ގިނަ ބަޔަކު އިންތިޒާރު ކުރަމުންދާ ފިލްމު "ސޮރީ" ގެ މެއިން ސްޕޮންސަރަކީ އެވޯންކަން ފިލްމުގެ ޕްރޮޑަކްޝަން ޓީމުން ހާމަ ކޮށްފިއެވެ.

އެވޯން އަކީ ރާއްޖޭގައި ހުރި ބްރޭންޑުތަކުގެ ތެރެއިން އެންމެ ނަން މަޝްހޫރު އަދި އެންމެ އިތުބާރު ހުރި އެއް ބްރޭންޑެވެ. ގިނަ ބައެއްގެ މެދުގައި މަގުބޫލުވެފައިވާ އެވޯން ބްރޭންޑުން، ކޮލިޓީ އަދި ޔުނީކު ފަރުނީޗަރުގެ ބާވަތްތައް ލިބެން ހުރެއެވެ.

އަހަރުގެ އެންމެ އިންތިޒާރު ކުރެވޭ ފިލްމު ކަމުގައިވާ "ސޮރީ" އަކީ ލޯބީގެ އަސަރުގަދަ ވާހަކައެއްގެ މައްޗަށް ބިނާކޮށް އުފައްދާ ފިލްމެކެވެ. މި ފިލްމަކީ ދިވެހި ފިލްމީ ދާއިރާގައި ނަންވިދާ ތަރިން ހިމަނައިގެން އުފައްދާ ފިލްމެކެވެ.

ފިލްމު ނެރޭ ދުވަސް ކައިރިވަމުން އަންނަ އިރު، މިހާރު ފިލްމުގެ ޕްރޮޑަކްޝަން ޓީމުން ދަނީ ފިލްމު އެޅުވުމަށްޓަކައި ކުރަން ޖެހޭ އެންމެ ފަހުގެ މަސައްކަތްތައް ކުރަމުންނެވެ.

ޑައިރެކްޓަރު ފާތިމަތު ނަހުލާ (ނަހޫ) ގެ ފިލްމުތަކަކީ ދިވެހިންގެ މެދުގައި އަބަދުވެސް ވަރަށް މަގުބޫލުކަން ލިބޭ ފިލްމުތަކެކެވެ. "ސޮރީ" އަކީ ނަހޫގެ ފިލްމުތަކުގެ ތެރެއިން މިހާތަނަށް އެންމެ ހިޓު ވާނެ ފިލްމު ކަމުގެ ޔަގީންކަން ނަހޫގެ އިތުރުން ފިލްމުގެ ތަރިންވެސް ދީފައިވާ ފިލްމެކެވެ.

ފިލްމުގެ ޓިކެޓު ވަރަށް ބާރު ސްޕީޑުގައި އޮލިމްޕަހުން ވިއްކަމުންދާއިރު، މިހާރު ވިއްކަމުންދަނީ ފިލްމުގެ 11 އަދި 12 ވަނަ ޝޯގެ ޓިކެޓެވެ.

ފިލްމު ބަލައިފި ކޮންމެ މީހެއްގެ ހިތުން ފިލްމުގެ އަސަރު ފިލައިގެންނުދާނެ ކަމުގެ ޔަގީންކަން އޮތް މި ފިލްމު، ނެރޭނީ ޖޫން 17 ގައެވެ.