ގޭތެރެ ސާފުކުރުމަށް ދަރިން އެހީވަނީ، ފޮޓޯ: ސަންޝައިން ހައުސް
ގޭތެރެ ސާފުކުރުމަށް ދަރިން އެހީވަނީ، ފޮޓޯ: ސަންޝައިން ހައުސް
ދަރިންނަކީ އަހްލާގު ރަނގަޅު، އެހެން މީހުންނަށް އިހްތިރާމް ކުރާ ކުއްޖަކަށްވާން ކޮންމެ ބެލެނިވެރިއަކުވެސް ބޭނުންވާނެއެވެ. އެހެންނަމަވެސް ދަރިން މިގޮތަށް ތަރުބިއްޔަތު ކުރެވޭނީ ގޭތެރޭގައި އުޅޭއިރު އެކުދިންގެ ކިބައިގައި ވަކިކަހަލަ އާދަތަކެއް އަށަގަނެވުމުން ކަމަށް ގިނަ ބެލެނިވެރިންނަކަށް ނޭނގެއެވެ. ގޭތެރޭގައި ދަރިފުޅު ދަސްކުރާ ކޮންމެ އާދައަކީވެސް އެކުއްޖެއްގެ ދިރިއުޅުމުގައި ބޮޑު ރޯލެއް އަދާ ކުރާ ކަމެކެވެ. މިފަހަރު މި ހިމަނާލަނީ ގޭގައި އުޅޭއިރު ދަރިން ގެންގުޅެން ޖެހޭ ބައެއް އާދަތަކާއި އެކަންތައް މުހިންމުވާ ސަބަބުތަކެވެ.

ދިރިއުޅޭ މާހައުލު ރީތިކުރުން

ގޭތެރޭގެ މާހައުލު ސާފުތާހިރުކޮށް އޮތުމުން އޭގެ ފަސޭހަ އެންމެނަށްވެސް ވާނެއެވެ. ވީމާ އެންމެ ކުޑައިރުއްސުރެވެސް ދަރިންނަށް މި އާދަ ދަސްކޮށްދިނުމަކީ މުހިންމު ކަމެކެވެ. ދަރިފުޅުގެ ކިބައިގައި މި އާދަ ހުންނަ ނަމަ، އެކުއްޖާ ބޮޑުވަމުން އަންނައިރު އޭނާއަކީ ޒިންމާދާރު މީހަކަށް ވެގެން ދެއެވެ. އަދި އެކުއްޖަކަށް އެހެން މީހުންގެ އިހުސާސްތަކަށް ކަމޭހިތަން ވެސް ދަސްވެއެވެ.

ހެދޭ ގޯސްތައް ގަބޫލު ކުރުން

ކޮންމެ ކުއްޖަކަށްވެސް ކަމެއް ގޯސްކޮށް ކުރެވިދާނެއެވެ. އެއީ ކޮންމެ މީހެއްގެވެސް ތަބީއަތުގައި ވާކަމެކެވެ. އެހެންނަމަވެސް ހެދޭ ގޯސްތައް ގަބޫލު ކޮށް، އެކަންކަމަށް ޒިންމާ ނަގަން އެންމެ ކުޑައިރުއްސުރެވެސް ދަރިންނަށް ދަސްކޮށްދޭން ޖެހެއެވެ. މިކަމުގެ ސަބަބުން އެކުދިންނަށް ކަންކަން ރަނގަޅު ކުރަން ދަސްވެއެވެ. އަދި އިތުބާރާއި ނަޒާހަތްތެރިކަމުގެ މުހިންމުކަން ކުދިންނަށް ދަސްވެއެވެ.

އެހެން މީހުންގެ އެއްޗެހި ހުއްދަނެތި ނުނެގުން

ދަރިންނަށް ގޭތެރޭގައި އުޅޭ އެހެންމީހުންގެ އެއްޗެހި ހުއްދަނެތި ނުނެގުމަށް ދަސްކޮށްދިނުމަކީވެސް ވަރަށް މުހިންމު ކަމެކެވެ. ކިތައްމެ ބޭނުންވިޔަސް، ކޮންމެ އެއްޗެއްވެސް ނަގަން ވާނީ އޭގެ ވެރިފަރާތަކާ ވާހަކަ ދައްކައި ހުއްދަ ހޯދައިގެންނެވެ. މި އާދަ ދަރިންނަށް ދަސްކޮށްދިނުމުން ދަރިންނަށް އެހެން މީހުންނަށް އިހުތިރާމް ކުރަން ދަސްވެއެވެ. އަދި އެކުދިންނަށް އެހެން މީހުންގެ އިތުބާރުވެސް ލިބެއެެވެ.

ގޭތެރޭގައި ގެންގުޅޭ އާދަތަކުގެ ސަބަބުން ދަރިންނަށް ދިރިއުޅުމުގެ މުހިންމު ފިލާވަޅުތައް ދަސްވެގެން ދެއެވެ. މި ގަވާއިދުތަކުގެ ސަބަބުން އެކުދިން ޒިންމާދާރު، އެހެންމީހުންނަށް އިހްތިރާމުކުރާ، އަދި ރަނގަޅު އަހްލާގުގެ ވެރި ކުދިބަޔަކަށް ވެއެވެ. ވީމާ މިއީ އެކުދިންގެ މުސްތަގުބަލަށްޓަކައި މުހިންމު ކަންކަމެވެ.



ކިޔުންތެރިންގެ ހިޔާލު



ޓްރެންޑިން