(މިއީ ސަރުކާރުގެ ޚަބަރުގެ 1370 ވަނަ އަހަރުގެ ރަބީޢުލްއައްވަލް މަހުގެ 1 ވަނަ ދުވަހު، އާދެ! ޤައުމީ ދުވަހުގެ މުނާސަބަތުގައި ދިވެހި ދައުލަތް ހިންގެވުމާ ހަވާލުވެ ހުންނެވި އަތިރީގޭ ސުމުއްވުލްއަމީރު މުޙައްމަދު އަމީން ދޮށިމޭނާ ކިލެގެފާނު ލިޔުއްވާފައިވާ މަޒުމޫނެކެވެ. މިއީ މީގެ 75 ވަރަކަށް އަހަރު ކުރީގެ މަޒުމޫނެކެވެ. ލިޔުއްވާފައި ވަނީ މިޒަމާނާ ވެސް ގުޅޭ ނުހަނު މުނާސަބު ވާހަކަކޮޅެކެވެ.)

"ماضيގެ އެދެވޭ دورއަކަށް رمزى ހަނދާނެއް ކޮށްލަނީ.

ماضيގެ ފޮނި ރަން ހުވަފެނީ ފިލްމެއް މިރޭ ދައްކާލަނީ.

އެތަކެއް ސަތޭކަ އަހަރު ވިޔަސް، އެތަކެއް ބަދަލުމި ދޮގުން ވިޔަސް،

އެތަކެއް ފަށުން ދަރަމުން އެ ދިޔަ، شكرއޭ އަދާ ނުވެގެން ދަނީ."

ތިޔަބޭފުޅުންގެ ސަމާލުކަމަށް އަޅުގަނޑު ދަންނަވައިލާނީ، ދިވެހިރާއްޖޭގެ تاريخي ރޭތަކުގެ ތެރެއިން، އެންމެ تاريخي، އެއް ރޭގެ މައްޗަށެވެ. 981 ވަނަ އަހަރުގެ بركاتތެރި ربيع الأول މަހުގެ 1 ވަނަ ރެއިގެ މައްޗަށެވެ.

އެތައް ސަތޭކަ އަހަރެއް ވަންދެން، ދިވެހީންގެ فخر އެއްކަމުގައިވި މިނިވަންކަން ވަނީ، ގެއްލި ވިއްސިވިހާލިވެފައެވެ. ވަކިވެ، ވެއްޔާއި މޮޑެވިފައެވެ. ހަތަރު ސަތޭކަ ތިރީސްތިން އަހަރު ވަންދެން، ރާއްޖޭގެ سلامة އެއް ކަމުގައިވި މާތް ދީން، ރާއްޖެއިން ވަކިވެގެން ހިނގައިދާނޭކަމުގެ ހިތާމަވެރި منظر ތަކުން، އުދަރެސް ވަނީ، އަނދިރިވެ ނާމާންވެފައެވެ. ރާއްޖޭގެ އެއްބިތުން އަނެއްބިތައް ހިނގަނީ، ބޭރު دولة އެއްގެ ބާރާއި އާރެވެ. ރަސްކަންކުރަނީ، ގޮށްމުށުބާރާއި، އަނިޔާވެރިކަމެވެ. ނަހަމައާއި بے انصافއެވެ.

ކަރުހިއްކައިގެންފައިވާ މީހަކު، ފިނި ފެންފޮދަކަށް އެދޭ މިސާލުގައި، حالގެ ދުލުން ދިވެހިރާއްޖެ އެދިއެދި އޮތީ ދިވެހި ދަރިއަކަށެވެ. ދިވެހި قوم ގައި، އެޅިފައިވާ އަޅުވެތިކަމުގެ ކަސްތަޅުތައް، މުގުރައި ކުދިކުދިކޮށްލާނޭ ދިވެހި ދަރިއަކަށެވެ. قوم އަށްޓަކައި، ވަޒަނަށްޓަކައި، قربان ވާނޭ ހަރުދަނާ بطل އަކަށެވެ. ...... مجيبވަންތަ ރަސްކަލާނގެ އެފަދަ، އަގުހުރި، އެފަދަ ހިތްވަރުގަދަ، ދިވެހި ދަރިއެއް ދެއްކެވީ، އެދެވޭ އެންމެ ފުރިހަމަ ގޮތުގައެވެ. نتيجة އެއްގެ ގޮތުން ރާއްޖޭގެ ކޯއްޓޭތަކުގައި އަނެއްކައިވެސް ވިހުރުވޭން ފެއްޓީ، މިނިވަންކަމުގެ އަގުމާތް ދިދައެވެ. ރާއްޖޭގެ ބަގީޗާތަކުން ދަތިވެ ފޮޅޭން ފެއްޓީ، حرية ގެ މާމެލާމެއްޔެވެ.

شكر ގެ حق ވެރިޔަކީ، مباركبادى ގެ ރައްދުވެރިޔަކީ، ދެންނެވުމުގެ އެއްވެސް ބޭނުމެއްވޭތޯއެވެ؟ .... އުތީމު الخطيب حسين تكرفانންގެ محمد ألغازي ސިރީ ސަވާދީއްދަ މަހާރަދުންނެވެ. ދިވެހި تاريخ ގެ ދުވަހަކު ވެސް ފަނޑުވުމެއް ނުވާނޭ محمد تكرفان الأعظم އެވެ.

އާދޭހެވެ! މިރެއަކީ، ربيع الأول މަހުގެ 1 ވަނަ ރެއެވެ. محمد تكرفان الأعظم، ދިވެހިރާއްޖެ سلامة ކުރެއްވި ރެއެވެ. އެރެއަށްޓަކައި، އަޅުގަނޑުމެން فخرވެރިވާ، އަޅުގަނޑުމެންގެ قومي ރެއެވެ. މާދަމައަކީ، ربيع الأول މަހުގެ 1 ވަނަ ދުވަހެވެ. އަޅުގަނޑުމެންގެ قومي ދުވަހެވެ.

ދިވެހިރާއްޖޭގައި ހިނގަމުންދިޔަ، އަނދިރި އަނދިރީންގެ އަނިޔާވެރިކަން، ހަނދާންކޮށްލުމަކަށް އަޅުގަނޑު ހުއްޓުންއަރުވައެއް ނުލާނަމެވެ. ދިވެހިރާއްޖެ سلامة ކުރެއްވުމުގައި، ބޮޑުތަކުރުފާނާއި، އޭނާގެ އެކުވެރީން، ثابتކުރެއްވި ހިތްވަރާއި، ފަންވަރުގެ މައްޗަށް تعريفގެ جزي އެއް، އަދާކުޅައުމަކަށް އަޅުގަނޑު قصد އެއްނުމެކުރަންމެއެވެ. ކަޅުއޮށްފުންމީގެ، عجائب ވުން އެކަށީގެންވާ ފަދަ، ދަތުރުތަކުގެ މައްޗަށް އަލިއަޅުވާލުމުގެ އެދުމެއްނުމެ ނެތްމެއެވެ. ... އާދޭހެވެ! އެހުރިހައި ކަންތަކަކީ، ތިޔަބޭފުޅުންނާއި ތިޔަބޭކަލުން ދެނެވަޑައިގަންނަވާ ކަންތައްތަކެވެ. އެކަންކަމުގެ މައްޗަށް فخرވެރިވެވަޑައިގަންނަވާ ކަންކަންމެއެވެ.

فخرވެވަޑައިގަންނަވާ ކަންކަމޭތޯއެވެ؟ ކަމެއްގެ މައްޗަށް ފަޚުރުވެރިވުމަކީ ކޮބައިތޯއެވެ؟ حقيقةގައި ކަމެއްގެ މައްޗަށް فخرވެރިވުމަކީ، އެކަމަށްޓަކައި ތިމާ فخرވެރިވާ ކަމެއް ދެމިއޮވޭތޯ، إخلاصތެރިކަމާއި އެކު މަސައްކަތްކުޅައުމެވެ. އަބަދުގެ އަބަދަށް ދިވެހި تاريخ ހެކިދޭނެއެވެ. ބޮޑުތަކުރުފާނު އޭނާގެ واجب އަދާކުރެއްވީ ފަނޑުވުންނުވާނޭ އަކުރުތަކަކުން، ދިވެހި އުދަރެހުގައި دائمي ގޮތެއްގައި، އޭނާގެ ނަންފުޅު ލިޔެވިފައި އޮންނާނޭ ފަދަ މަތިވެރި ގޮތުގައެވެ. އަޅުގަނޑުމެންނާއި ހަމަޔަށް އޭނާ ވާރުތަކުރެއްވީ، فخرވެރި ނަންފުޅެކެވެ. އަޅުގަނޑުމެންނަށް ޓަކައި އޭނާ سلامة ކުރެއްވީ، އަޅުގަނޑުމެންގެ މާތް دين އާއި قوم ގެ މިނިވަންކަމެވެ.

އަޅުގަނޑުމެންގެ مقدس واجب އޮޅޭހުށީ، އަޅުގަނޑުމެންގެ ތެރެއިން ކާކަށްތޯއެވެ؟ އަޅުގަނޑުމެންގެ واجب އަކީ، "ފުރަންޖެހެންދެން މި ފެންނަ وطن ން" ދިވެހި قوم އަށް خدمة ކުރުން މަތީ ދެމިތިބުމެވެ. އެ ދަރިއެއްގެ لياقة އާއި قابلية ތަންދިން މިންވަރެއްގެ މަތީން خدمة ކުރުން މަތީ ދެމިހުރުމެވެ. އެމީހެއްގެ مقام ނިޔާކުރާ ގޮތެއްގެ މަތީން خدمة ކުރުން މަތީ ދެމިހުރުމެވެ. .........

ޝައްކެއް ވަސްވާހެއްނެތެވެ! އަދި އަޅުގަނޑުމެންގެ واجب އަކީ، "އިސްވެދިޔަ ماضيގެ ފަރުދާތައް އެކީގައި كشف ކޮށް" ވިސްނުމަށް ގެނެވޭ خيالي منظر ތަކުން عبرة حاصلކުޅައުމެވެ. "ތޫނުފިލި މިނިވަން دفاع ން، ديب މިންޖުކުރެއްވުމުން" قوم އަށް ލިބުނު شرف އާއި عزة ހަނދާންކުޅައުމެވެ. "ދިވެހީންގެ قومي ނައު އަލުން مصراب އަކަށް އެނބުރުއްވި މާތް" زعيم ންގެ "شخصية ގެ ވަރުގަދަކަމާއި، فهم އާއި ވިސްނުންތެރިކަމަށް" حق ވެގެންވާ شكر ގެ جزي ތައް އަދާކުރަމެވެ. ނަމަވެސް، ............

އަޅުގަނޑުމެންގެ މިއަދުގެ واجب އަކީ، ހަމައެކަނި އެއީ ކަމުގައި، ވިޔަނުދެމާ ހިންގަވާށެވެ. އާދޭހެވެ! އަޅުގަނޑު تكرار ކޮށް ދަންނަވަމެވެ. އަޅުގަނޑުމެންގެ މިއަދުގެ واجب އަކީ، ހަމައެކަނި ماضيގެ أبطال ންނަށް شكر ގެ جزي ތައް އަދާކުޅައުމެއްނޫނެވެ. އެބޭފުޅުންނާއި، އެބޭކަލުން، ފައްޓަވައިފައިވާ މަތިވެރި މަސައްކަތް ދެމެހެއްޓުމަށް އާ ޢަޒުމްތައް ކަނޑައެޅުމެވެ. އާދޭހެވެ! އާ عزم ތައް ކަނޑައެޅުމާއެކު އެ عزم ތަކަށް عملي ސިފަ ގެނައުމެވެ.

އަދު ދިވެހި قوم ގެ حال ގެ ދުލުން، އެގޮވާ ގޮވުންތަކަށް عملي جواب އެއްދިނުމަކީ، ކޮންމެ ދިވެހި ދަރިއެއްގެ ވާޖިބެއްކަން ކަށަވަރެވެ. ރާއްޖޭގެ ދަރީންގެ ހިތްވަރަށާއި، މިންނަތަށް އެހީތެރިކަމަށާއި خدمة އަށް، ދިވެހި قوم ބޭނުންވެފައިވަނީ، ދުވަހަކުވެސް ބޭނުންނުވާ ފަދަ މަތިވެރި ދަރަޖައަކަށެވެ. .... މަސްވެރިކަމުގެ ދަނޑުގައެވެ. ގޮވާމުގެ ދަނޑުގައެވެ. ރުއްގަސް ހެއްދުމުގެ ދަނޑުގައެވެ. دولة ހިންގުމުގެ ميدان ތަކުގައެވެ.

މިއަދުގެ بركات ތެރިކަމުން، بركات حاصل ކޮށްގެން، خدمة ގެ އަތުކުރި އޮޅައިލަމާ ހިންގަވާށެވެ. قوم އަށް خدمة ކުޅައުމަކީ، ކޮންމެ ދިވެހި ދަރިއެއްގެ އެންމެ މަތިވެރި އުހައުކަމުގައި ހަދަމާ ހިންގަވާށެވެ.

އާދޭހެވެ! އަޅުގަނޑުމެންގެ ކާބަފައިންނަށްޓަކައި އަޅުގަނޑުމެން فخر ވެރިވަމެވެ. ދިވެހި قوم ގެ ماضي ގެ މަތިވެރިކަމުން، އަޅުގަނޑުމެން عبرة حاصل ކުރާނޫއެވެ. ماضي ގެ حقيقي މަތިވެރި ކަމަކީ، مستقبل ގެ އުޖާލާ ވިދުވަރުކަމެއް، އަޅުގަނޑުމެންގެ ހިތަކުން ކެހިގެންދިޔަކަ ނުދޭނޫއެވެ. ހައްދަވާ ބޮޑުކުރެއްވި ރަސްކަލާނގެ ކިބަފުޅުން، އެދުމުގެ ކޮޅެއްނެތް ކޮޅަށް އަޅުގަނޑު އެދެނީ، އަޅުގަނޑުގެ عمر ގެ ކޮޅަށް قومي خدمة ގެ މަތީގައި ދެމެހެއްޓެވުމެވެ. އާދޭހެވެ! އަޅުގަން ކުރާނީ دعا އެވެ. إجاب ކުރައްވާނީ مجيب ވަންތަ ރަސްކަލާނގެއެވެ.

ތިޔަ އެންމެ ބޭފުޅުންނަށާއި އެންމެ ކަލުންނަށް އެންމެ ކަނބަލުންނަށާއި އެންމެ ކުދީންނަށް އުފައުވެރި ބާއްޖަވެރި قوي ދުވަހެކެވެ.