ގދ. ތިނަދޫ ސިޓީގައި ސަރުކާރުން ކުރިއަށްގެންދާ 200 ހައުސިންގ ޔުނިޓު ޤާއިމުކުރުމުގެ މަޝްރޫޢުގެ ބޮޑުބައެއް ނިމިއްޖެއެވެ.

މިނިސްޓްރީ އޮފް ހައުސިންގ، ލޭންޑް އެންޑް އާބަން ޑިވެލޮޕްމަންޓުން ހާމަކޮށްފައިވާ މަޢުލޫމާތުތަކަށް ބަލާއިރު، މި މަޝްރޫޢުގެ ދަށުން ކުރިއަށްދާ ޢިމާރާތްކުރުމުގެ މަސައްކަތްތައް މިހާރު ބާރުދުވެލީގައި ދަނީ ކުރިއަށެވެ. އަދި މިހާރު މަޝްރޫޢުގެ 76 އިންސައްތަ ވަނީ ނިމިފައެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ރާއްޖޭގެ އެކި ކަންކޮޅުތަކުގައި ކުރިއަށްގެންދާ ބޯހިޔާވަހިކަމުގެ މަޝްރޫޢުތަކުގެ ތެރެއިން ތިނަދޫގައި ކުރިއަށްދާ މި މަޝްރޫޢަކީ އެ ރަށަށް ދިމާވެފައިވާ ބޯހިޔާވަހިކަމުގެ ދަތިކަމަށް ދާއިމީ ހައްލެއް ހޯދައިދިނުމުގެ މަޤްޞަދުގައި ކުރިއަށްގެންދާ މުހިންމު މަޝްރޫޢެކެވެ.

މި މަޝްރޫޢުގެ ދަށުން ޤާއިމުކުރެވޭ 200 ހައުސިންގ ޔުނިޓަކީ ޒަމާނީ ފެންވަރަށް، ޢާއިލާތަކަށް ދިރިއުޅެން ފަސޭހަވާނެ ފަދަ ޖާގަ ތަނަވަސް ގޮތަކަށް ފަރުމާކުރެވިގެން ބިނާކުރެވޭ ޔުނިޓުތަކެކެވެ. މި މަސައްކަތް އެއްކޮށް ނިމި، ރައްޔިތުންނާ ހަވާލުކުރެވުމުން ތިނަދޫގެ ގިނަ ޢާއިލާތަކަކަށް ރައްކާތެރި އަދި އުފާވެރި ދިރިއުޅުމެއް ލިބިގެންދާނެއެވެ.

ސަރުކާރުން އަމާޒު ހިފާފައިވަނީ ކަނޑައެޅިފައިވާ މުއްދަތުގެ ތެރޭގައި މި މަޝްރޫޢުގެ ހުރިހާ މަސައްކަތްތަކެއް ނިންމައި، ރައްޔިތުންނަށް އެތަންތަން ބޭނުންކުރެވޭނެ އިންތިޒާމު ހަމަޖައްސައިދިނުމަށްކަމަށް ހައުސިންގ މިނިސްޓްރީން ވަނީ ބުނެފައެވެ.