ހުޅުދޫ އަދި މީދޫ ހިމެނޭހެން އައްޑޫ ސިޓީ އާއި ފުވައްމުލައް ސިޓީގެ ފެނާއި ނަރުދަމާގެ ޚިދުމަތްތަކާ މި ހިނގާ އޮކްޓޫބަރު 1 ވީ ބުރާސްފަތި ދުވަހު މާލެ ވޯޓަރ އެންޑް ސުވަރޭޖް ކޮމްޕެނީ (އެމްޑަބްލިޔުއެސްސީ) އިން ރަސްމީކޮށް ހަވާލުވެ، އޮޕަރޭޝަނަލް މަސައްކަތްތައް ފަށައިފި ކަމަށް އެ ކުންފުނީގެ މެނޭޖިން ޑިރެކްޓަރު ޙުސައިން ފަހުމީ ވިދާޅުވެއްޖެއެވެ.

އެމްޑަބްލިޔުއެސްސީގެ މެނޭޖިން ޑިރެކްޓަރު ހުސައިން ފަހުމީ އެކްސްގައި ހިއްސާކުރެއްވި ޕޯސްޓެއްގައި ވިދާޅުވީ، މިއީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ކޯޕަރޭޓް ދާއިރާ އިޞްލާޙުކުރުމަށް ކަނޑައަޅުއްވާފައިވާ ސިޔާސަތުގެ ދަށުން ގެނެވުނު މުހިންމު ބަދަލެއް ކަމަށެވެ. އަދި އޮކްޓޫބަރު 1 އިން ފެށިގެން މި ދެ ސިޓީގެ އޮޕަރޭޝަނަލް ހުރިހާ ޚިދުމަތްތަކެއް އެމްޑަބްލިޔުއެސްސީން މިހާރު ދެމުން ގެންދާ ކަމަށް އޭނާ ވިދާޅުވިއެވެ.

ފަހުމީ ވިދާޅުވި ގޮތުގައި، މި ބަދަލާ ގުޅިގެން އެމްޑަބްލިޔުއެސްސީ އާއި ފެނަކަ ކޯޕަރޭޝަނާ ދެމެދު ވަނީ ފްރޭމްވޯކް އެއްބަސްވުމެއް އެކުލަވާލައި ސޮއިކޮށްފައެވެ. އަދި އެ ދެ ސިޓީގެ ފެނާއި ނަރުދަމާއާ ގުޅުންހުރި އެންމެހައި އިންފްރާސްޓްރަކްޗަރާއި ވަސީލަތްތައް ބަދަލުކުރުމުގެ މަސައްކަތް މިހާރު ވަނީ އެއްކޮށް ފުރިހަމަކުރެވިފައެވެ.

މީގެއިތުރުން، މި ނިޒާމުތައް އިތުރަށް ހަރުދަނާކޮށް، ރައްޔިތުންނަށް މެދުކެނޑުމެއްނެތި، އިތުބާރުހުރި އަދި ފެންވަރު ރަނގަޅު ޚިދުމަތެއް ކަށަވަރުކޮށްދިނުމުގެ ގޮތުން ހެދިފައިވާ ފަންނީ އެސެސްމަންޓްތަކަށް ބިނާކޮށް، ދެ ސިޓީގެ ޚިދުމަތުގެ ފެންވަރު މަތިކުރުމަށާއި، އޮޕަރޭޝަނަލް ހިންގުން ހަރުދަނާކުރުމުގެ ޢަމަލީ މަސައްކަތްތައް މިހާރު ކުރެވެމުންދާ ކަމަށްވެސް ފަހުމީ ފާހަގަކުރެއްވިއެވެ.

ސަރުކާރުގެ ކުންފުނިތަކުގެ ހިންގުން ހަރުދަނާކޮށް، ރައްޔިތުންނަށް ދެވޭ ޚިދުމަތްތަކުގެ ފެންވަރު ރަނގަޅު ކުރުމަށް ސަރުކާރުން އަޅަމުންދާ ފިޔަވަޅުތަކުގެ ތެރެއިން، ފެނާއި ނަރުދަމާގެ ޚިދުމަތް އެންމެ ފުޅާ ދާއިރާއެއްގައި ދެމުން އަންނަ އެމްޑަބްލިޔުއެސްސީގެ ދަށަށް މި ޚިދުމަތްތައް ބަދަލުކުރުމަކީ ދެކުނުގެ ދެ ސިޓީގެ ރައްޔިތުންނަށް ލިބިގެންދާނެ ބޮޑު ކުރިއެރުމެކެވެ.