ދަރިންނަކީ މި ދުނިޔެމަތީގައި އަޅުގަނޑުމެންނަށް ލިބޭނެ އެންމެ ބޮޑު ނިއުމަތެވެ. ދަރިންނާއި ގާތް ކުޅުމެއް އުފައްދައި ދަރިންގެ އެންމެ ގާތް އެކުވެރިޔާއަށް ވުމަކީ ކޮންމެ ބެލެނިވެރިއަކުވެސް ބޭނުންވާ ކަމެކެވެ. އަދި ދަރިފުޅާ މައިންބަފައިންނާ ދެމެދު އޮންނަ އެކުވެރިކަމުގެ ގުޅުމަކީ އެކުދިންގެ ހެދިބޮޑުވުމަށް ވަރަށް އެދެވޭ އަސަރުތަކެއް ގެނުވާ ކަމެއް ކަމަށްވެސް ދިރާސާތަކުން ދައްކައެވެ.

ތިރީގައި މި ހިމަނާލަނީ ދަރިފުޅުގެ އެންމެ ގާތް އެކުވެރިޔާއަށް ވާން ބޭނުންނަމަ ކުރަންޖެހޭ ބައެއް ކަންކަމެވެ.

ދަރިންގެ ވާހަކަތައް ކަނުލައި އަޑުއެހުން

ދަރިފުޅު ވާހަކަ ދައްކާއިރު، އެވާހަކަތައް މެދުނުކަނޑައި ރަނގަޅަށް އަޑުއެހުމަކީ ވަރަށް މުހިންމު ކަމެކެވެ. އެކުދިންގެ ވާހަކަ ކަނުލައި އަޑުއަހައި، އެކުދިންގެ އިހުސާސްތައް ދެނެގަތުމަކީ އޭގެ ސަބަބުން ތިބާއާއި ދަރިފުޅާ ދެމެދު އޮންނަ ގުޅުން ވަރުގަދަ ވާ ކަމެކެވެ. އަދި އޭގެ ސަބަބުން ދަރިފުޅާއި ތިބާއާއި ދެމެދު އެކުވެރި ގާތް ގުޅުމެއް އުފެދި، އެކުއްޖާގެ ހަޔާތުގެ އެކި ވާހަކަތައް ތިބާއާއި ހިއްސާ ކުރަން ފަސޭހަވެއެވެ.

ދަރިންނާއެކު ވަގުތު ހޭދަކުރުން

ދަރިންނާއެކު ވަގުތު ހޭދަކުރުމަކީވެސް އެކުދިންނާއި ތިބާއާއިމެދު އޮންނަ ގުޅުން ބަދަހިވާ ކަމެކެވެ. ދަރިފުޅާއެކު ވަގުތު ހޭދަކުރުމުގެ ގޮތުން އެކުއްޖާއާއެކު ކުޅެ، ބޭރަށް ގޮސް ދެމީހުންވެސް ޝައުގުވެރިވާ ކަންތައްތައް ކުރަން ޖެހެއެވެ. މިފަދަ ކަންތައް ކުރުމުން ދަރިންނަށް އެކުދިންނަކީ ތިބާގެ ހަޔާތުގައި މުހިންމު ބައެއްކަން އިހުސާސް ކުރެވެއެވެ. އަދި އޭގެ ސަބަބުން ދަރިފުޅު ތިބާއަށް ކުރާ އިތުބާރު ބޮޑުވެ، ދަރިފުޅުގެ އެންމެ ގާތް އެކުވެރިއަކަށް ތިބާ ވެއެވެ.

ތެދުވެރިވުން

ތިބާގެ ދިރިއުޅުމުގެ ވާހަކަތަށް ދަރިންނަށް ތެދުވެރިކަމާއެކު ކިޔައިދިނުމަކީވެސް ދަރިންނާ ތިބާއާއި ދެމެދު އޮންނަ ގުޅުން ބަދަހިވާ ކަމެކެވެ. ދިރިއުޅުމުގެ ވާހަކަތައް ތެދުވެރިކަމާއެކު އެކުދިންނާ ހިއްސާ ކުރާނަމަ ދިރިއުޅުމުގައި ކުއްކުރެވޭނެ ކަން ދަރިންނަށް އެނގެއެވެ. އަދި އޭގެ ސަބަބުން އެކުދިންނަށް ކުރެވޭ ކުއްތައް ތިބާއާއި ހިއްސާކޮށް އެކަންތައް ރަނގަޅު ކުރަން މަސައްކަތް ކުރުމުގެ ގޮތުން ތިބާގެ ލަފާ ހޯދާނެއެވެ. އޭގެ ސަބަބުން ތިބާއާއި ދަރިފުޅާއި ދެމެދު އޮންނަ ގުޅުން އިތުރަށް ބަދަހިވެއެވެ.