އިރުވައި މޫސުމާ ގުޅިގެން ދުނިޔޭގެ އެކި ކަންކޮޅުތަކުން ރާއްޖެއަށް ހިޖުރަކުރާ ހިމާޔަތްކޮށްފައިވާ ދޫނިތައް ހިފައި، އެ ތަކެތި ބަންދުކޮށްގެން ގެންގުޅުމާއި ވިޔަފާރިކުރުމަކީ މަނާ ކަމެއް ކަމަށާއި އެފަދަ ފަރާތްތަކާ މެދު ގާނޫނީ ފިޔަވަޅު އަޅާނެ ކަމަށް އެންވަޔަރަންމަންޓަލް ރެގިއުލޭޓަރީ އޮތޯރިޓީން އިންޒާރު ދީފިއެވެ.

އެ އޮތޯރިޓީން ނެރުނު ބަޔާނެއްގައި ބުނީ، އިރުވައި މޫސުމުގައި ރާއްޖެއަށް އަންނަ ދޫނިތަކަކީ ތިމާވެށި ރައްކާތެރިކޮށް ދެމެހެއްޓުމާބެހޭ ގާނޫނުގެ ދަށުން އެކުލަވާލާފައިވާ "ގުދުރަތީ ގޮތުގައި ނުވަތަ ތަބީއީ ގޮތުގައި ހިމާޔަތްކޮށް ރައްކާތެރިކުރާ ދިރޭތަކެއްޗާބެހޭ ގަވާއިދު" ގެ ދަށުން ހިމާޔަތް ލިބިފައިވާ ދިރުންތަކެއް ކަމަށެވެ. އެހެންކަމުން އެފަދަ އެއްވެސް ދޫންޏެއް ހިފައި، ފިޔަކޮށައި އަދި ކޮށީގައި ބަންދުކޮށްގެން ގެންގުޅުމަކީ އެ ގަވާއިދުގެ 17 ވަނަ މާއްދާގެ ދަށުން މުޅިން މަނާ ކަމެއް ކަމަށް އީއާރްއޭ އިން ހަނދާންކޮށްދިނެވެ.

މީގެއިތުރުން، އިރުވައި ގިނަ އަދަދަކަށް ދޫނި ހިފައިގެން އޮޅުކޮށްގެން ގެންގުޅުމާއި، އެ ތަކެތީގެ ވިޔަފާރިކުރަމުންދާކަން ފާހަގަކުރެވިފައިވާ ކަމަށް އެ އޮތޯރިޓީން ބުންޏެވެ. އަދި މިއީ ރާއްޖެއިން ސޮއިކޮށްފައިވާ ބައިނަލްއަގުވާމީ މުއާހަދާއެއް ކަމަށްވާ "ކޮންވެންޝަން އޮން މައިގްރޭޓަރީ ސްޕީޝީޒް" (ސީއެމްއެސް) އާ ވެސް ކަނޑައެޅިގެން ޚިލާފު އަމަލެއް ކަމަށް ވަނީ ފާހަގަކޮށްފައެވެ.

ރާއްޖޭގައި 2021 ވަނަ އަހަރުން ފެށިގެން ޖުމްލަ 207 ބާވަތެއްގެ ދޫނި ވަނީ ގާނޫނީ ގޮތުން ހިމާޔަތްކޮށްފައެވެ.

އެހެންކަމުން، ގަވާއިދާ ޚިލާފަށް ދޫނި ހިފާ އަދި ގެންގުޅޭ ފަރާތްތަކުގެ އެއްވެސް މައުލޫމާތެއް ލިބިފައިވާނަމަ، އެ ފަރާތެއްގެ މައުލޫމާތާއި، ދޫނި ބަހައްޓާފައިވާ ގޭގެ ނަމާއި ރަށާއި އަތޮޅުގެ ތަފްސީލު އަދި ދޫނީގެ ބާވަތް އެނގޭނެ ފޮޓޯ އާއި ވީޑިއޯ ފަދަ ހެކިތަކާއެކު އެ އޮތޯރިޓީގެ ނަންބަރު 3335949 އަށް ގުޅައިގެން ނުވަތަ އީމެއިލް މެދުވެރިކޮށް ރިޕޯޓުކުރުމަށް އެންވަޔަރަންމަންޓަލް ރެގިއުލޭޓަރީ އޮތޯރިޓީން ވަނީ އާންމުންގެ ކިބައިން އެދިފައެވެ.