ސޯޝަލް މީޑިއާގައި އަނބިމީހާއާ ދިމާލަށް "ފަލައޭ" ބުނެ މަލާމާތްކުރި ކަމަށް ބުނެ، ކަތިވަޅިއެއް ހިފައިގެން ގޮސް މާރާމާރީ ހިންގަން އުޅުނު މައްސަލާގައި ށ. މިލަންދޫން ހައްޔަރުކުރި މީހާގެ މައްޗަށް ދައުވާކޮށްފި އެވެ.

މިދިޔަ އޮގަސްޓު މަހު އެ މައްސަލައިގައި ހައްޔަރުކުރި ށ. މިލަންދޫ/ސީރީނުވިލާ، އަހުމަދު ޝާއިހާން ޝާހިދު(22އ.)ގެ ބަންދު ދެތިން ފަހަރަކު އިތުރުކުރި އިރު އިއްޔެ މިލަންދޫ ކޯޓުން ވަނީ އޭނާ ބަންދުން ދޫކޮށްލައިފައެވެ.

އެ މައްސަލައިގައި އޭނާއާ ދެކޮޅަށް ހެކިދޭން ފުލުހުންނާއި އާންމުންވެސް ނިންމާފައިވާ އިރު އަދި އެ މައްސަލައިގެ އިބްތިދާއި އަޑުއެހުން ނުފެށެ އެވެ. އަދި އެ މީހުންގެ ހެކިބަސް ނެގިފައެއް ނުވެއެވެ. އެހެންވެ ހެއްކަށް ނުފޫޒު ފޯރުވައި ހެކި ނައްތާލުމުގެ ފުރުސަތު އޮތްކަމަށް ކޯޓުގެ ހުލާސާ ބަޔާނުގައި އޮތް ނަމަވެސް ޕްރޮސިކުޓާ ޖެނެރަލް އޮފީހުން އެދިފައި އޮތީ ހަރުކަށު ޝަރުތުތަކާއެކު އޭނާ ދޫކޮށްލުމަށެވެ.

ކޯޓުން އޭނާ ދޫކޮށްލީ ޕްރޮސިކިއުޓާ ޖެނެރަލްއިން ހުށަހަޅި ކަންކަމަށް ރިއާޔަތްކުރުމަށްފަހު އެވެ.

ޝައިހާން ވަނީ ކަތިވަޅި ހިފައިގެން އެ ސަރަހައްދަށް ގޮސް، އެ ވަގުތު އެތަނުގައި ހުރި އެހެން މީހަކަށް ވެސް ކަތިވަޅި މަޅައި "ނުފުއްޕައްޗޭ" ބުނެ ބިރުދައްކައި އިންޒާރު ދީފައެވެ. އަދި މި ހާދިސާގެ ރިޕޯޓް ލިބިގެން ފުލުހުން އެ ސަރަހައްދަށް ދިޔަ ވަގުތު، އޭނާގެ އަތުގައި އޮތް ކަތިވަޅި ސައިކަލެއްގެ މަޑިދަށަށް ލައި ފޮރުވި މަންޒަރު ފެނުނު ކަމަށް ވެސް ހެކިން ބުނެފައިވެއެވެ.