ގަވާއިދާ ހިލާފަށް ހުޅުމާލޭ ޖަލަށް ވަން މީހެއްގެ މައްޗަށް ކުށް ސާބިތުވެ، 26,600 ރުފިޔާއިން ޖޫރިމަނާ ކުރުމަށް ކްރިމިނަލް ކޯޓުން ހުކުމް ކޮށްފިއެވެ.

މި މައްސަލައިގައި ޖޫރިމަނާކޮށްފައިވަނީ ހުޅުމާލެ ފްލެޓް ނަންބަރު 40-1-123، އާޒިމް މުހައްމަދުގެ މައްޗަށެވެ.

ދައުލަތުން އާޒިމްގެ މައްޗަށް އުފުލާފައިވަނީ އެނގިހުރެ ހުއްދަނޫން ތަނަކަށް ވަނުމުގެ ދައުވާއެވެ. އޭނާގެ މައްޗަށް މި ދައުވާ ކުރީ މިދިޔަ ޖޫން މަހުގެ 20 ވަނަ ދުވަހުގެ ރޭ، ހުޅުމާލޭ އޮނުގަސް މަގުގައި ހުންނަ މޯލްޑިވްސް ކަރެކްޝަނަލް ސާވިސްގެ ޖަލަށް ހުއްދަނެތި ވަދެފައިވާތީއެވެ.

ޝަރީއަތުގެ މަޖިލީހުގައި އާޒިމް ވަނީ ދައުލަތުން ކުރި ދައުވާއަށް އިއުތިރާފުވެފައެވެ.

މި މައްސަލައިގެ ތަހުގީގަށް އޭނާ ބަންދުގައި 11 ދުވަސް ހޭދަކޮށްފައިވުމާއި، ކުށަށް އިއުތިރާފުވެފައިވާތީ، ކްރިމިނަލް ކޯޓުން އެންމެ ފުރަތަމަ ކަނޑައެޅީ ހަތަރު މަހާއި 13 ދުވަހުގެ ޖަލު ހުކުމެކެވެ.

ނަމަވެސް، ޖަލު އަދަބުގެ ބަދަލުގައި 26,600 ރުފިޔާއިން ޖޫރިމަނާ ކުރުމަށް ނިންމައި، ކުރިއަށް އޮތް ހަ މަސްދުވަހުގެ ތެރޭގައި އެ ފައިސާ މޯލްޑިވްސް އިންލެންޑް ރެވެނިއު އޮތޯރިޓީ (މީރާ) އަށް ދައްކައި ނިންމުމަށް ކޯޓުން ވަނީ ހުކުމްކޮށްފައެވެ.