މޯލްޑިވްސް ޕެންޝަން އެޑްމިނިސްޓްރޭޝަން އޮފީހުން އިންތިޒާމުކޮށްގެން ބާއްވާ "ތްރީ ޖެނެރޭޝަން ވޯކް" (3ޖެން ވޯކް) ގެ 4 ވަނަ އެޑިޝަން 2026 ވަނަ އަހަރުގެ އޮކްޓޫބަރު މަހުގެ 17 ވާ ހޮނިހިރު ދުވަހު ހދ. ހަނިމާދޫގައި ބޭއްވުމަށް ނިންމައިފިއެވެ.

ޕެންޝަން އޮފީހުން މިއަދު ބުނީ، މިޙަރަކާތަކީ ކާފައާއި މާމަ، މައިންބަފައިން އަދި ކުދިން ހިމެނޭހެން އެއް އާއިލާއެއްގެ ތިން ޖީލު އެއްތަނަކުން ބައްދަލުވެ، މާލީ ހޭލުންތެރިކަމާއި، ދުޅަހެޔޮކަމާއި، ދުރު ރާސްތާގެ މާލީ ރައްކާތެރިކަން އިތުރުކުރުމަށް ބާރުއެޅުމުގެ މަގުސަދުގައި ބާއްވާ ހާއްސަ ހަރަކާތެއް ކަމަށެވެ. މި އިވެންޓުގެ ޒަރީއާއިން ފައިސާ ރައްކާކުރުމާއި، އިންވެސްޓްކުރުމުގެ އިތުރުން ރިޓަޔާމަންޓަށް ތައްޔާރުވުމާ ގުޅޭގޮތުން އާއިލާގެ ތެރޭގައި ވާހަކަ ދެއްކުމުގެ ފުރުސަތު ފަހިވެގެންދާނެއެވެ. އަދި އުމުރުގެ ކޮންމެ މަރުހަލާއެއްގައިވެސް މާލީ ރަނގަޅު އާދަތައް އަށަގަންނުވައި ދެމެހެއްޓުމުގެ މުހިންމުކަން މި ހަރަކާތުން ހާމަކޮށްދޭނެ ކަމަށް އެ އޮފީހުން ވަނީ ބުނެފައެވެ.

މި ހަރަކާތުގެ މައިގަނޑު އެއް ބަޔަކީ ތިން ޖީލު އެކުއެކީގައި ބައިވެރިވާ 1 ކިލޯމީޓަރުގެ ރަމްޒީ ހިނގާލުމެވެ. މި ހިނގާލުމުން ދައްކުވައިދެނީ މާލީ ގޮތުން ތައްޔާރުވެ ތިބުމަކީ މުޅި އުމުރަށް ދެމިގެންދާ ދަތުރެއް ކަމާއި، އެއީ ޖީލުތަކުގެ މެދުގައި އޮންނަ ގުޅިފައިވާ ޒިންމާއެއް ކަމެވެ.

ހިނގާލުމަށްފަހު، ހުރިހާ ޖީލުތަކަކަށް ބައިވެރިވެވޭ ގޮތަށް ފޯރިގަދަ އާއިލީ ހަވީރެއް ވެސް ކުރިއަށްދާނެއެވެ. މި ހަވީރުގައި ކާނިވަލް ގޭމްތަކާއި، މައުލޫމާތު ދޭ ސްޓޯލްތަކާއި، ސަގާފީ ހުށަހެޅުންތަކުގެ އިތުރުން ތަފާތު ކާބޯތަކެތި ލިބޭނެ ފުޑް ކޯޓެއްވެސް ހިމެނޭނެއެވެ.

ޕެންޝަން އޮފީހުން ބުނީ، "3ޖެން ވޯކް" ގެ މައިގަނޑު އަމާޒަކީ ޖީލުތަކުގެ މެދުގައި އޮންނަ ގުޅުން ބަދަހިކޮށް، އާއިލާތަކަށް އެކުގައި އުފާވެރި އަދި މާނަވީ ވަގުތުތަކެއް ހޭދަކުރުމުގެ ފުރުސަތު ހޯދައިދިނުން ކަމަށެވެ. އަދި އުމުރުން ދުވަސްވީ މީހުންނަކީ މުޖުތަމަޢުގައާއި އާއިލާގެ ތެރޭގައި ހަރަކާތްތެރި، ބައިވެރިވުން ބޮޑު ބަޔަކަށް ހެދުމާއެކު، ތަޖުރިބާތައް ހިއްސާކޮށް މުސްތަގުބަލުގެ މާލީ ދުޅަހެޔޮކަމަށް ވިސްނައި ރޭވުމަށް މި ހަރަކާތުން ބާރުއަޅައެވެ.