ކުރިއަށް އޮތް ސާފް ޗެމްޕިއަންޝިޕް ފުޓްބޯޅަ މުބާރާތް ސްރީލަންކާގައި ބޭއްވުމަށްޓަކައި ކުރަންޖެހޭ ރަސްމީ މަޝްވަރާތައް ފަށާފައިވާ ކަމަށް އެ ޤައުމުގެ ފުޓްބޯޅަ ފެޑެރޭޝަންގެ ރައީސް ޖަސްވަރު އުމަރު ވިދާޅުވެއްޖެއެވެ.

މިހާރު ކުރިއަށްދާ 15 ވަނަ ސާފް ޗެމްޕިއަންޝިޕްގައި ސްރީލަންކާއަށް ކުރިމަތިވި ނާކާމިޔާބީއާ ގުޅިގެން ސަޕޯޓަރުންގެ ކިބައިން މަޢާފަށް އެދިވަޑައިގެން ނެރުއްވި ބަޔާނެއްގައި ޖަސްވަރު ވިދާޅުވީ، މި މާޔޫސްކަމުން އަރައިގަނެ ޤައުމީ ޓީމު އަލުން ކޮޅަށް ޖެހުމަށް ގިނަ މަސައްކަތްތަކެއް ކުރައްވާނެ ކަމަށެވެ. އަދި ލަންކާގެ ފުޓްބޯޅަ އައު އުސްމިންތަކަކަށް ގެންދިއުމުގެ ޢަޒުމުގައި، ކުރިއަށް އޮތް މުބާރާތް އަމިއްލަ ފަސްގަނޑުގައި ހޯސްޓްކުރުމުގެ ފުރުޞަތު ހޯދުމަށް ޚާއްޞަ އިސްކަމެއް ދެއްވާނެ ކަމަށްވެސް އޭނާ ފާހަގަކުރެއްވިއެވެ.

ސާފްގެ ކޮމްޕެޓިޝަން ކޮމިޓީގެ ޗެއާމަންކަން ވެސް ކުރައްވަމުން ގެންދަވާ ޖަސްވަރު ހާމަކުރެއްވި ގޮތުގައި، ކުރިއަށް އޮތް 8 މަސްދުވަހުގެ ތެރޭގައި މި މުބާރާތް ބޭއްވުމަށް ވަނީ އަމާޒުހިފާފައެވެ. މިއީ އެ ޤައުމުގެ ޤައުމީ ޓީމަށާއި ސަޕޯޓަރުންގެ އިތުރުން މުޅި ފުޓްބޯޅަ މުޖުތަމަޢަށްވެސް ލިބިގެންދާނެ އަގުހުރި ފުރުޞަތެކެވެ. ބަންގްލަދޭޝް އަތުން 4-0 އިން ބަލިވެ މުބާރާތުން ވަކިވާން ޖެހުނީ ޓީމަށް ހެދުނު ބައެއް ގޯސްތަކުގެ ސަބަބުން ކަމަށް ޤަބޫލުކުރައްވަމުން، އޭނާ ވިދާޅުވީ އެންމެ މެޗެއްގެ ނަތީޖާއިން މުޅި ޓީމުގެ ކުރިއެރުން ފަނޑުވެގެން ނުދާނެ ކަމަށެވެ.

ވޭތުވެދިޔަ 15 އަހަރު ފީފާ ރޭންކިންގެ 200 އިން ދަށުގައި އޮތުމަށްފަހު، މިހާރު ލަންކާ ވަނީ ރޭންކިންގެ 207 ވަނައިން 184 ވަނަ މަޤާމަށް ކުރިއެރުން ހޯދާފައެވެ.

ފާއިތުވި ދެ އަހަރުގެ ތެރޭގައި ލަންކާ ޓީމުން 12 މެޗު ކާމިޔާބުކޮށް، 6 މެޗުން އެއްވަރުވެފައިވާކަން ފާހަގަކުރައްވަމުން ޖަސްވަރު ވިދާޅުވީ، މިއީ ފެށުމެއް ކަމަށާއި ދަތުރުގެ ނިމުން ނޫން ކަމަށެވެ. މީގެކުރިންވެސް މި އަހަރުގެ މުބާރާތް ބޭއްވުމުގެ ފުރުޞަތު ލަންކާއަށް ލިބުނު ނަމަވެސް، 'ހޯމް އެންޑް އަވޭ' އުޞޫލުން މުބާރާތް ރޭވުމާއި ސަރަޙައްދީ ބައެއް ޤައުމުތަކުގެ ސިޔާސީ މަސްރަޙު ހުރިގޮތުން އެކަން ކާމިޔާބުވާ ގޮތެއް ނުވިއެވެ.

އެހެންކަމުން މުބާރާތް ބަންގްލަދޭޝްގައި ބާއްވަން ނިންމިއިރު، އެންމެ ފަހުން ލަންކާއިން ސާފް ޗެމްޕިއަންޝިޕެއް ބާއްވާފައިވަނީ 2018 ވަނަ އަހަރު ދިވެހިރާއްޖެއާ ގުޅިގެންނެވެ.