މުމްބާއީގެ މަގުމަތީގައި ދަތުރުކުރަމުންދިޔަ އޮޓޯގައި ހުރި ޑްރައިވަރުގެ ޖޫރިމަނާތަކެއް ދައްކަން މަޝްހޫރު ލަވަކިޔުންތެރިޔާ އެހީވި ވީޑިއޯއެއް މީސް މީޑިއާގައި ވަރަށް ބޮޑަށް ވައިރަލް ވެއްޖެއެވެ.

މި ހާދިސާ ހިނގާފައިވަނީ އިންޑިއާގެ މުމްބާއީގައެވެ. ކަރަން އައުޖްލާ އޭނާގެ އެކުވެރިންނާއެކު އޮޓޯއެއްގައި ދަތުރުކުރަމުން ދަނިކޮށް، އެ އޮޓޯގެ ޑްރައިވަރަށް ޓްރެފިކް ގަވާއިދުތަކާ ހިލާފުވެގެން ދައްކަންޖެހޭ ގިނަ އަދަދެއްގެ ޖޫރިމަނާ ހުރިކަން އެނގުނެވެ. އެގޮތުން ޑްރައިވަރުގެ ފޯނުން އޭނާ ދައްކަންޖެހޭ ޖޫރިމަނާގެ ތަފްސީލުތައް ކަރަންއަށް ދެއްކުމުން، ކަރަން ވަނީ އޭނާގެ އަމިއްލަ ފޯނު ބޭނުންކޮށްގެން އޮންލައިންކޮށް އެ ހުރިހާ ޖޫރިމަނާއެއް ދައްކައިދީފައެވެ.

ކަރަން ދެއްކި ޖޫރިމަނާގެ ޖުމްލަ އަދަދަކީ ގާތްގަނޑަކަށް 17,000 އިންޑިއަން ރުޕީސްއެވެ.

މީގެ އިތުރުން، މި ހާދިސާ ހިނގި ސަރަހައްދުގައި ހުރި އެހެން އޮޓޯ ޑްރައިވަރަކުވެސް އޭނާގެ ޖޫރިމަނާ ދެއްކުމަށް ކަރަންގެ ކިބައިން އެހީތެރިކަމަށް އެދުނެވެ. އެ ޑްރައިވަރު ބުނިގޮތުގައި ކުޑަ މިންވަރެއްގެ އެހީއަކުންވެސް އޭނާއަށް ބޮޑު ތަސައްލީއެއް ލިބޭނެއެވެ. އެހެންކަމުން، ކަރަން ވަނީ ދެވަނަ ޑްރައިވަރުގެ ޖޫރިމަނާ ދެއްކުމަށްޓަކައި 5,000 ރުޕީސް ހަދިޔާކޮށްފައެވެ.

މި ހިތްހެޔޮ އަމަލު ހިންގަމުން ދިޔަ ވަގުތު، ކަރަންގެ ވަށައިގެން ގިނަ ބަޔަކު އެއްވެ، އޭނާއާއެކު ފޮޓޯ ނަގައި، އޭނާގެ ދީލަތިކަމަށްޓަކައި ޝުކުރު އަދާކޮށްފައިވެއެވެ. މި ވީޑިއޯ މީސްމީޑިއާއަށް ދޫކޮށްލުމާއެކު، ގިނަ ބަޔަކު ދަނީ ކަރަން އައުޖްލާއަށް ތައުރީފު ކުރަމުންނެވެ. މީސްމީޑިއާ ބޭނުންކުރާ ފަރާތްތަކުން ބުނަމުންދަނީ ކަރަންއަކީ ހަމައެކަނި މޮޅު ފަންނާނެއް ނޫން ކަމަށާއި، އޭނާއަކީ އާންމު ރައްޔިތުންގެ އިހުސާސްތައް ދަންނަ ހިތްހެޔޮ އިންސާނެއްކަން މި އަމަލުން ސާބިތުވެއްޖެ ކަމަށެވެ.

ކަރަން އައުޖްލާއަކީ "ތައުބާ ތައުބާ" ފަދަ މަގުބޫލު ލަވަތަކުން އިންޑިއާގައާއި ބައިނަލްއަގުވާމީ ފެންވަރުގައި ބޮޑު މަގުބޫލުކަމެއް ހޯދާފައިވާ ފަންނާނެކެވެ. އޭނާ މިވަގުތު މުމްބާއީގައި ހުރީ އޭނާގެ "އިޓްސް ހެޕެނިން" ވޯލްޑް ޓުއާގެ ތެރެއިން އިންޑިއާގައި ބާއްވާ ކޮންސެޓްތަކުގެ މަސައްކަތުގައެވެ.