މޯލްޑިވްސް މީޑިއާ ކައުންސިލާއި ބްރޯޑްކާސްޓިންގ ކޮމިޝަން އުވާލައި، މީޑިއާ އެންޑް ބްރޯޑްކާސްޓިންގ ކޮމިޝަންގެ ނަމުގައި އައު ކޮމިޝަނެއް އުފެއްދުމަށް ރައްޔިތުންގެ މަޖިލީހަށް ބިލެއް ހުށަހަޅައިފިއެވެ.

ސަރުކާރުގެ ފަރާތުން ރައްޔިތުންގެ މަޖިލީހަށް މިބިލު ހުށައެޅުއްވީ ތުޅާދޫ ދާއިރާގެ މެންބަރު ޢަބްދުލްޙަންނާން ޢަބޫބަކުރެވެ.

ހަންނާނު ހުށައެޅުއްވި މި ބިލުގެ މަގްސަދެއް ކަމުގައި ބުނެފައިވަނީ ނޫސް މަޖައްލާ ރަޖިސްޓްރީކުރުމަށް ލުއި ފަސޭހަ އަދި ހަރުދަނާ މިންގަނޑުތަކެއް ކަނޑައަޅުމާއި ބްރޯޑްކާސްޓިންގ ދާއިރާ އާއި މީޑިއާގެ އެންމެހާ ކަންކަން ތަންފީޒުކުރުމަށް ވަކި މުއައްސަސާއެއް ޤާއިމުކުރުން ކަމަށެވެ.

އެގޮތުން އަލަށް އުފައްދާ ކޮމިޝަންގެ ނަމަކީ މޯލްޑިވްސް މީޑިއާ އެންޑް ބްރޯޑްކާސްޓިންގ ކޮމިޝަނެވެ. އަދި އެ ކޮމިޝަން ވެގެންދާނީ މިނިވަން ގާނޫނީ ޝަހުސަކަށް ކަމަށް ބިލުގައި ބަޔާންކޮށްފައި ވެއެވެ.

މި ބިލު ގާނޫނަކަށްވުމާއެކު މިހާރު ހިންގަމުންދާ މޯލްޑިވްސް މީޑިއާ ކައުންސިލާއި މޯލްޑިވްސް ބްރޯޑްކާސްޓިންގ ކޮމިޝަން އުވިގެންދާނެއެވެ. އަދި އެ ދެ ކޮމިޝަނުގެ މިހާރުގެ މަސްއޫލިއްޔަތުތަކާއި އިމާރާތްތަކާއި ބިމާއި މުދަލާއި ފައިސާ އާއި ވަސީލަތްތައް އަދި މުވައްޒަފުން އަލަށް އުފެދިގެންދާ ކޮމިޝަނަށް ބަދަލުވާނެއެވެ.

އަލަށް އުފައްދާ ކޮމިޝަނުގައި 7 މެންބަރުން ތިއްބަވާއިރު، އޭގެތެރެއިން 4 މެންބަރުންނަކީ މަޖިލީހުގެ ރުހުމާއެކު ރައީސުލްޖުމްހޫރިއްޔާ އައްޔަން ކުރަށްވާ މެމްބަރުންނެވެ. އަދި ދެން ތިއްބަވާ 3 މެންބަރުން އިންތިޚާބު ކުރާނީ މީޑިއާތަކުންނެވެ. ކޮމިޝަނަށް މެންބަރުން އައްޔަންކުރާނީ 5 އަހަރުގެ ދައުރަކަށެވެ.

އޭގެ އިތުރުން ކޮމިޝަނުގެ ރައީސާއި ނައިބު ރައީސް އައްޔަން ކުރަށްވާނީ މަޖިލީހުގެ ރުހުމާއެކު ރައީސުލްޖުމްހޫރިއްޔާކަމަށް ބިލުގައި ވަނީ ބަޔާންކޮށްފައެވެ.