އިންޑިއާގެ ޖުމްހޫރީ ދުވަހުގެ މުނާސަބަތުގައި، ކުރީގެ ރައީސް މުޙައްމަދު ނަޝީދު އެޤައުމުގެ ބޮޑުވަޒީރު ނަރެންދުރަ މޯދީއަށާއި އިންޑިއާގެ ރައްޔިތުންނަށް ތަހުނިޔާ ފޮނުއްވައިފިއެވެ.

މިއަދު ފާހަގަކުރަމުންދާ އިންޑިއާގެ ޖުމްހޫރީ ދުވަހާ ގުޅިގެން ރައީސް ނަޝީދު ކުރެއްވި މެސެޖެއްގައި، އެޤައުމުގެ ބޮޑުވަޒީރަށާއި ލޮބުވެތި ރައްޔިތުންނަށް އިޚްލާޞްތެރި ތަހުނިޔާ އަރިސްކުރައްވާފައިވެއެވެ.

ރައީސް ނަޝީދުގެ ތަހުނިޔާގެ މެސެޖުގައި، އިންޑިއާއިން ހޯދަމުންދާ ހަލުވި ކުރިއެރުމާއި، އެޤައުމުގެ އާދަޔާޚިލާފު ތަފާތު ސަގާފަތްތަކާއި އާދަކާދަތަކުގެ މުއްސަނދިކަމަކީ ފާހަގަކޮށްލަންޖެހޭ ކަންކަން ކަމަށް ވަނީ ވިދާޅުވެފައެވެ. އަދި ބައިނަލްއަޤްވާމީ މަސްރަޙުގައި އިންޑިއާއިން މިހާރު ދައްކަމުންދާ ނުފޫޒާއި ބާރަކީ، އިންޑިއާ ކަނޑުގެ ސަރަޙައްދުގެ ގިނަ ޤައުމުތަކަކަށް އޮތް ވަރަށް ފުރިހަމަ ނަމޫނާއެއްކަމަށްވެސް ރައީސް ނަޝީދު ވިދާޅުވިއެވެ.

ރައީސް ނަޝީދަކީ އިންޑިއާއަކީ ރާއްޖޭގެ ތަރައްޤީގެ މުހިންމު ބައިވެރިއެއް ކަމަށާއި، އެޤައުމުގެ ޑިމޮކްރެސީއާއި އިޤްތިޞާދީ ކުރިއެރުމަކީ މުޅި ދެކުނު އޭޝިއާ ސަރަޙައްދުގެ ހަމަޖެހުމާވެސް ގުޅިފައިވާ ކަމެއްކަން އަބަދުވެސް ފާހަގަ ކުރަށްވަމުން ގެންދަވާ ބޭފުޅެކެވެ.

އިންޑިއާގެ ޖުމްހޫރީ ދުވަހަކީ 26 ޖެނުއަރީއެވެ. މިދުވަސް ފާހަގަކުރަމުން ދަނީ 1950 ވަނަ އަހަރު އެކުލަވާލެވުނު އެޤައުމުގެ ގާނޫނު އަސާސީއާ ގުޅުވައިގެނެވެ. މިއަހަރު ފާހަގަކުރަމުންމިދަނީ އިންޑިޔާގެ 77 ވަނަ ޖުމްހޫރީ ދުވަހެވެ.