ކުޑަކުދިން ހެދިބޮޑުވާއިރު އެކުދިންގެ އުމުރާ އެއްވަރަށް ރަނގަޅު ގޮތުގައި ބޮޑުވާނީ އެކުދިންނަށް ބޭނުންވާ ހުރިހާ ނިއުޓްރިއެންޓުތަކެއް ލިބުމުންނެވެ. އަދި ކާބޯތަކެތީގެ ޒަރިއްޔާގައި އެ ނިއުޓްރިއެންޓުތައް އެކުދިންނަށް ދިނުމަކީ ބެލެނިވެރިންގެ ޒިންމާއެކެވެ. މިއީ އެކުދިން ދުޅަހެޔޮ ސިއްހަތެއްގައި ބަހައްޓަން ބޭނުންވާނަމަ ކޮންމެހެންވެސް ކުރަން ޖެހޭ ކަމެކެވެ.

ތިރީގައި މި ހިމަނާލަނީ ދަރިފުޅުގެ ސިއްހަތު ރަނގަޅު ކުރުމަށްޓަކައި އެކުދިންނަށް ބޯން ދޭން ޖެހޭ ބުއިންތަކެވެ.

ފެން

ހެދިބޮޑުވަމުން އަންނަ ކުދިންނަށް މުޅި ދުވަހު ބޭނުންވާ ވަރަށް ފެން ދިނުމަކީ ވަރަށް މުހިންމު ކަމެކެވެ. ގިނައިން ފެން ދިނުމުން އެކުދިންގެ ހަޖަމުގެ ނިޒާމުގެ މަސައްކަތްތައް ރަނގަޅަށް ކުރިއަށްދެއެވެ. އަދި އެކުދިންނަށް ބޭނުންވާ ހަކަތަ ލިބި، އެކުދިން ހެދިބޮޑުވުމުގައިވެސް އެހީވެއެވެ.

ކިރު

ކިރަކީ އޭގައި ގިނަ އަދަދަކަަށް ކެލްސިއަމް އާއި ވިޓަމިން ޑީ ހިމެނޭ އެއްޗަކަށްވީއިރު މިއީ ކުޑަކުދިންނަށް ވަރަށް ބޭނުންތެރި މާއްދާތަކެކެވެ. މިއީ އެކުދިންގެ ކަށިތަކާއި ދަތްތައް ވަރުގަދަ ކުރުމުގައި އެހީވެދޭ މާއްދާތައް ކަމުން ދަރިން ބޮޑެތި ވާއިރު އެކުދިންނަށް ކިރު ބޯން ދިނުމަކީ ވަރަށް މުހިންމު ކަމެކެވެ.

މޭވާ ޖޫސް

ކުޑަކުދިންނަށް ތަފާތު އެކި ބާވަތްތަކުގެ ތާޒާ މޭވާތަކުން ޖޫސް ގިރާފައި ބޯން ދިނުމަކީވެސް ވަރަށް މުހިންމު ކަމެކެވެ. މޭވަތަކަކީ އޭގައި ތަފާތު އެކިކަހަލަ ވިޓަމިނާއި މިނަރަލްތައް ހިމެނޭ ބާވަތްތަކެވެ. އެހެންކަމުން މޭވާ ޖޫސް ދިނުމުން އެކުދިންގެ ހަށިގަނޑަށް ބޭނުންވާ ނިއުޓްރިއެންޓުތައް ލިބި އެކުދިންގެ މެޓަބޮލިޒަމް ރަނގަޅު ވެއެވެ.

މަސްދަރު: ފަސްޓުޕޯސްޓު.