ބިންވެރިޔާ ސްކީމަކީ ބަޔަކު ސިޔާސީ މަންފާއަށްޓަކައި ހިންގަން ފެށި ބޮޑު ސްކޭމެއް ކަމަށް ކުރީގެ ޕްރޮސެކިއުޓާ ޖެނެރަލް މުހުތާޒު މުހުސިން ވިދާޅުވެއްޖެއެވެ.

މިއަދު އެކްސްގައި ހިއްސާ ކުރެއްވި ޕޯސްޓެއްގައި މުހުތާޒު ވިދާޅުވީ "ބިންވެރިޔާ" އަކީ ގާނޫނީ ގޮތުން އުފެދުމުގައިވެސް ބާތިލް ސްކީމެއް ކަމަށެވެ. އަދި އެއީ ބަޔަކު ސިޔާސީ މަންފާއަށް ހިންގަންފެށި ބޮޑު ސްކޭމެއް ކަމަށްވެސް މުހުތާޒު ވިދާޅުވިއެވެ.

މީގެ އިތުރުން އެއީ ގެދޮރުވެރިކަމަށް ބޭނުން ޖެހިފައިވާ ރައްޔިތުންނަށް ކޮށްފައިވާ މަލާމާތެއް ކަމަށާއި، އެއީ ގާނޫނާއި ހިލާފު އުސޫލެއްގެ ތެރެއިން ބަޔަކު ވެފައިވާ ބޮޑު ހިޔާނާތެއް ކަމަށްވެސް އެކްސްގައި ހިއްސާ ކުރެއްވި ޕޯސްޓުގައި މުހުތާޒު ވިދާޅުވިއެވެ.

"ބިންވެރިޔާ" އަކީ ގާނޫނީ ގޮތުން އުފެދުމުގައި ވެސް ބާތިލު ސްކީމެއް. އެއީ ބަޔަކު ސިޔާސީ މަންފާއަށް ހިންގަންފެށި ބޮޑު ސްކޭމެއް. އެއީ ގެދޮރުވެރިކަމަށް ބޭނުންޖެހިފައިވާ ރައްޔިތުންނަށް ކޮށްފައިވާ މަލާމާތެއް. އެއީ ގާނޫނާއި ޚިލާފް އުސޫލެއްގެ ތެރެއިން ބަޔަކު ވެފައިވާ ބޮޑު ޚިޔާނާތެއް.

— Muhuthaz Muhusin🇲🇻🇵🇸 (@Muhuthaz) December 23, 2024

މުހުތާޒު މިހެން ވިދާޅުވެފައި މިވަނީ ބިންވެރިޔާ ސްކީމުގައި ނުހިމެނޭ ބަޔަކަށް ގޯތި ދިން ކަމަށް ބުނާ މައްސަލައެއް ފެންމަރިވެފައި ވަނިކޮށެވެ.

މި މައްސަލައާ ގުޅިގެން އެޗްޑީސީގެ ކުރީގެ މެނޭޖިން ޑިރެކްޓަރު ފަޒުލް ރަޝީދު ހިމެނޭ ގޮތަށް އެކުންފުނީގެ ޑިރެކްޓަރުންގެ ބޯޑުގެ ހުރިހާ މެމްބަރުން މިދިޔަ ބުރާސްފަތި ދުވަހު ވަނީ ސަސްޕެންޑު ކޮށްފައެވެ.

އޭގެ ފަހުން ފަޒުލް ވަނީ އެ މަގާމުން އިސްތިއުފާވެސް ދެއްވާފައެވެ.

މިހާރު މި މައްސަލައިގެ ޖިނާއީ ތަހުގީގެއް ފުލުހުންނާއި އޭސީސީއިން ގުޅިގެން ވަނީ ފަށާފައެވެ.