މިދިޔަ އޮގަސްޓު މަހުގެ ތެރޭގައި ޒަކާތުގެ އެހީގެ ގޮތުގައި ޖުމުލަ 5،170،675.91 (ފަސް މިލިއަން އެއްލައްކަ ހަތްދިހަ ހާސް ހަސަތޭކަ ހަތްދިހަ ފަސް ރުފިޔާ ނުވަދިހަ އެއް ލާރި) ދޫކޮށްފައިވާ ކަމަށް މޯލްޑިވްސް ޒަކާތު ހައުސް އިން ހާމަކޮށްފިއެވެ.

ޒަކާތު ހައުސްއިން ބުނީ، މިއީ މިދިޔަ އަހަރުގެ އޮގަސްޓު މަހު ބެހި 4،615،944.84 ރުފިޔާއާ އަޅާ ބަލާއިރު 12 އިންސައްތަ އިތުރު ޢަދަދެއް ކަަމަށެވެ.

ޒަކާތު ހައުސް އިން ބުނީ، އޮގަސްޓު މަހު އެންމެ ބޮޑު ބައެއް ހޭދަކޮށްފައިވަނީ ފަގީރުންނާއި މިސްކީނުންގެ ބަޔަށް ކަމަށެވެ. އެއީ 2،358،675.66 ރުފިޔާއެވެ. މީގެ ތެރޭގައި ބޭސްފަރުވާގެ އެހީގެ ގޮތުގައި ދޫކުރި 2،316،175.66 ރުފިޔާއާއި ޒަރޫރީ ބޭނުންތަކަށް ދޫކުރި 42،500 ރުފިޔާ ހިމެނެއެވެ.

ދެން އެންމެ ބޮޑު ހޭދައެއް ކޮށްފައިވަނީ ފީސަބީލިﷲގެ ބަޔަށެވެ. އެއީ 2،544،823.64 ރުފިޔާއެވެ. މީގެ ތެރޭގައި ދީނީ ޕްރޮގްރާމްތައް ހިންގުމަށް ހޭދަކުރި 1،047،219.50 ރުފިޔާއާއި، މަތީ ތައުލީމު ފުރިހަމަކުރުމަށް ދިން އެހީގެ ގޮތުގައި 797،604.14 ރުފިޔާއާއި، ފޮތްތައް ތަރުޖަމާކުރުމަށް ހޭދަކުރި 579،585.40 ރުފިޔާގެ އިތުރުން ހިފްޒު ޕްރޮގްރާމްތަކާއި ކީރިތި ޤުރްއާނުގެ ޢިލްމު ފެތުރުމަށް ހޭދަކުރި 120،414.60 ރުފިޔާވެސް ހިމެނެއެވެ.

މީގެ އިތުރުން އޮގަސްޓު މަހުގެ ތަފާސްހިސާބުތަކަށް ބަލާއިރު، ދަރަނިވެރިންނަށް އެހީވުމުގެ ބައިން (އަލްޣާރިމީން) 60،061 ރުފިޔާ ދޫކޮށްފައިވާ އިރު، ހާލުގައި ޖެހިފައިވާ ދަތުރުވެރިންގެ ބައިން (އިބްނުއްސަބީލް) 19،834.02 ރުފިޔާ ވަނީ ދޫކޮށްފައެވެ.

2026ވަނަ އަހަރުގެ އޮގްސްޓު މަހުގެ ތެރޭގައި ޒަކާތު ފަންޑަށް ލިބުނު އާމްދަނީގެ ގޮތުގައި 7،353،416.98 ރުފިޔާ ރެކޯޑު ކުރެވިފައިވެއެވެ.

މުދަލު ޒަކާތަކީ އިސްލާމްދީނުގެ ފަރުޟުތަކުގެ ތެރެއިން ހިމެނޭ މުހިންމު އަޅުކަމެކެވެ. ތިމާގެ އަތުގައި ހުރި މުދަލުގެ އަގު ނިޞާބުގެ މިންވަރަށް އަރައި، އެ މުދަލެއްގެ މައްޗަށް ހިޖުރީ ގޮތުން އެއް އަހަރު ފާއިތުވުމުން، އޭގެ ސާޅީސްބައިކުޅަ އެއްބައިން ޒަކާތް ނެރުމަކީ ކޮންމެ މުސްލިމެއްގެ މައްޗަށް ވާޖިބު ކަމެކެވެ.

ރާއްޖޭގައި އޮންލައިންކޮށް މުދަލު ޒަކާތް ބަލައިގަތުމުގެ އިންތިޒާމުތައް ޒަކާތު ހައުސްއިން މިހާރު ވަނީ ހަމަޖައްސާފައެވެ. އެގޮތުން ބަނޑޭރި ޕޭ މެދުވެރިކޮށްނާއި، ބައެއް ބޭންކުތަކުގެ އެޕްލިކޭޝަންތައް މެދުވެރިކޮށް ޒަކާތް ދެއްކޭނެއެވެ.