އިދިކޮޅު މައި ޕާޓީ، މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ކޮންގްރެސްގެ ތެރެއިން ބޭއްވި އިންވެސްޓްމަންޓް ފޯރަމަކީ، ސަރުކާރުން ހޯދަމުންދާ ބޮޑެތި އިންވެސްޓްމަންޓްތަކުގެ ކުލަ ކަނޑުވާލުމަށްޓަކައި ކުޅޭ ސިޔާސީ ޑްރާމާއެއް ކަމަށް ވިދާޅުވެ، ރައްޔިތުންގެ މަޖިލީހުގެ ހުޅުދޫ ދާއިރާގެ މެންބަރު މުޙައްމަދު ޝާހިދު (ޝާޑު) އެ ޕާޓީއަށް ވަރަށް ބޮޑަށް ފާޑުވިދާޅުވެއްޖެއެވެ.

މެންބަރު މުޙައްމަދު ޝާހިދު މީސްމީޑިއާގައި ކުރެއްވި ޕޯސްޓެއްގައި ވިދާޅުވީ، އެމްޑީޕީގެ ކޮންގްރެސްގައި ފެނިގެންދިޔަ މި ހަރަކާތަކީ ހަގީގަތުގައި ރައީސް މުޙައްމަދު ނަޝީދުގެ ރިޔާސީ ކެމްޕޭނަށް އަމާޒުކޮށްގެން ރާވާފައިވާ ކަމެއް ކަމަށެވެ. އަދި އެ ފޯރަމުގައި ކައުންސިލަރުން ލައްވައި ޕްރެޒެންޓޭޝަންތައް ދައްކުވާފައިވަނީ ހަގީގީ އިންވެސްޓަރުންނަށް ނޫން ކަމަށާއި، އެއީ ހަމައެކަނި އެ ޕާޓީގެ އެކްޓިވިސްޓުންގެ ކުރިމަތީގައި ދެއްކި ދެއްކުމެއް ކަމަށް ޝާހިދު ފާހަގަކުރެއްވިއެވެ.

އެމްޑީޕީން ބޭއްވި އެ ބައްދަލުވުމަކީ އެއްވެސް އިތުބާރެއް ހުރި އިންވެސްޓަރުން ބައިވެރިވި ފޯރަމެއް ނޫން ކަމަށާއި، އެއީ ހަމައެކަނި "ސިޔާސީ މައުރަޒެއް" ގެ ގޮތުގައި ޝާހިދު ސިފަކުރެއްވިއެވެ. އޭނާ ވިދާޅުވީ އެމްޑީޕީން އަބަދުވެސް ރައްޔިތުންނަށް ދައްކާނީ ކުލަކުލައިގެ ޕްރޮޕޯސަލްތަކާއި ނުފުއްދޭނެ ހުވަފެންތައް ކަމަށާއި، އެއިން ލިބޭނެ ހަގީގީ ނަތީޖާއެއް ނެތް ކަމަށެވެ. އަދި އޭގެ ނަތީޖާއަކީ ސިފަނުވާ ބިލާހެއް ކަމުގައިވެސް އޭނާގެ ޕޯސްޓުގައި ބަޔާންކުރައްވާފައިވެއެވެ.

މީގެ އިތުރުން ޝާހިދު ތުހުމަތުކުރެއްވި ގޮތުގައި، މި ސަރުކާރުން ގައުމުގެ ތަރައްގީއަށާއި ރައްޔިތުންނަށްޓަކައި ހޯދަމުންދާ ކުރިއެރުންތަކާއި ބޮޑެތި އިންވެސްޓްމަންޓްތައް ބަލައިގަތުމަށް އެމްޑީޕީއަށް ވަނީ ވަރަށް ބޮޑަށް ދަތިވެފައެވެ. އަދި ކޮންގްރެސްގެ ތެރެއިން ހުވަފެނީ ހުށަހެޅުންތަކެއް ދައްކަން މަސައްކަތްކުރަނީ އެ ސަބަބާ ހުރެ ކަމަށް ވިދާޅުވިއެވެ.

މެންބަރު ޝާހިދު ވިދާޅުވީ، އިދިކޮޅުން ކިތަންމެ ވަރަކަށް ސިޔާސީ ޑްރާމާ ކުޅުނު ކަމުގައި ވިޔަސް، އެ ކަންކަމުގެ ހަގީގަތް މިއަދު ދިވެހި ލޮބުވެތި ރައްޔިތުންނަށް ވަރަށް ސާފުކޮށް އެނގި ސާބިތުވާނެ ކަމަށެވެ.