ކުޑަކުދިންނަށް ރަނގަޅު އަދަބުތައް ދަސްކޮށް ދިނުމަކީ މައިންބަފައިންގެ ޒިންމާއެކެވެ. ނަމަވެސް، ބައެއް ފަހަރު މައިންބަފައިން މިކަމުގައި މާ ބޮޑަށް ބާރުއަޅައި، ކުދިންނަށް މަޖުބޫރުކުރުވައެވެ. މިހެން މަޖުބޫރު ކުރުވާނަމަ އެކަމުގެ ސަބަބުން އެކުދިންގެ އަމިއްލަ ޝަހުސިއްޔަތު ބިނާ ކުރުމަށް ހުރަސް އެޅި، އެކުދިންނަށް ނޭދެވޭ އަސަރު ކުރުމަކީ އެކަށީގެންވާ ކަމެކެވެ.

މިފަހަރު މި ހިމަނާލަނީ ކުޑަކުދިންނަށް ރަނގަޅު އަދަބުތައް ދަސްކޮށްދިނުމުގައި މައިންބަފައިން ކަންތައް ކުރަންވީ މުހިންމު ގޮތްތަކެވެ.

ނަމޫނާ ދެއްކުން

ކުޑަކުދިންނަށް ރަނގަޅު އަދަބުތައް ދަސްކޮށްދިނުމުގައި އެންމެ މުހިންމު އެއް ކަމަކީ މައިންބަފައިން އަމިއްލައަށް ރަނގަޅު ނަމޫނާއެއް ދެއްކުމެވެ. އެކުދިން ގިނަ ފަހަރަށް ކަންކަން ދަސްކުރަނީ ބަލައިގެންނެވެ. އެހެންކަމުން، މައިންބަފައިންގެ ކިބައިގައި ރަނގަޅު އަދަބުތަކާއި އާދަތައް ހުންނަ ނަމަ، ކުދިންވެސް އެކަން ދަސްކުރާނެއެވެ.

ކެތްތެރިކަމާއެކު ކަންކުރުން

ކުޑަކުދިންނަށް ރަނގަޅު އަދަބުތަކާއި އާދަތައް ދަސްކުރުމަށް ވަގުތު ނަގާނެއެވެ. އެހެންކަމުން، މައިންބަފައިން ކެތްތެރިކަމާއެކު ކުދިންނަށް ވަގުތު ދޭންޖެހޭނެއެވެ. އަދި ކުއްޖާ ކުށެއް ކޮށްފިނަމަ، ރުޅިއައުމުގެ ބަދަލުގައި އޯގާތެރިކަމާއެކު ރަނގަޅު ގޮތް ކިޔައިދޭންވާނެއެވެ.

ހިތްވަރުދިނުން

ކުޑަކުދިން އެކުދިންނަށް ދަސްވެފައިވާ ރަނގަޅު އަދަބުތައް އަމަލީ ގޮތުން ދައްކާނަމަ އެކަމަށް ހިތްވަރުދޭންވާނެއެވެ. މިސާލަކަށް ކުއްޖާ "ޝުކުރިއްޔާ" އޭ ބުނެފިނަމަ، އެކަމަށް ތަޢުރީފުކޮށް އެކުއްޖާއަށް ހިތްވަރުދޭންވާނެއެވެ. މިކަމުން ކުއްޖާއަށް ރަނގަޅު އަދަބުތަކުގެ މުހިންމުކަން އިހުސާސްކުރެވޭނެއެވެ.

މަސްދަރު: އީޓައިމްސް