ބޮލީވުޑްގެ މަޝްހޫރު ތަރި އަކްޝޭ ކުމާރުގެ ފިލްމު "ސްކައި ފޯސް" މެދުއިރުމަތީގެ ވަރަށް ގިނަ ގައުމުތަކުގައި "ބޭން" ކޮށްފައިވާ ކަމަށް މީޑިއާތަކުން ރިޕޯޓު ކޮށްފިއެވެ.

މި ފިލްމަކީ މިއަހަރު އެންމެ ފުަރަތަމަ ނެރުނު ބޮޑު ފިލްމު ކަމަށްވީއިރު މި ފިލްމު ނެރެފައިވަނީ އިއްޔެގެ ވަގުތެއްގައެވެ. މި ފިލްމަކީ ވަރަށް ބޮޑު ރިލީޒް އަކަށްވީއިރު މި ފިލްމު ދުނިޔޭގެ އެކި ކަންކޮޅުތަކުގެ ތިއޭތަރުތަކުގައި އެޅުވުމަށް ވަނީ ނިންމާފައެވެ.

ނަމަވެސް ބޮލީވުޑް ހަންގާމާގައިވާ ރިޕޯޓެއްގައި ބުނެފައިވަނީ މެދުއިރުމަތީގެ ގިނަ ގައުމުތަކުގައި މި ފިލްމު އެޅުވުން މަނާ ކޮށް "ބޭން" ކޮށްފައިވާ ކަމަށެވެ. އޭގެ ތެރޭގައި ޔޫއޭއީ، ސައުދި އަރަބިއާ، ގަތަރު އަދި އޮމާން ފަދަ ގައުމުތައް ހިމެނެއެވެ.

މި ގައުމުތަކުގައި ފިލްމު "ބޭން" ކުރަން ޖެހުނު ސަބަބެއް އަދި ދެނެގަނެވިފައި ނުވާކަމަށް ރިޕޯޓުގައި ވެއެވެ. ނަމަވެސް ލަފާ ކުރެވޭ ގޮތުގައި އެގައުމުތަކުން މި ފިލްމު އެޅުވުން މަނާ ކޮށްފައިވަނީ މި ފިލްމުގައި ޕާކިސްތާނާއި އިންޑިއާ އާ ދެމެދު ހިނގާފައިވާ ހަމަނުޖެހުމުގެ މައްސަލަތައް ކޮންމެވެސް ވަރަށް ދައްކާތީ ކަމަށް ރިޕޯޓުގައި ވެއެވެ. މީގެ ކުރިންވެސް މި ގައުމުތަކުން ވަނީ މިފަދަ މައްސަލަތަކުގެ މައްޗަށް ބިނާކޮށް ހަދާ ފިލްމުތައް "ބޭން" ކޮށްފައެވެ.

"ސްކައި ފޯސް" ގެ ކާސްޓުންގެ ތެރޭގައި އަކްޝޭގެ އިތުރުން ސާރާ އަލީ ޚާން އާއި ނިމްރަތު ކޯރު އަދި ޝަހަދު ކެލްކަރު ހިމެނޭ ކަމަށް ރިޕޯޓުގައި ވެއެވެ. އަދި މިއީ ވީރު ޕަހާރިޔާ ބޮލީވުޑަށް ތައާރަފްވާ ފިލްމު ކަމަށްވެސް ރިޕޯޓުތައް ބުނެއެވެ.