެވެ.

ސަލްޓަން ޕާކުގައި ބޭއްވި "އަހާ" ފޯރަމްގައި ވާހަކަދައްކަވަމުން މިނިސްޓަރު އިހުސާން ވިދާޅުވީ، 2007 ވަނަ އަހަރުން ފެށިގެން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވެރިކަމާ ހަވާލުވެވަޑައިގަތުމާ ހަމައަށް ކޮންމެ އަހަރަކުވެސް ގޭންގު މާރާމާރީތަކުގައި ދެ މީހުންނާއި ފަސް މީހުންނާ ދެމެދުގެ އަދަދަކަށް މީހުން މަރުވަމުން ދިޔަ ކަމަށެވެ.

ނަމަވެސް، އެއީ އެއްވެސް ހާލެއްގައި ގަބޫލުކުރެވޭނެ ކަމެއް ނޫން ކަމަށް އޭނާ ފާހަގަކުރެއްވިއެވެ.

މި މައްސަލައަށް ދާއިމީ ހައްލެއް ހޯދުމުގެ ގޮތުން ގޭންގުތައް ހަރަކާތްތެރިވާ ސަރަހައްދުތަކުގައި ފުލުހުންގެ ބެލެހެއްޓުން އިތުރުކޮށް، ކުރިން އުޅުނު ފަދަ މިނިވަންކަމެއްގައި ކުށްކުރުމުގެ ފުރުސަތު މިހާރު ބަންދުކުރެވިފައިވާ ކަމަށް މިނިސްޓަރު ވިދާޅުވިއެވެ.

މީގެ އިތުރުން، ކުށުގެ ވެށިން ދުރުވެ، ގައުމަށް ފައިދާހުރި ގޮތުގައި ވިޔަފާރިތަކާއި ވަޒީފާތަކަށް ނުކުތުމުގެ އިޚްތިޔާރު ސަރުކާރުން ޒުވާނުންނަށް ދީފައިވާ ކަމަށްވެސް އިހުސާން ފާހަގަކުރެއްވިއެވެ.

މިނިސްޓަރު އިތުރަށް ވިދާޅުވީ، ސަރުކާރުން ހުޅުވާލި މި އިސްލާހީ ފުރުސަތުގެ ބޭނުން ހިފައި، ގޭންގުތަކުގައި އުޅުނު ވަރަށް ގިނަ ޒުވާނުން މިހާރު ރަނގަޅު މަގު އިޚްތިޔާރުކޮށްފައިވާކަމީ އުފަލާއެކު ފާހަގަކުރައްވާ ކަމެއް ކަމަށެވެ.