ބޮލީވުޑްގެ ފިލްމުތަކަށް ލޯބިކުރާ ފަރާތްތަކުގެ މެދުގައި މިދިޔަ އަހަރު އެންމެ މަގުބޫލްވި އެއް ފިލްމް، 'ދުރަންދަރު' ނެޓްފްލިކްސް ގައި ޖެނުއަރީ 30ގައި ދައްކަން ފަށައިފިއެވެ.

ނަމަވެސް އޯޓީޓީ ވާޝަން، ސްކްރީން ކުރި ވާޝަނަށް ވުރެ 10 މިނެޓް ކުރުކަން ބެލުންތެރިންނަށް ފާހަގަ ކުރެވުމުން ބެލުންތެރިން ވަނީ އެކަމާމެދު ވަރަށްބޮޑަށް ހިތްހަމަ ނުޖެހުން ފާޅުކޮށްފައެވެ.

އެގޮތުން ތިއޭޓަރުގައި ދެއްކި ފިލްމުގެ ދިގުމިނުގައި 3 ގަޑި 34 މިނެޓް ހުރި ނަމަވެސް ނެޓްފްލިކްސް އަށް ދޫކޮށްލި ފިލްމުގެ ދިގުމިނަކީ 3 ގަޑި 25 މިނެޓެވެ. އެހެންކަމުން ފިލްމުން 10 މިނެޓް ކުރުވުމުން ބެލުންތެރިން ވަނީ، އެއީ މާޔޫސްކަން ގެނުވި ކަމެއް ކަމަށް ބުނެފައެވެ.

އަދި ނެޓްފްލިކްސް ގައި 'އޭ' ރޭޓިން ދީފައި އޮތް ނަމަވެސް ބައެއް ސިޔާސީ ރެފަރެންސްތަކާއި، ފާޙިޝް ވާހަކަތައް ހިމެނޭ ޑައިލޮގްތަކާއި، މަންޒަރުތަކާއި، ޚާއްޞަކޮށް ބަލޫޗް ކޮމިއުނިޓީއަށް ކުރާ އިޝާރާތްތަކާއި، ކެރެކްޓަރުންގެ ވަކި ސިޔާސީ ރިފަރެންސްތައް ފިލްމުން ވަނީ އުނިކޮށްފައެވެ. ބެލުންތެރިންގެ އެންމެބޮޑު ހިތްހަމަނުޖެހުމަކީ 'އޭ' ރޭޓިން ލިބިފައިވާ ފިލްމެއް މެޗުއަރ އޯޑިއަންސަށް ދޫކޮށްލިއިރު އެޑިޓްކޮށްފައި އޮތުމެވެ.

އިންޑިއާ އާއި ދުނިޔޭގެ އެކި ކަންކޮޅުތަކުގައި ތިބި ބޮލީވުޑްގެ ފިލްމުތަކަށް ތަރުހީބުދޭ ފަރާތްތަކުން ތިބީ ދުރަންދަރަށް ބޮކްސް އޮފީހުގައި ލިބުނު އާދަޔާ ހިލާފު ކާމިޔާބީއަށް ފަހު މި ޖާސޫސީ ސާގާގެ ދެވަނަ ބައި ބެލުމަށް ކެތްމަދުވެފައެވެ.

އެގޮތުން މިފިލްމުގެ ދެވަނަ ބައި ކަމަށްވާ ދުރަންދަރު 2 "ދަ ރިވެންޖް" ގައި މިފިލްމުގެ ފުރަތަމަ ބަޔަށްވުރެ އަޚްލާޤީ ގޮތުންނާއި، ހުށައެޅުންތެރިންގެ ކެރެކްޓަރ ދައްކައިދިނުމުގައި މާ ފުރިހަމަވާނެ ކަމަށް ބެލުންތެރިން އުންމީދު ކުރެއެވެ. ދުރަންދަރު ޕާޓް 2 : "ދަ ރިވެންޖް" ރަސްމީކޮށް ރިލީޒްކުރާ ތާރީހަކީ 19 މާޗް، 2026 އެވެ.