ދުނިޔެއަށް ކުރިމަތިވާ އެކިއެކި މުޞީބާތްތަކާއި، އިންސާނިއްޔަތަށް ކުރިމަތިވާ ބަލިމަޑުކަމަކީ އިމްތިޙާނެއްކަމަށާއި، އެކަންކަމާ ކެރިގެން ކުރިމަތިލުމަށް މިއަދުގެ ހުކުރު ޚުތުބާގައި ގޮވާލައިފިއެވެ. މިއަދުގެ ޚުތުބާގައި ދުނިޔޭގައި އުޅޭއިރު އިންސާނުން ހިތްނޭދޭ ކަންކަން ﷲ ލައްވާފައިވަނީ އިހާލީ ޙިކުމަތަކަށްޓަކާ ކަމަށާއި، މުސްލިމް އަޅާގެ މައްޗަށް ވަނީ މިފަދަ ކަންކަމުން ޢިބްރަތް ޙާސިލްކޮށް ހެޔޮޢަމަލު ގިނަކުރުން ކަމަށް ވަނީ ފާހަގަކޮށްފައެވެ.

މީގެ އިތުރުން މުޞީބާތެއް މެދުވެރިވުމުން، އެކަމުން ރައްކާތެރިވުމަށްޓަކައި އަޅަންޖެހޭ ޞިއްޙީ ފިޔަވަޅުތަކާއި، ދީނީ އިރުޝާދުތައް ދެނެގަތުމާއެކު ކެތްތެރިކަމާއެކު ޢަމަލުތައް ބެހެއްޓުމަށް ހަނދާންކޮށްދީފައިވެއެވެ. ކީރިތި ޤުރުއާނުގެ މޫރިތި އާޔަތްތަކުން ދަލީލު ދައްކަމުން، ހިތާމައާއި، ހިތްދަތިކަމާއި، ހިތްނޭދޭ ކަންކަން ތަޙައްމަލް ކުރަން ނުޖެހޭ ބަޔަކު ނޫޅޭކަންވެސް ހަނދާނަށް ގެންނަން ޖެހޭ ކަމަށް މިއަދުގެ ހުކުރު ޚުތުބާގައި ބަޔާންކޮށްފައިވެއެވެ.

ދުނިޔެއަށް ކުރިމަތިވެފައިވާ ބަލިމަޑުކަމުން ސަލާމަތްވުމަށް އޮތް އެންމެ މުހިއްމު ފަރުވާއަކީ ދީނީ އަޅުކަންތަކަށް ފަރުވާތެރިވެ، ސާފުތާހިރުކަމަށް އިސްކަންދީ، އިސްލާމީ އަދި ސިއްހީ އަދަބުތަކަށް ސަމާލުވެ ތިބެ ޢާއްމު ޞިއްޙަތާ ބެހޭ އިދާރާތަކުން ދޭ އިރުޝާދުތަކަށް ތަބާވެ، ބޯލަނބައި އެމަގަށް އެންމެހާ މީސްތަކުންގެ ޢަމަލުތައް ބެހެއްޓުން ކަމަށް ވެސް ހުތުބާ ގައި ބަޔާންކޮށްފައި ވެއެވެ.