އިންޑިއާ އާއި ރާއްޖޭގެ ރައްޔިތުންގެ ލާބަޔާއި މަންފާއަށްޓަކައި ދެ ގައުމުން ގުޅިގެން ކުރަމުންދާ މަސައްކަތްތައް ހުއްޓުމެއްނެތި ކުރިއަށް ގެންދަވާނެ ކަމުގެ ޔަގީންކަން އިންޑިއާގެ ބޮޑުވަޒީރު ނަރެންދުރަ މޯދީ މިއަދު ދެއްވައިފިއެވެ.

ބޮޑުވަޒީރު މޯދީ މިހެން ވިދާޅުވީ، އިންޑިއާގެ ޖުމްހޫރީ ދުވަހުގެ މުނާސަބަތުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މީސްމީޑިއާ މެދުވެރިކޮށް އިއްޔެ ފޮނުއްވި ތަހުނިޔާގެ މެސެޖަށް ޖަވާބު ދެއްވަމުންނެވެ. ރައީސް މުޢިއްޒުގެ މެސެޖަށް ޝުކުރު އަދާކުރައްވަމުން މޯދީ ވިދާޅުވީ، އިންޑިއާގެ 77 ވަނަ ޖުމްހޫރީ ދުވަހުގެ މުނާސަބަތުގައި ރައީސް އަރިސްކުރެއްވި ހޫނު ތަހުނިޔާ އާއި ހެޔޮއެދުންތައް އިހުތިރާމާ އެކު ބަލައިގަންނަ ކަމަށެވެ.

"ދެ ގައުމުގެ ރައްޔިތުންގެ މަންފާއަށްޓަކައި އެކުގައި މިކުރާ މަސައްކަތް ކުރިއަށްގެންދާނަން. އެންމެހާ ދިވެހި ރައްޔިތުންނަށް ކުރިއަށް އޮތީ އުފާވެރި ފާގަތި ދުވަސްތަކެއް ކަމުގައި އެދެން." ބޮޑުވަޒީރު މޯދީގެ މެސެޖުގައި ވިދާޅުވިއެވެ.

އިންޑިއާގެ ޖުމްހޫރީ ދުވަހުގެ މުނާސަބަތުގައި ރައީސް ޑރ. މުޢިއްޒު ފޮނުއްވި ތަހުނިޔާގެ މެސެޖުގައި ބޮޑުވަޒީރު މޯދީގެ ބެއްލެވުމުގެ ދަށުން، ސަރަޙައްދީ ފެންވަރުގައި އިންޑިއާއިން ދައްކާ އިސްނެގުން ފާހަގަކުރައްވައި، ކުރިއަށް އޮތް ދުވަސްތަކުގައިވެސް، ދެ ޤައުމުން މަސްލަޙަތު ހިމެނޭ ކަންކަމުގައި ދެ ޤައުމުގެ ގުޅުން ހަރުދަނާކޮށް، ޢަމަލީގޮތުން އެއްބާރުލުން ދިނުން އިތުރުކުރުމުގެ ޢަޒުމުގައި ސަރުކާރުން މަސައްކަތް ކުރަށްވާނެ ކަމަށް ވިދާޅުވެފައިވެއެވެ.

ރައީސް ޑރ. މުޢިއްޒުގެ ސަރުކާރުގެ ކުރީކޮޅު އިންޑިއާއާއި ރާއްޖެއާ ދެމެދު އޮތް ގުޅުމަށް ބައެއް ގޮންޖެހުންތައް ކުރިމަތިވި ނަމަވެސް، ފަހަކަށް އައިސް ދެ ގައުމުގެ ސިޔާސީ އަދި ވިޔަފާރީގެ ގުޅުން އަންނަނީ ވަރަށް ބޮޑަށް ބަދަހިވަމުންނެވެ.

ކޮންމެ އަހަރެއްގެ ޖަނަވަރީ މަހުގެ 26 ވަނަ ދުވަސް، އިންޑިއާގެ ޖުމްހޫރީ ދުވަހުގެ ގޮތުގައި ފާހަގަކުރަނީ، 1950 ވަނަ އަހަރު، އެ ޤައުމުގެ ޤާނޫނު އަސާސީ ތަންފީޒުކޮށް، ޖުމްހޫރިއްޔަތަކަށް ބަދަލުވުމުގެ މުނާސަބަތާ ގުޅުވައިގެންނެވެ.