މިސްކިތްތައް މަރާމާތު ކުރުމަށް 15 މިލިޔަން ރުފިޔާ ކައުންސިލްތަކަށް ދޫކުރުމަށް ހަމަޖެހިފައިވާ ކަމަށް އިސްލާމިކް މިނިސްޓްރީން ހާމަކޮށްފިއެވެ.

އިސްލާމިކް މިނިސްޓްރީން މިއަދު ބުނީ ރަމަޟާންމަހާ ދިމާކޮށް މިސްކިތްތައް މަރާމާތު ކުރުމަށްޓަކައި 15 މިލިޔަން ރުފިޔާ ކައުންސިލްތަކަށް ދޫކުރުމަށް ވަނީ ހަމަޖެހިފައި ކަމަށެވެ. އެގޮތުން ކައުންސިލްތަކަށް ފައިސާދޫކުރުމަށް ހަމަޖެހިފައިވާވަރު އެ އަކުންސިލަކަށް މިހާރުވާނީ އަންގާފައި ކަމަށް މިނިސްޓްރީން މަޢުލޫމާތުދެއެވެ.

މިނިސްޓްރީން ބުނީ މިސްކިތްތައް މަރާމާތުކޮށް ނިންމުމަށްފަހު ބިލް ހުށައެޅުމުން ފައިސާ ދޫކުރާނެ ކަމަށެވެ.

"މި ފައިސާ ދޫކުރަނީ 150 ރަށުގެ މިސްކިތް މަރާމާތު ކުރުމަށް. މިސްކިތް މަރާމާތު ކުރަން ހުށަނާޅާ ވަނީ 11 ރަށަކުން." މިނިސްޓްރީން މަޢުލޫމާތު ދީފައިވެއެވެ.

އިސްލާމިކް މިނިސްޓްރީން ބުނީ ރަށްރަށުގެ މިސްކިތްތަކުގެ އިތުރުން ރާއްޖޭގެ އިތުރު 31 މިސްކިތަކަށް 1.5 މިލިއަން ރުފިޔާ ދޭން ނިންމާފައިވާ ކަމަށެވެ. އަދި މާލެ ސިޓީ ކައުންސިލަށް މިސްކިތް މަރާމާތު ކުރުމަށް 3 މިލިއަން ރުފިޔާ ދޫކޮށްފައިވާއިރު އައްޑޫ ސިޓީއަށް 3 މިލިއަން ވަނީ ދޫކޮށްފައެވެ. އޭގެ އިތުރުން ފުވައްމުލަށް ސިޓީއަށް 1 މިލިއަން ރުފިޔާ ދޫކޮށްފައިވާއިރު ކުޅުދުއްފުށި ސިޓީއަށް ދޫކޮށްފައިވަނީ 3 ލައްކަ ރުފިޔާއެވެ.

މިނިސްޓްރީން ބުނީ މިސަރުކާރުގެ 3 އަހަރު ދުވަހުގެ ތެރޭގައި މަސައްކަތް ފަށައިގެން 7 މިސްކިތް ހުޅުވާފައިވާ ކަމަށާއި 1443 ވަނަ އަހަރު އިތުރު 6 މިސްކިތް ހުޅުވަން ހަމަޖެހިފައިވާ ކަމަށެވެ.