ސަރުކާރާއި އަމިއްލަ ފަރާތްތަކާ ދެމެދު ވެފައިވާ އެއްބަސްވުންތަކާ ގުޅިގެން އުފެދިފައިވާ މައްސަލަތައް ހައްލުކުރުމުގައި އަމަލުކުރާނެ ގޮތުގެ އުސޫލުގެ ދަށުން ކުރީ ސަރުކާރުން ސޮއިކޮށްފައިވާ ބަދަލުދިނުމުގެ 9 މައްސަލައެއް ބާތިލުކޮށްފި އެވެ.

ބަންޑާރަނާއިބުގެ އޮފީހުން މިރޭ ބުނީ ކުރީ ސަރުކާރުން ބަދަލުގެ ގޮތުގައި ފައިސާއާއި ގިނަ ރަށްތަކާއި ފަޅެއް އެކިފަރާތްތަކަށް ދީފައިވާ ކަމަށެވެ.

އެގޮތުން ކުރީސަރުކާރުން އެކިފަރާތަތަކަށް ބަދަލުގެ ގޮތުގައި ދިން ރަށްތަކުގެ ތެރޭގައިި ނ. އެކުޅިވަރު، ތ. އަތޮޅު ވަންބަދި، ކަނި އަދި ފުށިީގެ އިތުރުން އއ. މަޑޫގައްޔާއި ރ. ވިލިނގިއްޔާއި ތާވަތާގެ އިތުރުން ހދ. ހޮނޑާފުށި، ހދ. މުރައިދޫ، ނ. އޮރިމަސް ހިމެނެ އެވެ.

ހަމައެއާއެކު އއ. މާފަރު ފަޅުވެސް ބަދަލުގެ ގޮތުގައި ކުރީސަރުކާރުން ކުންފުންޏަކަށް ދީފައިވެއެވެ. އަދި ކުރީ ސަރުކާރުން ބަދަލުގެ ގޮތުގައި ދިން ފައިސާގެ އަދަދުގެ ޖުމްލަ 95.1 މިލިއަން ރުފިޔާ އަށް އަރާ ކަމަށްވެސް ބަންޑާރަނާއިބުގެ އޮފީހުން މިރޭ ބުނެފައިވެއެވެ.

އޭގެިއތުރުން ސަރުކާރާއި އަމިއްލަ ފަރާތްތަކާ ދެމެދު ވެފައިވާ އެއްބަސްވުންތަކާ ގުޅިގެން އުފެދިފައިވާ މައްސަލަތައް ޙައްލުކުރުމުގައި ޢަމަލުކުރާނެ ގޮތުގެ އުސޫލަކީ ޤާނޫނީ ހައިސިއްޔަތާއި ބާރު ލިބިގެންނުވާ އުސޫލެއް ކަމަށާއި، އެ އުސޫލަކީ ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީއާއި، ޤާނޫނާ ޚިލާފަށް އެކުލަވާލާފައިވާ އުސޫލެއްކަމަށް ބަންޑާރަނާއިބުގެ އޮފީހުން ބުނެފައިވެއެވެ.

އަދި އެއުސޫލުގެ ދަށުން ސޮއިކޮށްފައިވާ 9 ސެޓްލްމަންޓް އެއްބަސްވުމަކީ ބާޠިލް އެއްބަސްވުންތަކެއް ކަމަށްވެސް ބަންޑާރަނާއިބުގެ އޮފީހުން މިރޭ ވަނީ ބުނެފައެވެ.