ދިވެހިރާއްޖޭގެ އެންމެ ގިނަދުވަސްވީ ސިޔާސީ ޕާޓީ، އެމްޑީޕީގެ ކޮންގްރެސް ހުޅުވުމުގެ ރަސްމިއްޔާތުގައި މިވަނީ ގިނަ ބައެއްގެ ސަމާލުކަން ދަމައިގަތް، ހިތްގައިމު އަދި އެހާމެ ސިޔާސީ އެތައް މަންޒަރެއް ފެނިގެން ގޮސްފައެވެ. އެއް ޒަމާނެއްގެ އެންމެ ގާތް ދެ އެކުވެރިން ކަމަށްވާ ކުރީގެ ރައީސް މުޙައްމަދު ނަޝީދާއި، ކުރީގެ ރައީސް އިބްރާހީމް މުޙައްމަދު ޞާލިޙް (އިބޫ) އެއް މޭޒެއްގެ ދޮށުން އަނެއްކާވެސް ފެނިގެން ދިޔުމެވެ. ވަކިން ޚާއްޞަކޮށް، ޖަލްސާގެ ތެރެއިން ރައީސް ޞާލިޙަށް ރައީސް ނަޝީދު ފެންތަށި ގެންގޮސް ދެއްވުމާއި، ރަސްމިއްޔާތު ފެށުމުގެ ކުރިން ރައީސް ޞާލިޙްގެ އައިނުކޮޅު ފޮހެލެއްވުމަށް ރައީސް ނަޝީދުގެ ޖީބުފުޅުން ރުމާކޮޅު ދެއްވި މަންޒަރަކީ ސިޔާސީ މަސްރަޙުގައި ވަރަށް ގިނަ ހަނދާންތަކެއް އާކޮށްދިން ކަންކަމެވެ.

ނަމަވެސް، މަތިމަތިން ފެންނަން އޮތް މި އޯގާތެރިކަމުގެ ފަހަތުގައި އޮތް ޙަޤީޤަތަކީ، ދެބޭފުޅުން އަދިވެސް ތިއްބެވީ ސިޔާސީ ގޮތުން ދެ ފެކްޝަނެއްގެ ގޮތުގައި ކަމެވެ. ދެބޭފުޅުންގެ ދެމެދުގައި އޮތް ގާތް ގުޅުމަށް ބޮޑެތި ބުރޫތަކެއް އަރައި، ގުޅުން ގޯސްވެގެން ދިޔައީ ރައީސް ޞާލިޙްގެ ވެރިކަމުގެ ފަހުކޮޅުގައެވެ. އޭރު މަޖިލީހުގެ ރައީސްގެ މަޤާމުގައި ހުންނެވި ރައީސް ނަޝީދު، އެ މަޤާމުން ވަކިކުރުމުގެ މަސައްކަތް އެމްޑީޕީގެ ޕާލިމަންޓަރީ ގްރޫޕުން ފެށުމާއެކު، ޚިޔާލުތަފާތުވުންތައް އިންތިހާއަށް ބޮޑުވިއެވެ.

ނަތީޖާއެއްގެ ގޮތުން، ރައީސް ނަޝީދު އިސްވެ ހުންނަވައި އެމްޑީޕީން ވަކިވެވަޑައިގެން "ދަ ޑިމޮކްރެޓްސް" ގެ ނަމުގައި އައު ސިޔާސީ ޕާޓީއެއް އުފެއްދެވިއެވެ. އަދި 2023 ގެ ރިޔާސީ އިންތިޚާބުގައި ރައީސް ޞާލިޙްގެ ވެރިކަން ބަދަލު ކުރުމަށް ޢަމާޒުހިފައި، ވަކިން ރިޔާސީ ކެންޑިޑޭޓަކު ނެރެ، އެމްޑީޕީގެ ތެރެއިން 15،000 އަށްވުރެ ގިނަ ވޯޓު ޑިމޮކްރެޓްސްގެ ކޮޅަށް އަނބުރާލިއެވެ. އެއީ ރައީސް ޞާލިޙަށް ރިޔާސީ ދެވަނަ ދައުރެއް ގެއްލިގެން ދިޔުމުގެ މައިގަނޑު އެއް ސަބަބު ކަމަށް ރައީސް ޞާލިޙްގެ ސަޕޯޓަރުން މިއަދުވެސް ޤަބޫލުކުރެއެވެ.

އެހެންނަމަވެސް، ވެރިކަން ބަދަލުވުމަށްފަހު ސިޔާސީ އޮއިވަރާއެކު، ރައީސް ނަޝީދުގެ ފަޅީގައި ތިއްބެވި ބައެއް އިސް ބޭފުޅުންނާއި ސަޕޯޓަރުން ވަނީ އަލުން އެމްޑީޕީއާ ގުޅިފައެވެ. އަދި ޕާޓީގެ އެތެރޭގެ ބާރުތައް ހޯދުމަށް ކުރެވުނު މަސައްކަތުގައި، އާންމު މެންބަރުންގެ ވޯޓުން އެމްޑީޕީގެ ޗެއަރޕާސަންގެ މަޤާމު ރައީސް ނަޝީދު ވަނީ ކުރީގެ މިނިސްޓަރ ފައްޔާޒުގެ ސަޕޯޓަރުންގެ އެހީގައި ކާމިޔާބު ކޮށްފައެވެ.

މި ހިސާބުން އުފެދޭ އެންމެ ބޮޑު ސުވާލަކީ، ކޮންގްރެސްގެ ތަޅުމުން ރައީސް ނަޝީދާއި ރައީސް ޞާލިޙްގެ ފަރާތުން ފެނިގެންދިޔަ މި އެކުވެރިކަމަކީ ޙަޤީޤީ އެއްބައިވަންތަކަމެއް ތޯ ނުވަތަ ސިޔާސީ ޑްރާމާއެއް ތޯއެވެ؟ ޚަބަރުތައް ލިބޭގޮތުގައި، މިފަހަރުގެ ކޮންގްރެސްގެ ތެރެއިން ޕާޓީގެ ޗެއަރޕާސަންގެ ބާރުތައް ހަނިކޮށް، "ފިޔަކޮށާލުމަށް" ޚާއްޞަ އިސްލާޙުތަކެއް ހުށަހެޅުމަށް ދަނީ ތައްޔާރުވަމުންނެވެ. މިއީ ސީދާ ޕާޓީގެ އެތެރޭގެ ބާރުގެ ހަނގުރާމަ އަދިވެސް ނުނިމޭކަމުގެ އަލިގަދަ ހެއްކެކެވެ.

ފެންތަށިކޮޅާއި ރުމާކޮޅުގެ ޢަމަލުން ސިޔާސީ މަސްރަޙު ފިނިކޮށްލަން މަސައްކަތް ކުރި ނަމަވެސް، ކޮންގްރެސްގެ ތެރެއިން ޗެއަރޕާސަންގެ ބާރުތައް ކަނޑުވާލުމަށް ހުށަހަޅާ އިސްލާޙުތައް ފާސްވެއްޖެނަމަ، އަނެއްކާވެސް ޕާޓީގެ އެތެރޭގެ ބައިބައިވުން ބޮޑުވެގެންދާނެއެވެ. ސުވާލަކީ ޗެއަރޕާސަންގެ ބާރުތައް ކަނޑުވާލުމަށް ހުށަހަޅާ މި އިސްލާޙުތައް ކާމިޔާބުވާނީ ކިހާ މިންވަރަކަށްތޯއެވެ؟ އަދި މި ރުމާކޮޅާއި ފެންތަށިކޮޅުން އެމްޑީޕީގެ އެތެރޭގެ ޒަޚަމްތަކުގައި ބޭސްއެޅިދާނެތޯ، މިއީ މިއަދު އުފެދޭ އެންމެ ބޮޑު ސިޔާސީ ސުވާލެވެ.