ހާއްސަ އެހީއަށް ބޭނުންވާ 19 އަހަރުގެ ފައްޔާހް ހަސަން ފަޔާޒް (ދޮންކަލޯ) އަށް ރައްކާތެރި ދާއިމީ ބޯހިޔާވަހިކަމެއް ހޯދައިދިނުމަށް ޓިކްޓޮކް މެދުވެރިކޮށް ރޭ ކުރިއަށްގެންދިޔަ ހާއްސަ ފަންޑްރައިޒިން ލައިވް އިވެންޓުން، ކުޑަ ވަގުތުކޮޅެއްގެ ތެރޭގައި 1.2 މިލިއަނަށް ވުރެ ގިނަ ރުފިޔާ ހޯދައިފިއެވެ.

ބ. ހިތާދޫއަށް ނިސްބަތްވާ ފަޔާޒާއި އޭނާގެ ފުރާނަ ފަދަ ލޯބިވާ ދަރިފުޅު "ދޮންކަލޯ" އާންމުންގެ ލޮލުގައި އަޅައިގަތީ، އެ ދެބަފައިންގެ މެދުގައިވާ މާތް ލޯތްބާއި ގާތް ގުޅުން ފެނިގެންދާ ވީޑިއޯތަކުންނެވެ. ހަމައެކަނި "މަންމަ" އާއި "ބައްޕަ" ފަދަ މަދު ލަފްޒުތަކެއް ކިޔަން އެނގޭ، ވާހަކަ ނުދެއްކޭ ދޮންކަލޯ ބެލެހެއްޓުމަށްޓަކައި ބައްޕަ ފަޔާޒް ވަނީ އަދާކުރަމުން ދިޔަ ވަޒީފާވެސް ދޫކޮށްލާފައެވެ. ނަމަވެސް އެ ދެބަފައިން ދިރިއުޅެމުން ދިޔަ ހޫނުގަދަ، ޖާގަކުޑަ ކުޑަ ގޮޅިއެއްފަދަ ގޭގެ ހާލަތަކީ ދޮންކަލޯއަށް އުނދަގޫތަކެއް ކުރިމަތިކުރުވި ކަމެކެވެ.

ދަރިފުޅަށް ހިތްފަސޭހަ މާހައުލެއް ހޯދައިދިނުމަށް ފަޔާޒް ފެށި ގެ އެޅުމުގެ މަސައްކަތް ހިޔާކުރުމާ ހަމައިން މަޑުޖެހުނީ، އާމްދަނީ ލިބޭނެ ވަކި މަގެއް ނެތި، ދޮންކަލޯއަށް ލިބޭ އެލަވަންސް ފިޔަވައި އިތުރު އާމްދަނީއެއް ނެތުމުންނެވެ. އެހެންނަމަވެސް، މި ލޯބިވާ ދެބަފައިންގެ އުއްމީދުތަކުގައި ކުލަޖައްސައިދިނީ ދިވެހި ޓިކްޓޮކް ކޮމިއުނިޓީންނެވެ.

"ހިޔާ ފޯ ދޮންކަލޯ" ގެ ނަމުގައި ރޭ 21:00 ގައި ފެށި ޚާއްޞަ ލައިވް އިވެންޓަކީ ދިވެހި ޓިކްޓޮކްގައި މީހުންނަށް އެހީވުމުގައި ނަމޫނާ ދައްކަމުން އަންނަ އެމް.ޓީ.ޕީ އާއި މަރިޔަމް ސަމާ އިސްނަގައިގެން، ރާއްޖޭގެ މަޝްހޫރު އެތައް ޓިކްޓޮކް ހޯސްޓުންތަކަކާ އެކު ކުރިއަށް ގެންދިޔަ އިވެންޓެކެވެ. ލައިވް ފެށުނުތާ އެންމެ 30 މިނެޓުގެ ތެރޭގައި 14،000 އަށްވުރެ ގިނަ މީހުން ބައިވެރިވެ، މުޅި ލައިވް ނިމެންދެންވެސް 12،000 އެއްހާ މީހުން މެދުކެނޑުމެއްނެތި ބަލަމުން ދިޔައެވެ.

މި ލައިވް ވެގެންދިޔައީ ކޮންމެ ދިވެއްސެއްގެ ލޮލުން ކަރުނަ އޮހޮރުވައިލި، އެހާމެ އަސަރުގަދަ ވަގުތުކޮޅަކަށެވެ. އެންމެންގެ ހެޔޮދުއާއާއި އެކު ފަޔާޒުގެ އެކައުންޓަށް ފައިސާ ޖަމާވަމުން ގޮސް، ކުޑަ ވަގުތުކޮޅެއްގެ ތެރޭގައި ވަނީ ކަނޑައެޅި ޓާގެޓް ފަހަނައަޅައި 1.2 މިލިއަނަށް ވުރެ ގިނަ ރުފިޔާ ހަމަވެފައެވެ. މީގެއިތުރުން ބޭންކް އޮފް މޯލްޑިވްސް (ބީއެމްއެލް) އިން ވަނީ 50،000 ރުފިޔާ ހަދިޔާކޮށްފައެވެ. އަދި ވިޔަފާރިވެރިންނާއި ހެޔޮއެދޭ ފަރާތްތަކުން ވަނީ ގެއަށް ބޭނުންވާ ސާމާނާއި އެހެނިހެން އެހީތައް ސްޕޮންސާކޮށްފައެވެ.

މުޅި ރާއްޖެއިން ދެއްކި މި އަޖައިބެއްފަދަ ދީލަތިކަމާއި ލޯތްބާ ގުޅިގެން ފަޔާޒް ވަނީ، މިއީ އޭނާ ދުވަހަކުވެސް އުއްމީދުކުރި ވަރަށްވުރެ ބޮޑު ތަރުހީބެއްކަން ފާހަގަކޮށް، ދިވެހި ލޮބުވެތި ރައްޔިތުންނަށާއި މިކަމުގައި އިސްނެގި ހުރިހާ ފަރާތްތަކަށް ހިތުގެ އެންމެ ފުންމިނުން ޝުކުރު އަދާކޮށްފައެވެ.

ރޭ ފެނިގެންދިޔަ މަންޒަރުން ސާބިތުކޮށްދިނީ ދިވެހިންގެ ހިތްތަކުގައި އިންސާނިއްޔަތުކަމާއި، އެކަކު އަނެކަކަށް އަޅައިލުމުގެ ރޫހު އަދިވެސް އޮތީ ދިރިދިރި ކަމެވެ. މި ލިބުނު އެހީއާއެކު، ވަރަށް އަވަހަށް ދޮންކަލޯއަށް އަމިއްލަ ގޭގެ ހިތްގައިމު މާހައުލުގައި ހިނިތުންވުމާއެކު ދުވެ، އުފާވެރި އަމާން ދިރިއުޅުމެއް ލިބިގެންދާނެއެވެ.