މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އަށް ލިބޭ މާލީ އެހީތެރިކަމަކީ ވަކި ދެ ފަރުދެއްގެ ސިޔާސީ އިސްތިހާރު ތައްޔާރުކުރުމަށް ބޭނުންކުރެވޭ އެއްޗަކަށް ވެގެން ނުވާނެ ކަމަށް އެ ޕާޓީގެ ކުރީގެ ޗެއާޕާސަން އަދި ރައްޔިތުންގެ މަޖިލީހުގެ ކުރީގެ ނައިބު ރައީސް ރީކޯ މޫސާ މަނިކު ވިދާޅުވެއްޖެއެވެ.

މޫސާ މަނިކު މިހެން ވިދާޅުވީ މީސްމީޑިއާގައި ހިއްސާކުރެއްވި މެސެޖެއްގައެވެ. އެގޮތުން ރޭ ފެށުނު އެމްޑީޕީގެ ކޮންގްރެސްއާ ގުޅޭގޮތުން މޫސަ ވިދާޅުވީ ކޮންގްރެސް ނިމިގެންދާއިރު، މުސްތަޤްބަލުގައި ވެސް ޕާޓީ ދެމިއޮތުމަށްޓަކައި އެންމެ މުހިންމު ކަމެއްގެ ގޮތުގައި ބަލަންޖެހޭނީ 2023 ވަނަ އަހަރުގެ ރިޔާސީ އިންތިޚާބު އެ ޕާޓީއަށް ގެއްލެން ދިމާވި މައިގަނޑު ސަބަބުތައް ކަމަށެވެ.

އެގޮތުން 2023 ގެ އިންތިޚާބު ނާކާމިޔާބުވުމުގައި އެންމެ ބޮޑު ދައުރެއް އަދާކުރީ ޕާޓީގެ އިސް ސަފުގައި އުފެދުނު "އާއިލީ ތަޅާފޮޅުން" ކަމަށާއި، އޭގެ ސަބަބުން ޕާޓީއަށް ބޮޑެތި ގެއްލުންތަކެއް ލިބިގެންދިޔަ ކަމަށް މޫސާ މަނިކު ވިދާޅުވިއެވެ. އަދި ކުރިމަގުގައި މިފަދަ ކަންކަން ތަކުރާރު ނުވާނެ ގޮތްތަކެއް ހޯދައި، އެކަމަށްޓަކައި އަޅަންޖެހޭ މުހިންމު ފިޔަވަޅުތައް މިހާރުން މިހާރަށް އަޅަންޖެހޭ ކަމަށްވެސް އޭނާ ފާހަގަކުރެއްވިއެވެ.

މީގެ އިތުރުން، ޕާޓީގެ އެތަކެއް ޚިދުމަތްތެރިންގެ ކުރިމަތީގައި 21 އަހަރުވީ އެމްޑީޕީ ތަމްސީލުވާންވާނީ ވަކި ދެ ފަރުދެއްގެ ބާރުގައި ހިނގާ ޚުދުމުޚްތާރު ވެރިކަމެއްގެ ގޮތުގައި ނޫންކަން، ކުރިމަގުގައި އާންމު މެންބަރުންނަށް އެނގެންޖެހޭ ކަމަށް މޫސާ މަނިކު ވިދާޅުވިއެވެ. އަދި ޕާޓީއަށް ލިބޭ މާލީ އެހީތެރިކަން ހޭދަކުރެވެންވާނީ ވަކި ދެ މީހެއްގެ ސިޔާސީ ޕްރޮމޯޝަނަށް ނޫންކަން ކަށަވަރުކުރުމަކީ ޕާޓީގެ ކުރިމަގަށް ކޮންމެހެން ބޭނުންތެރި ކަމެއް ކަމަށްވެސް އޭނާ ވިދާޅުވިއެވެ.

މޫސަ މިހެން ވިދާޅުވެފައިވާއިރު ރޭ ފެށުނު އެމްޑީޕީގެ ކޮންގްރެސްގައި ރައީސް ޞާލިޙްގެ އައިނު ފޮހެލުމަށް ރައީސް ނަޝީދުގެ ރުމާކޮޅު އެރުވި މަންޒަރާއި، ރައީސް ޞާލިޙަށް ފެންތަށި އެރުވުމަށް ރައީސް ނަޝީދު ސްޓޭޖަށް އެރުއްވި މަންޒަރު މީޑިއާގެ ސަމާލުކަމަށް ވަނީ އައިސްފައެވެ.