ރާއްޖޭގެ މައި އެއާޕޯޓް، ވެލާނާ އިންޓަނޭޝަނަލް އެއާޕޯޓު (ވީއައިއޭ) ގެ ތަރައްގީއަށް އަބޫދާބީ ފަންޑް ފޮ ޑިވެލޮޕްމަންޓް (އޭޑީއެފްޑީ) އިން އިތުރު 40 މިލިއަން ޑޮލަރު (616 މިލިއަން ރުފިޔާ) ގެ ލޯނެއް ސަރުކާރުން ނަގައިފިއެވެ.

އަބޫ ދާބީގައި ބޭއްވި ހާއްސަ ރަސްމިއްޔާތެއްގައި މި އެއްބަސްވުމުގައި ރާއްޖޭގެ ފަރާތުން ސޮއިކުރެއްވީ ފިނޭންސް މިނިސްޓަރު މޫސާ ޒަމީރެވެ.

މި ރަސްމިއްޔާތުގައި އަބޫދާބީ ފަންޑުގެ ޑިރެކްޓަރ ޖެނެރަލް މުހައްމަދު ސައިފް އަލް ސުވައިދީ ވިދާޅުވީ މިއީ ރަހުމަތްތެރި ގައުތަކުގައި އުމްރާނީ ތަރައްގީ އަށް އަބޫދާބީ ފަންޑުން އަދާކުރަމުން އަންނަ މުހިންމު ދައުރު ހާމަވާ ކަމެއް ކަމަށެވެ. އެގޮތުން ވީއައިއޭގެ ތަރައްގީ އަށް އިިތުރަށް ދޭ ލޯނުން އެ އެއާޕޯޓް ޒަމާނީ ކުުރެވުމަކީ ރާއްޖެއަށް ލިބޭނެ ބޮޑު ކުރިއެރުމެއް ކަމަށް އޭނާ ވިދާޅުވި އެވެ.

މިނިސްޓަރ ޒަމީރު ވަނީ ރާއްޖޭގެ ތަރައްގީ އާއި ކުރިއެރުމަށް އަބޫދާބީ ފަންޑުން ޒަމާނުއްސުރެ ފޯރުކޮށް ދެމުން އަންނަ އެހީ ފާހަގަ ކުރައްވައި ޝުކުރު އަދާކުރައްވައިފަ އެވެ. އެގޮތުން މިނިސްޓަރ ވިދާޅުވީ ވީއައިއޭގެ ތަރައްގީގެ މަޝްރޫއާ އެކު، ގައުމީ ތަރައްގީގެ ލަނޑުދަނޑިތައް ހާސިލުކުރަން މަގުފަހިވެ، ޓޫރިޒަމުން ލިބޭ އާމްދަނީ އެތައް ގުނައެއް ވެސް އިތުރުވާނެ ކަމަށެވެ.

ސަރުކާރުން އަންނަނީ އަންނަ އަހަރަށް ވީއައިއޭގެ އާ ޓާމިނަލް މަޝްރޫއު ނިންމުމަށް މަސައްކަތް ކުރަމުންނެވެ. އެގޮތުން މި ޓާމިނަލް އެއްކޮށް ބޭނުން ކުރަން ފެށުމުން އަހަރަކު ގާތްގަނޑަކަށް 7.5 މިލިއަން ދަތުރުވެރިންނަށް ހިދުމަތް ދެވޭނެ އެވެ.

ވީއައިއޭ ތަރައްގީގެ މަޝްރޫއު އަވަސްކުރަން އަބޫދާބީ ފަންޑުން މީގެ ކުރިން ވެސް 50 މިލިއަން ޑޮލަރު (771 މިލިއަން ރުފިޔާ) އަދި ސައުދީ ފަންޑުން 180 މިލިއަން ޑޮލަރު (2.8 ބިލިއަން ރުފިޔާ) ސަރުކާރުން ނަގާފައިވެ އެވެ.