ބޮލީވުޑްގެ މަޝްހޫރު ޑައިރެކްޓަރު އަދި ޕްރޮޑިއުސަރު ކަރަން ޖޯހަރު، އިންޑިއާގެ ސިނަމާއަށް މިފަހުން ލިބެމުންދާ ބޮޑެތި ކާމިޔާބީތަކަށް ތައުރީފުކޮށް، ބޮލީވުޑްގެ ރަންޒަމާން އަނބުރާ އަތުވެއްޖެކަމަށް ބުނެފިއެވެ.

އެންޑީޓީވީން ރިޕޯޓްކޮށްފައިވާ ގޮތުގައި، ކަރަން މިހެން ބުނެފައިވަނީ މިދުވަސްވަރު ރިލީޒްކުރި ފިލްމުތަކަށް ބޮކްސް އޮފީހުގައި ލިބެމުންދާ ތަރުހީބާގުޅިގެންނެވެ. އެގޮތުން ކަރަންގެ އިންސްޓަގްރާމް ސްޓޯރީގައި ހިއްސާކުރި މެސެޖެއްގައި ބުނެފައިވަނީ، "ދުރަންދަރު" އަދި "ބޯޑާ 2" ފަދަ ފިލްމުތަކަށް ލިބެމުންދާ ބޮޑު ތަރުހީބަކީ ބޮލީވުޑްގެ ރަންޒަމާން އަނބުރާ އައިސްފިކަމުގެ ހެއްކެއް ކަމަށެވެ. އޭނާ ފާހަގަކުރި ގޮތުގައި، މިއީ ފިލްމީ ސިނާއަތަށް ލިބުނު ވަރަށް ބޮޑު ކުރިއެރުމެކެވެ.

އަނުރާގް ސިންގު ޑައިރެކްޓުކުރި ފިލްމު "ބޯޑާ 2" ސިނަމާތަކަށް ނެރެފައިވަނީ މިމަހު 23 ވަނަ ދުވަހުއެވެ. މި ފިލްމު ނެރުނުތާ 3 ދުވަސްވީއިރު، މި ފިލްމަށް 100 ކަރޯރާ ގާތްކުރާ އާމްދަނީއެއް ލިބިފައިވާ ކަމަށާއި، ބެލުންތެރިންގެ މެދުގައި މި ފިލްމަށް އޮތް ފޯރި އަދިވެސް ކުޑައެއް ނުވާ ކަމަށް ރިޕޯޓުތަކުގައި ވެއެވެ.

މީގެ އިތުރުން ރަންވީރު ސިންގާއި އަކްޝޭ ކަންނާ ލީޑުން ފެނިގެންދާ ފިލްމު ދުރަންދަރުއަށްވެސް ވަނީ ސިނަމާގައި ބޮޑު މަގުބޫލުކަމެއް ލިބިފައެވެ. އެގޮތުން ބަލާއިރު 50 ދުވަސްތެރޭ މި ފިލްމަށް ބޮކްސް އޮފީހުގައި 1292.2 ކަރޯރު ރުފީސްގެ އާމްދަނީއެއް ލިބިފައިވާ ކަމަށް މީޑިއާ ރިޕޯޓުތަކުންވަނީ ހާމަވެފައެވެ.