ދުނިޔެ ނިމި، އާޚިރަތުގެ ބޮޑު މައިދާނަށް ހުރިހާ އިންސާނުން ޖަމާކުރެވޭނެ ވަގުތަކީ ކޮބައިކަން ދެނެވޮޑިގެންވަނީ ހަމައެކަނި މާތްﷲ އެވެ. ނަމަވެސް، ކީރިތި ރަސޫލާ ﷺ ގެ ސައްޙަ ޙަދީޘްފުޅުތަކުން އެނގޭ ގޮތުގައި، މި ބޮޑުވެގެންވާ ވަގުތު އައިސް ބައްދަލުކުރާނީ ހުކުރު ދުވަހެއްގައެވެ. މުސްލިމުންގެ ގާތުގައި ހުކުރު ދުވަހަކީ މާތް އަދި ޚާއްޞަ ދުވަހެކެވެ.

ރަސޫލާ ﷺ ޙަދީޘްކުރައްވާފައިވާ ގޮތުގައި، އިރު އެރި އެންމެ ހެޔޮ ދުވަހަކީ ހުކުރު ދުވަހެވެ. އެ ދުވަހަކީ އާދަމްގެފާނު އުފެއްދެވި، ސުވަރުގެއަށް ވެއްދެވި އަދި ސުވަރުގެއިން ބޭރުކުރެއްވި ދުވަސްވެސް މެއެވެ. އަދި ޤިޔާމަތް ދުވަސް ޤާއިމުވާނީވެސް ހަމައެކަނި ހުކުރު ދުވަހެއްގައެވެ.

މަރުވުމަކީ އެއްވެސް އިންސާނަކަށް ސަލާމަތްނުވެވޭނެ ހަޤީޤަތަކަށް ވާއިރު، ކޮންމެ މީހަކުވެސް މަރުވާ ވަގުތުން ފެށިގެން އެމީހެއްގެ "ޤިޔާމަތް" ފެށުނީއެވެ. ދުނިޔެ ނިމިގެންދާނެ ސީދާ ތާރީޚެއް އެއްވެސް މަޚްލޫޤަކަށް ނޭނގުނު ކަމުގައި ވިޔަސް، އެ ދުވަސް ގާތްވަމުންދާކަމުގެ ބައެއް ނިޝާންތައް ރަސޫލާ ﷺ ވަނީ އުންމަތަށް ބަޔާންކޮށްދެއްވާފައެވެ. އޭގެ ތެރޭގައި ޢިލްމު އުފުއްލެވުމާއި، ބިންހެލުންތައް ގިނަވުމާއި، ފިތުނަފަސާދަ އާއި މީހުން މެރުން އިތުރުވުން ހިމެނެއެވެ. މިއަދު އަޅުގަނޑުމެންގެ ވަށައިގެން ފެންނަމުންދާ ކަންކަމަށް ބަލާއިރު، މި ނިޝާންތައް ދަނީ ފާޅުވަމުންނެވެ.

ޤިޔާމަތް ގާތްވުމުގެ އެންމެ ފާހަގަކޮށްލެވޭ އެއް ނިޝާނަކީ ވަގުތުގެ ބަރަކާތް ކެނޑި، ވަގުތު ހަނިވުމެވެ. ރަސޫލާ ﷺ ޙަދީޘްކުރެއްވި ގޮތުގައި، ދުނިޔެ ނިމުމާ ގާތްވުމުން އަހަރެއް މަހެއް ފަދައިން، މަހެއް ހަފުތާއެއް ފަދައިން، އަދި ހަފުތާއެއް ދުވަހެއް ފަދައިން ހީވާނެއެވެ. މިއަދު އަޅުގަނޑުމެންނަށް އިޙްސާސްވަނީ ހަމަ މިފަދައިންނެވެ. މިއީ އަޅުގަނޑުމެން ދަތުރުކުރަމުންދާ އަސްލު މަންޒިލަށް ވާޞިލުވާން އޮތް ވަގުތު ކުޑަތަންވަނީ ކަމުގެ ހެއްކެކެވެ.

އަޅުގަނޑުމެންނަކީ މި ދުނިޔޭގައި ދަތުރުވެރިންތަކެކެވެ. މި ދަތުރަކީ އެނބުރި އައުމެއް ނެތް، އެއްކޮޅަށް ކުރެވޭ ދަތުރެކެވެ. އެންމެ ފަހުގެ "ބޯޑިން" ގަޑި ޖެހޭނީ ކޮން ވަގުތަކު ކަމެއް އެކަކަށްވެސް ނޭނގެއެވެ. އެހެންކަމުން، ކޮންމެ ހުކުރު ދުވަހަކީވެސް އެންމެ ފަހު ދުވަހަށް ތައްޔާރުވުމަށް ލިބޭ ފުރުޞަތެއް ކަމުގައި ދެކި، ހެޔޮ އަމަލުތައް ގިނަކުރުމަކީ ކޮންމެ މުސްލިމެއްގެ މައްޗަށް އޮތް ޒިންމާއެކެވެ.