ދުބާއީގެ ކުންފުންޏަކުން ހދ. ހަނިމާދޫ ކައިރީގައި 598 މިލިއަން ޑޮލަރު ހަރަދުކޮށްގެން ބޮޑު ރިސޯޓެއް ހަދަން ނިންމައިފިއެވެ.

ހަނިމާދޫ ކައިރީގައި މި ރިސޯޓު ހަދަން ނިންމާފައި ވަނީ ދުބާއީގެ އެންމެ ކުރިއަރާފައިވާ ރިއަލް އެސްޓޭޓް ކުންފުނި، ސަމަނާ ޑިވެލޮޕާސް އިންނެވެ. ބޮޑު އިންވެސްޓުމެންޓަކާ އެކު ރިސޯޓެއް ތަރައްގީ ކުރަން ނިންމައި އެކަން އިއުލާނުކޮށްފައި ވަނީ ބުރާސްފަތި ދުވަހު އެވެ.

ދުބާއީގެ މަދީނަތު ޖުމެއިރާގައި ބޭއްވި ރަސްމިއްޔާތެއްގައި މި ޕްރޮޖެކްޓް ވަނީ އިފްތިތާހުކޮށްފައެވެ.

ބޮޑު ހަރަދެއް ކޮށްގެން ތަރައްގީކުރާ މި ރިސޯޓުގައި 109 ލަގްޒަރީ ރެސިޑެންޝަލް ރޫމު ހުންނައިރު، އޭގެތެރޭގައި ބީޗް ފްރޮންޓް ވިލާ އާއި، އޯވަ ވޯޓާ ބަންގަލޯގެ އިތުރުން ޕޫލް ސައިޑް އެޕާޓްމެންޓްތައް ވެސް ހުންނާނެ އެވެ. އެގޮތުން މި ރިސޯޓުގެ ހުރިހާ ރޫމެއް ވެސް ހެދުމަށް ނިންމާފައިވަނީ ރާއްޖޭގެ ގުދުރަތީ ރީތިކަން ދައްކުވައިދޭ ފަދަ ގޮތަކަށެވެ.

ލުބްނާނަށް ނިސްބަތްވާ އެލީ ސާބް ގްރޫޕުން މި ރިސޯޓުގެ ޑިޒައިނިންގެ މަސައްކަތްތައް ކުރުމަށް ހަމަޖެހިފައިވާއިރު މި ޕްރޮޖެކްޓުގެ މަސައްކަތް 2029 ގެ ނިޔަލަށް ނިންމުމަށް ވަނީ ހަމަޖެހިފަ އެވެ.