ފިލްމީ ދާއިރާގައި ކާމިޔާބު ތަރިއަކަށް ވުމަށްޓަކައި އާއިލީ ވަގުތު ގުރުބާން ކުރަން ޖެހުނު ކަމަށް އިންޑިއާ ސިނަމާގައި ވިދަމުން އަންނަ ތަރި ރަޝްމިކާ މަންދަނާ ބުނެފިއެވެ.

ރަޝްމިކާ މިހެން ބުނެފައިވަނީ ދާދި ފަހުން ފެމިނާ އަށް ދިން އިންޓަވިއުއެއްގައި ފިލްމީ ދާއިރާގައި މަސައްކަތް ކުރާއިރު ވާން ޖެހުނު ގުރުބާނީތަކާ ބެހޭ ގޮތުން ވާހަކަ ދައްކަމުންނެވެ. އެގޮތުން އޭނާ ބުނެފައިވަނީ މި ދާއިރާގައި ކާމިޔާބީއަށް ވާސިލް ވުމަށްޓަކައި ވަރަށް ބޮޑަށް އާއިލީ ވަގުތު ގުރުބާން ކުރަން ޖެހުނު ކަމަށެވެ. އަދި މިއީ އޭނާވި އެންމެ ބޮޑު ގުރުބާނީ ކަމަށްވެސް ރަޝްމިކާ ވަނީ ބުނެފައެވެ.

"އާއިލާއާއެކު ހޭދަކުރާނެ ވަގުތެއް ނުލިބޭ މި ދާއިރާގައި އުޅެމުން. މިއީ އަހަރެންވީ އެންމެ ބޮޑު ގުރުބާނީ." ރަޝްމިކާ އިންޓަވިއުގައި ބުނެފައިވެއެވެ.

ރަޝްމިކާ އިތުރަށް ބުނެފައިވަނީ ދިރިއުޅުމުގައި ކާމިޔާބު މީހާކަށް ވެވޭނީ އެކި ކަންތައްތައް ގުރުބާން ކޮށްގެން ކަމަށް އޭނާގެ މަންމަ އަބަދުވެސް ބުނާ ކަމަށެވެ. އަދި އާއިލާއާއެކު ވަގުތު ހޭދަނުކުރެވޭތީ އެކަމާ ދެރަވާ ކަމަށްވެސް ރަޝްމިކާ ވަނީ ބުނެފައެވެ. އަދި އާއިލާއާ ދުރުގައި އުޅެން ޖެހުނު ނަމަވެސް ވަގުތު ވީވަރަކުން އެންމެންނަށްވެސް ގުޅާ ހާލު ބަލާ ކަމަށްވެސް މި އިންޓަވިއުގައި ރަޝްމިކާ ބުނެފައި ވެއެވެ.

ރަޝްމިކާ އެންމެ ފަހުން ފެނިފައިވަނީ މިދިޔަ އަހަރު ނެރުނު ތެލަގޫ ފިލްމު "ޕުޝްޕާ 2: ދަ ރޫލް" އިންނެވެ. އޭނާގެ ކުރިއަށް ހުރި ފިލްމު ތަކުގެ ތެރޭގައި ތެލަގޫ ފިލްމު "ދަ ގާލްފްރެންޑު" އާއި "ކުބެރާ" ގެ އިތުރުން ހިންދީ ފިލްމު "ޗާވާ" "ސިކަންދަރު" އަދި "ތާމާ" ހިމެނެއެވެ.