މޯލްޑިވިއަންގައި މަސައްކަތްކުރާ ދެ މުވައްޒަފަކަށް ތޫނު އެއްޗަކުން ހަމަލާދީ ފައިސާތަކެއް ފޭރިއްޖެއެވެ.

އައިލޭންޑް އޭވިއޭޝަނުން ބުނީ ފުވައްމުލަކު އެއާޕޯޓުގައި މަސައްކަތްކުރާ އެ ކުންފުނީގެ ދެ މުވައްޒަފުންނަށް ހަމަލާދިނީ އިއްޔެގެ ސޭލްސް ނިންމުމަށްފަހު ފައިސާ ހިފައިގެން ދަނިކޮށް ކަމަށެވެ. ތޫނު އެއްޗެއް ބޭނުންކޮށްގެން ދިން މި ޙަމަލާގައި ދެ މުވައްޒަފުން ވަނީ ޒަޚަމްވެފައެވެ. އެ ދެ މުވައްޒަފުން މިހާރުވަނީ ހޮސްޕިޓަލުން ދޫކޮށްލާފައެވެ.

ޙަމަލާދިން މީހުން ފޭރިގެންފައިވަނީ 93،850 ރުފިޔާއާއި، 448 އެމެރިކާ ޑޮލަރު ކަމަށްވެސް އައިލޭންޑް އޭވިއޭޝަނުން މަޢުލޫމާތުދެއެވެ. އެ ކުންފުނިން ބުނީ މައްސަލަ މިހާރު ފުލުހުންނަށް ހުށައަޅާފައިވާ ކަމަށެވެ.

ފުލުހުން ބުނީ ފުވައްމުލަކުގައި ފައިސާތަކެއް ހިފައިގެން އޭޓީއެމަށް ޖަމާކުރަން ދިޔަ މޯލްޑިވިއަންގެ ދެ މުވައްޒަފަކަށް، މޫނު ނިވާކޮށްގެން ތިބި ދެ މީހަކު ހަމަލާދީފައިވާ ކަމަށެވެ. އެގޮތުން ތޫނު އެއްޗަކުން ހަމަލާދީ ފައިސާތަކެއް ފޭރިގެންފައިވާ މައްސަލަ ފުލުހަށް ރިޕޯޓް ކުރީ ރޭ މެންދަމު 2:00 ހާއިރު ކަމަށް ފުލުހުން ބުނެއެވެ.

މި މައްސަލައާ ގުޅިގެން އަދި އެއްވެސް މީހަކު ހައްޔަރުކޮށްފައި ނުވާއިރު، މައްސަލަ ތަހުގީގު ކުރަމުންދާ ކަމަށް ފުލުހުން މަޢުލޫމާތުދީފައިވެއެވެ.