ބޭރުގައި ކިޔަވާ ދަރިވަރުންގެ ސްޓައިޕެންޑް ނުލިބި 8 ހަފުތާވިކަމަށް ހަޔާ އެޑިއުކޭޝަން މިނިސްޓަރު ޑރ. އަލީ ހައިދަރު އިއުތިރާފްވެވަޑައިގެންފިއެވެ.

ސަރުކާރުން ކުރިއަށްގެންދާ "ތަރުޖަމާނާ އެކު" ޕްރޮގްރާމްގައި ބޭރު ޤައުމުތަކުގައި ކިޔަވާ ދިވެހި ދަރިވަރުންނަށް ސްޓައިޕެންޑް ދޫކުރުމުގައި ދިމާވާ ދަތިތަކާ ގުޅިގެން މިނިސްޓަރު ހައިދަރު ވިދާޅުވީ، ފައިސާ ދޫކުރަންޖެހޭ މުއްދަތުގެ ދެ މަސް ކުރިން އެ މަސައްކަތް ފެއްޓެވި ނަމަވެސް، ތަފާތު އެކި ސަބަބުތަކާ ހުރެ އަށް ހަފުތާގެ ލަސްވުމެއް އައިސްފައިވާ ކަމަށެވެ.

މިހާރު ބޭނުންކުރަމުންދާ ސްޓައިޕެންޑް އުސޫލަކީ މީގެ ހަތް އަހަރު ކުރީގެ އުސޫލަކަށް ވެފައި، ދުނިޔޭގެ ބާޒާރުގައި ތަކެތީގެ އަގު އުފުލެމުންދާތީ، ދަރިވަރުންނަށް ދޭ އެލަވަންސް މުރާޖައާ ކުރުމުގެ މަސައްކަތް މި އަހަރު ތެރޭގައި ފަށްޓަވާނެ ކަމަށް ވެސް އެ މަނިކުފާނު ވިދާޅުވިއެވެ.

ނަމަވެސް، ފައިސާ ލިބުން ލަސްވުމުގެ ސަބަބުން ދަރިވަރުންނަށް ބޮޑެތި ގޮންޖެހުންތަކަކާ ކުރިމަތިވަމުންދާތީ، އެ ކަންބޮޑުވުންތައް ހިމެނޭ ރިޕޯޓެއް ވަނީ މިނިސްޓަރާ ހިއްސާކޮށްފައެވެ.

ދަރިވަރުންގެ އެންމެ ބޮޑު އެއް ޝަކުވާއަކީ މިނިސްޓްރީން އެކަށީގެންވާ ގޮތެއްގައި ޖަވާބުދާރީ ނުވުމާއި، ފޯނު ކޯލްތަކަށް ޖަވާބު ނުދޭ މައްސަލައެވެ. މިގޮތުން ލިބޭ ފައިސާ ގަވާއިދުން ނުލިބުމުގެ އިތުރުން، މުއާމަލާތް ކުރުމުގައި ހުރި ދަތިތަކަކީ ކިޔަވާ ކުދިންގެ މެދުގައި އޮތް ބޮޑު ކަންބޮޑުވުމެކެވެ.