މިޒަމާނުގައި ޓެކްނޮލޮޖީގެ ކުރިއެރުމާއެކު، ވީޑިއޯ ގޭމްތަކަކީ ކުޑަކުދިންގެ މެދުގައި ވަރަށް ބޮޑަށް އާންމުވެފައިވާ ކަމެކެވެ. ބައެއް ގޭމްތަކަކީ ކުދިންގެ ސިކުނޑީގެ ތަރައްޤީއަށް އެހީވެދޭ ކަންކަން ހިމެނޭ ތަކެތި ކަމަށް ވިޔަސް، ގިނަ ގޭމްތަކަކީ ކުޑަކުދިންގެ ދުޅަހެޔޮކަމަށާއި، ތަރުބިއްޔަތަށް ނޭދެވޭ އަސަރުތަކެއް ކުރާ ގޭމްތަކެކެވެ. އެހެންކަމުން، ކުޑަކުދިން ވީޑިއޯ ގޭމްތަކާ ދުރުކުރުމަކީ ނުވަތަ ކުޅޭ މިންވަރު ކޮންޓްރޯލް ކުރުމަކީ ވަރަށް މުހިންމު ކަމެކެވެ. ތިރީގައި މި ހިމަނާލަނީ ކުޑަކުދިން ވީޑިއޯ ގޭމްތަކާ ދުރުކުރަންޖެހޭ މުހިންމު ބައެއް ސަބަބުތަކެވެ.

ވީޑިއޯ ގޭމްތަކުގެ ސަބަބުން ކުޑަކުދިންގެ ޞިއްޙަތަށް ނޭދެވޭ އަސަރުތައް ކުރެއެވެ. ގިނައިރު ސްކްރީންތަކަށް ބަލާފައި ހުރުމުގެ ސަބަބުން ލޮލަށް ޕްރެޝަރު ބޮޑުވެ، ލޯ ހިކޭގޮތްވެ، ބައެއް ފަހަރު ލޮލުގެ ފެނުމަށްވެސް އަސަރުކުރެއެވެ. މީގެ އިތުރުން، ގޭމް ކުޅުމުގައި ގިނައިރު ހޭދަކުރުމުން އެއްތާކު އިނދެވޭތީ، ކުދިންނަށް ފަލަވުމުގެ މައްސަލަވެސް ކުރިމަތިވެއެވެ. މިކަމުގެ ސަބަބުން ހަށިގަނޑު ހަރަކާތްތެރި ނުވެ، ކަސްރަތު ނުކުރެވޭތީ، މުސްތަޤްބަލުގައި ތަފާތު ބަލިތަކަށް މަގުފަހިވެއެވެ. ހަމައެހެންމެ، ކުޅިވަރު ނުވަތަ އެހެނިހެން ހަރަކާތްތައް ކުރުމުގެ ބަދަލުގައި ގޭމް ކުޅުމުގައި ވަގުތު ހޭދަކުރުމަކީ ކުދިންގެ ހަށިގަނޑުގެ ބާރުދެރަވެ، އަދި ހިތްހަމަޖެހުން ލިބޭ އެހެން ކަންތައްތަކަށް ބީރައްޓެހިވާ ކަމެކެވެ.

ވީޑިއޯ ގޭމްތަކަކީ ފަސޭހައިން ދެވިހިފާ އެއްޗެކެވެ. ގޭމް ކުޅުމަށް ދެވިހިފުމުން، އެކުދިންގެ ނަފްސާނީ ދުޅަހެޔޮކަމަށް ނޭދެވޭ އަސަރުތަކެއް ކުރެއެވެ. މިސާލަކަށް، ގޭމް ކުޅެން ނުލިބުމުން ހާސްވެ ކަންބޮޑުވުން، ނުތަނަވަސްކަން، އަދި ބައެއް ފަހަރު ނުރުހުންވެ ހަޅުތާލުކުރުން ފަދަ ކަންކަން ފެންނަން ފަށައެވެ. ހަމައެހެންމެ، މާބޮޑަށް ގޭމް ކުޅެން އިންނަ ކުދިންނަށް ނިދި ނައުމުގެ މައްސަލަތަކާއި، ނިދި މެދުކެނޑި ނުވަތަ ނިދީގެ ގަޑިތަކަށް ބަދަލު އައުން ފަދަ ކަންކަން ދިމާވެއެވެ. ގިނަ ގޭމްތަކުގައި ހުންނަ އަނިޔާވެރި މަންޒަރުތަކުގެ ސަބަބުން ކުދިންގެ ހަރުކަށިކަމާއި، ރުޅިގަދަވުން އިތުރުވުމަކީވެސް އެކަށީގެންވާ ކަމެކެވެ.

މާ ގިނައިން ވީޑިއޯގޭމްތަކަށް ވަގުތު ހޭދަކުރާނަމަ ކުދިންގެ ކިޔެވުމާއި އުނގެނުމަށް ބުރޫއަރައެވެ. ގޭމް ކުޅުމަށް ދެވިހިފުމުން ކިޔަވަން ދޭ ސަމާލުކަން ކުޑަވެ، ފިލާވަޅުތަކަށް ވަގުތު ނުދެވުމުގެ ސަބަބުން ކިޔެވުމުގެ ނަތީޖާ ދަށްވެއެވެ. މީގެ އިތުރުން، ގޭމް ކުޅުމުގެ ސަބަބުން ސިކުނޑީގެ ފިކުރު ކޮންމެހެން ބޭނުންނުވާ ކަންކަމަށް އަންނާތީ، ކޮންސެންޓްރޭޝަން ދަށްވެ، ދިރާސާ ކުރާއިރު އުނދަގޫތަކާ ކުރިމަތިވެއެވެ. ކިޔެވުމުގެ އިތުރުން، ފޮތް ކިޔުން، ކުރެހުން، ނުވަތަ އެހެނިހެން ހުނަރުތައް ދަސްކުރުން ފަދަ ކުދިންގެ ދިރިއުޅުމަށް ފައިދާކުރާ ކަންކަމަށް ވަގުތު ނުދެވި ދުވަސްތައް ގޮސް، ކުދިންގެ މުސްތަޤްބަލަށް ނޭދެވޭ އަސަރުތަކެއް ކުރެއެވެ.