ސަރުކާރުން ތައާރަފުކުރި "މޯލްޑިވްސް ނެޝަނަލް ސާވިސް" ޕްރޮގްރާމަކީ ދިވެހި ޒުވާނުންނާއި މުޅި މުޖުތަމައު ބަދަލުކޮށްލަނިވި ވަރަށް މުހިންމު ޕްރޮގްރާމެއްގެ ގޮތުގައި ހޯމް މިނިސްޓަރ ޢަލީ އިޙްސާން ސިފަކުރައްވައިފިއެވެ.

މިނިސްޓަރު އިހުސާން މިހެން ވިދާޅުވީ މިއަދު އެކްސްގައި ހިއްސާކުރެއްވި ޕޯސްޓެއްގައެވެ.

މިނިސްޓަރު ވިދާޅުވީ، މި ޕްރޮގްރާމަކީ ޒުވާނުންގެ ކިބައިގައި އަޚުލާގާއި، ކަންކަމަށް ކެތްތެރިވެ ކުރިމަތިލުމުގެ ގާބިލުކަމާއި، ލީޑަޝިޕް އަދި ގައުމިއްޔަތުގެ ރޫހު އަށަގެންނެވުމުގެ އިތުރުން ދިރިއުޅުމުގެ މުހިންމު ހުނަރުތައް ދަސްކޮށްދޭ ޕްރޮގްރާމެއް ކަމަށެވެ. އަދި މިއީ ވަޒީފާގެ ފުރުސަތުތަކަށާއި ގައުމީ ޚިދުމަތަށް ޒުވާނުން ނެރުމަށް މަގުފަހިކޮށްދޭ ވަރަށް މުހިންމު ފިޔަވަޅެއްކަން ވެސް މިނިސްޓަރު ފާހަގަކުރެއްވިއެވެ.

"އަމިއްލަ ނަފްސަށް އިތުބާރު އޮތް، ޒިންމާދާރު، އަދި ގައުމަށް ޚިދުމަތްކުރަން ތައްޔާރަށް އޮތް ޖީލެއް ބިނާކުރުމަކީ ގައުމުގެ މުސްތަގުބަލަށްޓަކައި އަޅުގަނޑުމެންނަށް ކުރެވޭނެ އެންމެ ވަރުގަދަ އެއް އިންވެސްޓްމަންޓް،" މިނިސްޓަރު އިހުސާންގެ ޕޯސްޓުގައި ވިދާޅުވެފައިވެއެވެ.

މީގެއިތުރުން، ޒުވާނުންގެ ހަކަތައާއި ގާބިލުކަމަށް އިތުބާރުކުރައްވައި، ދުރުވިސްނުންފުޅާއެކު މިފަދަ މުހިންމު އިސްނެންގެވުމެއް އިސްނަންގަވައި މަޝްރޫއު ފެއްޓެވި ކަމަށްޓަކައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒަށް މިނިސްޓަރު ވަނީ ތައުރީފުކުރައްވައި ޝުކުރު އަދާކުރައްވާފައެވެ.

ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުން ފަށާފައިވާ މި ޕްރޮގްރާމަކީ މުޖުތަމައުގައި ޒުވާނުންގެ ބައިވެރިވުން އިތުރުކޮށް، ގައުމީ ލޯތްބާއި ސުލޫކީ މިންގަނޑުތައް ހިފަހައްޓާ ޒިންމާދާރު ޖީލެއް ބިނާކުރުމުގެ މަގުސޫދުގައި ކުރިއަށްގެންދާ ހާއްސަ ޕްރޮގްރާމެކެވެ.