ސައުތު މުމްބާއީގެ އެންމެ ފެންވަރު ރަނގަޅު އަދި އަގުބޮޑު އެއް ސަރަހައްދު ކަމަށްވާ މަލަބާ ހިލް ރޯޑްގެ 30 ލިޓްލް ގިބްސް އިން މަޝްހޫރު ބޮލީވުޑް އެކްޓަރު އަކްޝޭ ކަންނާ ލަގްޒަރީ އެޕާޓްމަންޓެއް ގަނެފިއެވެ.

އިންސްޕެކްޓަރ ޖެނެރަލް އޮފް ރެޖިސްޓްރޭޝަން (އައި.ޖީ.އާރު) ގެ ރަސްމީ ލިޔެކިޔުންތަކާ ހަވާލާދީ "ސްކޮޔަރ ޔާޑްސް" އިން ރިޕޯޓްކޮށްފައިވާ ގޮތުގައި، މި އެޕާޓްމަންޓް އޭނާ ގަނެފައިވަނީ 33.26 ކްރޯޑް އިންޑިއަން ރުޕީސް އަށެވެ.

މި މުއާމަލާތް ރަޖިސްޓްރީކޮށްފައިވަނީ ސެޕްޓެމްބަރު މަހުގެ ތެރޭގައެވެ.

ޖުމްލަ 2,516.84 އަކަފޫޓުގެ މި ތަނަވަސް އެޕާޓްމަންޓުގައި 2,341.39 އަކަފޫޓުގެ ކާޕެޓް އޭރިއާއެއްގެ އިތުރުން 175.45 އަކަފޫޓުގެ ބެލްކަންޏެއް ހިމެނެއެވެ. އަދި މީގެ އިތުރުން ވެހިކަލް ޕާކުކުރުމަށް ތިން ސްލޮޓް ވެސް މި އެޕާޓްމަންޓާ އެކު ވަނީ ލިބިފައެވެ. މި މުއާމަލާތުގެ ރަޖިސްޓްރޭޝަން ފީއަށް އެކަނިވެސް 30,000 ރުޕީސް ހޭދަވެފައިވާއިރު، ސްޓޭމްޕް ޑިއުޓީގެ ގޮތުގައި 1.99 ކްރޯޑް ރުޕީސް ދައްކާފައިވެއެވެ.

މަލަބާ ހިލްސް އަކީ މުމްބާއީގެ އެންމެ މުއްސަނދި ފަރާތްތައް ދިރިއުޅޭ، އަދި ކަނޑުގެ ހިތްގައިމު މަންޒަރުތައް އެންމެ ފުރިހަމައަށް ފެންނަ އެއް ސަރަހައްދެވެ. މީގެއިތުރުން މިއީ މެރިން ޑްރައިވާއި ކޮލާބާ ފަދަ ވިޔަފާރީގެ މުހިންމު ސަރަހައްދުތަކާ ވެސް ވަރަށް ގާތުގައި އޮންނަ އަގެއްގެ ގޮތުން ފާހަގަކޮށްލެވޭ ހިސާބެކެވެ.

ކުރީގެ މަޝްހޫރު އެކްޓަރު ވިނޯދު ކަންނާގެ ދަރިފުޅު އަކްޝޭ ކަންނާ އަކީ އޭނާގެ މޮޅު އެކްޓިންގ ހުނަރުގެ ސަބަބުން ބެލުންތެރިންގެ މެދުގައި ބޮޑު މަގުބޫލުކަމެއް ހޯދާފައިވާ ފަންނާނެކެވެ. "ދިލް ޗާހްތާ ހޭ"، "ހަލްޗަލް"، "ރޭސް" އަދި "ދްރިޝްޔަމް" ފަދަ ކާމިޔާބު އެތައް ފިލްމުތަކަކުން ފެނިގެންދިޔަ އަކްޝޭގެ އެންމެ ފަހުގެ މަސައްކަތްތަކުގެ ތެރޭގައި "ޗާވާ" އަދި "ދުރަންދަރު" ހިމެނެއެވެ. އޭނާ ދެން އެންމެ އަވަހަށް ފެނިގެންދާނެ ކަމަށް ބެލެވެނީ "މަހާކާލީ" ނަމަކަށް ކިޔާ ފިލްމަކުންނެވެ.