މިއަހަރު މުޅިރާއްޖޭގައި ތިބީ 9041 ފަޤީރުން ކަމަށް އިސްލާމިކް މިނިސްޓްރީން ހާމަކޮށްފިއެވެ.

އިސްލާމިކް މިނިސްޓްރީން މިއަދު ބުނީ މިއަހަރުގެ ރަމަޟާންމަހު ފިތުރު ޒަކާތް ބަލައިގަތުމަށް ހަމަޖެހިފައިވަނީ އިސްލާމިކް މިނިސްޓްރީގެ ކައުންޓަރުންނާއި އޮންލައިން އެޕްލިކޭޝަންތައް މެދުވެރިކޮށް ކަމަށެވެ. އަދި އަތޮޅު ތެރޭގައި އެރަށެއްގެ ރަށުކައުންސިލުން ޒަކާތްބަލައިގަންނަމުންދާނެ ކަމަށް މިނިސްޓްރީން ވަނީ ބުނެފައެވެ.

މިނިސްޓްރީން ބުނީ މިއަހަރުގެ ފަޤީރުންގެ ދަފްތަރު އެކުލަވާލާ ނިމިފައިވާ ކަމަށާއި 1443 ވަނަ އަހަރު މުޅިރާއްޖޭގައި ތިބީ 9041 ފަގީރުން ކަމަށެވެ. ފާއިތުވީ 1442 ވަނަ އަހަރު ރާއްޖޭގައި ތިބީ 7778 ފަޤީރުންނެވެ. މިއަހަރު އަތޮޅު ތެރޭގައި ތިބީ 7245 ފަގީރުން ކަމަށާއި މާލޭގަ ތިބީ 1796 ފަގީރުންކަމަށްވެސް މިނިސްޓްރީން ވަނީ ބުނެފައެވެ.

"1443 ވަނަ އަހަރު ފަގީރުން އެއްގޮތަކަށްވެސް ނެތް ރަށްތަކުގެ ޢަދަދަކީ 42 ރަށް. 1442 ވަނަ އަހަރު 45 ރަށުގައި ފަގީރުން ނެތް." މިނިސްޓްރީން ހާމަކޮށްފައިވާ މަޢުލޫމާތުގައި ވެއެވެ.

ޒަކާތުގެ ފައިސާ އޮންލައިންކޮށް ދައްކަވާ ފަރާތްތަކުން މެނޫއިން ވަކި ރަށްރަށް ސެލެކްޓްކޮށްގެން ފައިސާ ދައްކަވާނަމަ އެފައިސާއެއް އެރަށެއްގެ ފަގީރުންނަށް އިސްލާމިކް މިނިސްޓްރީން ރައްދު ކޮށްދިނުމަށް ވަނީ ހަމަޖެހިފައެވެ. އެގޮތުން ވަކި ރަށްރަށަށް އޮންލައިންކޮށް ފައިސާ ދެއްކޭނެގޮތް ހަމަޖެހިފައިވަނީ ބީއެމްއެލް އޮންލައިންޕޯޓަލް، އުރީދޫ އެމްފައިސާ، ދިރާގުޕޭ، ފަހިޕޭ މެދުވެރިކޮށެވެ.

މިނިސްޓްރީން ބުނީ ރާއްޖޭގެ ހުރިހާ ރަށްތަކެއްގައިވެސް މިއަހަރު ޒަކާތް ބަލައިގަންނަމުންދާނީ އެއްރޭޓްތަކެއްގައި ކަމަށެވެ. އެގޮތުން އާދައިގެ ހަނޑުލުންނަމަ 12 ރުފިޔާ އަދި ބާސްމަތީ އާދައިގެ ހަނޑުލުންނަމަ 77 ރުފިޔާ ވަނީ ކަނޑައަޅުއްވާފައެވެ.