ރާއްޖޭގައި ލޭ ހޯދުމަށް ދިމާވެފައިވާ ގޮންޖެހުންތަކަށް ދާއިމީ ހައްލެއް ހޯއްދަވައިދެއްވުމުގެ ގޮތުން، ލޭ ހަދިޔާކުރާ މީހުން ތިބި ތަންތަނަށް ގޮސް ލޭ ނެގޭނެ "މޯބައިލް ބްލަޑް ޑޮނޭޝަން" ޚިދުމަތް ވަރަށް އަވަހަށް ތަޢާރަފުކުރައްވާނެ ކަމަށް ޞިއްޙަތާއި ޢާއިލީ ތަރައްޤީއާ ބެހޭ ވަޒީރު ޑރ. ޤީލާ ޢަލީ ވިދާޅުވެއްޖެއެވެ.

ދައުލަތުގެ މީޑިއާ، ޕީއެސްއެމްގެ "އަހާށޭ ބުނާނަން" ޕްރޮގްރާމުގައި ވާހަކަދައްކަވަމުން ވަޒީރު ފާހަގަކުރެއްވިގޮތުގައި، ލޭ ހަދިޔާކުރަން ބޭނުންވާ ފަރާތްތަކަށް ވަގުތު ނުވުމާއި، މަރުކަޒުތަކަށް ދިއުމުގައި ހުރި ދަތިތަކަކީ ލޭ ލިބުން މަދުވާ މައިގަނޑު އެއް ސަބަބެވެ. މީގެއިތުރުން، ލޭ ދިނުމަށް ޝަރުތު ފުރިހަމަނުވުމުގެ ސަބަބުން ވެސް ގިނަ ބަޔަކަށް ލޭ ނުދެވޭ މައްސަލަ ކުރިމަތިވާކަން އެކަމަނާ ފާހަގަކުރެއްވިއެވެ.

ވަޒީރު ވިދާޅުވީ، ސަރުކާރުގެ އަމާޒަކީ ލޭ ހަދިޔާކުރާ ފަރާތްތަކަށް ވީހާވެސް ފަސޭހަ އިންތިޒާމުތަކެއް ހަމަޖައްސައިދިނުން ކަމަށެވެ. އެގޮތުން އަލަށް ފަށާ މޯބައިލް ޚިދުމަތުގެ ދަށުން، ރައްޔިތުންނާ ވީހާވެސް ގާތަށް ޓީމުތައް ގޮސް ލޭ ނެގުމަށްފަހު، ރައްކާތެރިކަމާއެކު ސްޓޯރޭޖް ފެސިލިޓީތަކަށް ގެންދެވޭނެ އިންތިޒާމު ހަމަޖެހިގެންދާނެއެވެ.

މޯލްޑިވިއަން ބްލަޑް ސަރވިސަސްގެ ހިސާބުތަކުން ދައްކާގޮތުގައި، ރާއްޖޭގައި ތެލެސީމިއާ ބައްޔަށް ފަރުވާ ހޯދަމުންދާ 668 މީހުން އެބަތިއްބެވެ. އޭގެ ތެރެއިން 505 މީހުންނަކީ އަތޮޅުތެރޭގައި ދިރިއުޅޭ ފަރާތްތަކަށްވާއިރު، މާލެ ސަރަހައްދުގައި ރަޖިސްޓްރީވެފައިވަނީ 163 މީހުންނެވެ. ތެލެސީމިއާ ކުދިންގެ އިތުރުން، އެކިއެކި ބޮޑެތި އޮޕަރޭޝަންތަކަށާއި ކުއްލި ފަރުވާ ބޭނުންވާ ބަލިމީހުންނަށްވެސް ގަވާއިދުން ލޭ ބޭނުންވެއެވެ.

މި މައްސަލައަށް ދުރުރާސްތާ ހައްލެއް ހޯއްދަވައިދެއްވުމުގެ ގޮތުން، ރާއްޖޭގެ ހަތަރު ސަރަހައްދެއްގައި ބްލަޑް ބޭންކް ގާއިމުކުރުން ފަދަ މުހިންމު މަސައްކަތްތަކެއް ސަރުކާރުން މިހާރުވެސް ވަނީ ފައްޓަވާފައެވެ. ސިއްހީ ދާއިރާ ހަރުދަނާކޮށް، ހާއްސަކޮށް ތެލަސީމިއާ ކުދިންނާއި ލޭ ބޭނުންވާ އެންމެހާ ފަރާތްތަކަށް ފަސޭހަކަމާއެކު ލޭ ލިބޭނެ މަގު ފަހިކޮށްދިނުމަށް ސަރުކާރުން އަންނަނީ ހާއްސަ އިސްކަމެއް ދީގެން އައު ޚިދުމަތްތަކާއި ވަސީލަތްތައް ގާއިމުކުރުމުގެ މަސައްކަތް ބާރަށް ކުރިއަށް ގެންދަވަމުންނެވެ.