މާލޭގައި ހުންނަ އެސްޓީއޯ ސާވިސް ސެންޓަރުގެ ފުރާޅަށް ހުއްދަނެތި އަރައި، އެތަނުގައި ހުރި އެއާކޮންޑިޝަންތަކަކަށް ގެއްލުންދިން މީހަކު ފަސް މަހާއި 28 ދުވަހުގެ މުއްދަތަށް ޖަލަށްލުމަށް ކްރިމިނަލް ކޯޓުން ހުކުމްކޮށްފިއެވެ.

މި މައްސަލައިގައި ޖަލު ހުކުމް އައިސްފައިވަނީ ސ. ފޭދޫ، އެލޯހައުސް، މުހައްމަދު ޝިއުނީޒްގެ މައްޗަށެވެ.

ހަވީރީ ހިނގުމާއި އާބުރުޒު ހިނގުން ގުޅޭ ކަންމަތީގައި ހުންނަ އެސްޓީއޯ ސާވިސް ސެންޓަރުގެ ފުރާޅަށް ހުއްދަނެތި އަރައި، އެތަނުގައި ހަރުކޮށްފައި ހުރި ތިން އެއާކޮންޑިޝަންގެ އައުޓްޑޯ އުނިޓް ރޫޅާލައި، އެތަކެއްޗަށް ގެއްލުންދިން މައްސަލައިގައި ދައުލަތުން އޭނާގެ މައްޗަށް ދެ ދައުވާއެއް އުފުލިއެވެ.އެއީ އެނގިހުރެ ހުއްދަނޫން ތަނަކަށް ވަނުމުގެ ދައުވާއާއި، މުދަލަށް ގެއްލުންދިނުމުގެ ދައުވާއެވެ.

މި މައްސަލަ ބެލުމަށްފަހު ކްރިމިނަލް ކޯޓުން ކުރި ހުކުމުގައިވާ ގޮތުން، އެނގިހުރެ ހުއްދަނޫން ތަނަކަށް ވަނުމުގެ ދައުވާ ސާބިތުވެގެން ޖިނާއީ އިޖުރާއަތުގެ ގާނޫނުގެ ދަށުން އޭނާއަށް ދެ މަހާއި 28 ދުވަހުގެ ޖަލު ހުކުމެއް ވަނީ އައިސްފައެވެ.

އަދިތަނުގެ މުދަލަށް ގެއްލުންދިން ދައުވާ ސާބިތުވުމުން ތިން މަސްދުވަހުގެ ޖަލު ހުކުމެއް ވަނީ އިއްވާފައެވެ. އެހެންކަމުން ދެ ދައުވާ ސާބިތުވެ، އޭނާ ތަންފީޒު ކުރަންޖެހޭ ޖުމްލަ އަދަބަކީ ފަސް މަހާއި 28 ދުވަހުގެ ޖަލު ހުކުމެކެވެ.