ކޮވިޑްގެ ޢަދަދުތައް މަދުކުރުމަށް މިހާރު މަޖުބޫރުވެއްޖެ ކަމަަށް ކުރީގެ ރައީސް މައުމޫން އަބްދުލް ޤައްޔޫމް ވިދާޅުވެއްޖެއެވެ.

ކޯވިޑް-19 އާއި ގުޅިގެން ރާއްޖޭގައި އަޅާފައިވާ ފިޔަވަޅުތަކަށް ސަރުކާރުން ބޮޑެތި ލުއިތަކެއް ދިނުމަށްފަހު އެކަމަށް މަޑުމަޑުން ގެންދަނީ ބަދަލު ގެންނަމުންނެވެ. ސަރުކާރުން އޭރު ލުއިތައް ދީފައިވަނީ، ރާއްޖޭގައި ކޯވިޑް ކޮންޓްރޯލް ކުރެވި ގިނަ ޢަދަދެއްގެ ބަޔަކު ވެކްސިންގެ ދެ ޑޯޒްވެސް ފުރިހަމަ ކުރުމާ ގުޅިގެންނެވެެ.

ކޮވިޑްގެ އާ ވޭރިއަންޓް ރާއްޖެއިން ފެނުނު ފަހުން ކޮވިޑްގެ ނަމްބަރުތައް މިހާރު ވަނީ މަޑުމަޑުން އިތުރުވާން ފަށާފައެވެ. ރައީސް އިބްރާހިމް މުހައްމަދު ޞާލިޙް ވިދާޅުވެފައިވަނީ ކުރިއަށް މިއޮތް 3 ހަފްތާއެއްހާ ދުވަހަކީ ރާއްޖޭގައި ކޯވިޑްގެ ޙާލަތު ގޯސްވެދާނެ ދުވަސްތަކެއް ކަމަށެެވެ.

ރާއްޖޭގައި ކޯވިޑް-19ގެ ޢަދަދުތައް ރެކޯޑް މިންވަރަކަށް އިތުރުވެފައިވާތީ އެކަމުގެ ކަންބޮޑުވުން ފާޅުކުރަށްވައި ސަރުކާރު ކޯލިޝަންގައި ހިމެނިވަޑައިގަންނަވާ އެމްއާރުއެމްގެ ލީޑަރު އަދި ކުރީގެ ރައީސް އަލްއުސްތާޛު މައުމޫން އަބްދުލްޤައްޔޫމް މިއަދު ވިދާޅުވީ އިއްޔެ އެކަނިވެސް 1200 މީހުން ކޮވިޑަށް ޕޮޒިޓިވް ވުމަކީ ބޮޑު ކަންބޮޑުވުމެއް ކަމަށެވެ.

"އެންމެން މަސައްކަތް ކޮށްގެން އަދަދު ތިރިކުރަން މަޖުބޫރުވެއްޖެ." ރައީސް މައުމޫން ވިދާޅުވެފައިވެއެވެ.

Covid ah alah positive vaa meehunge adhadhu iyye 1,200 ah vure mahchah araifi. Mee varah kan boduvaa adhadheh. Emmen masakkaiy kohgen adhadhu thiri kuran majubooru vehje. @presidencymv @HPA_MV

— Maumoon Abdul Gayoom (@maumoonagayoom) January 17, 2022

އެޗްޕީއޭގެ ތަފާސް ހިސާބުތައް ދައްކާގޮތުން ރާއްޖެއިން ބަލިޖެހުނު މީހުންގެ ޖުމްލަ އަދަދު މިހާރު ވަނީ 103،581 އަށް އަރާފައެވެ. އަދި އިއްޔެ އިރުއޮއްސި 6:00 އަށް އެކްޓިވް ކޭސްތައް ނުވަތަ ބަލިޖެހިފައި ތިބި މީހުންގެ އަދަދު އުޅެނީ 5،975 ގައެވެ.

ކޮވިޑް ޖެހިގެން މިހާތަނަށް ރާއްޖޭގައި ނިޔާވި މީހުންގެ އަދަދު ވަނީ 265 އަށް އަރާފައެވެ.