ބޮލީވުޑްގެ ތަޖުރިބާކާރު އެކްޝަން ތަރި ސަނީ ޑިއޯލްގެ އެންމެ ފަހުގެ ފިލްމު "ބޯޑަރ 2" އަށް ލިބުނު ބޮޑު ކާމިޔާބީއަށްފަހު، އޭނާގެ ދެން އޮތް ބޮޑު މަޝްރޫޢު "އެންތޮނީ" ގެ މަސައްކަތް ރަސްމީކޮށް ފަށައިފިއެވެ.

ހައި-އޮކްޓޭން އެކްޝަން ތުރިލަރ އެއްގެ ގޮތުގައި އުފައްދާ މި ފިލްމުގެ ޝޫޓިން މިހާރު ވަނީ އިންޑިއާގެ މުމްބާއީގައި ފަށާފައެވެ. މި ފިލްމުގައި ސަނީ ޑިއޯލް ފެނިގެންދާނީ އޭނާގެ ސިގްނޭޗަރ އެކްޝަން ރޯލަކުންނެވެ.

"އެންތޮނީ" ގެ މުހިންމު ރޯލުތަކުން ތަމަޅަ ފިލްމީ ތަރި ޖޯތިކާ އަދި ވިލަންގެ ރޯލުން ފެނިގެންދާ ހުނަރުވެރި އެކްޓަރު ވިޖޭ ވަރްމާ ފެނިގެންދާނެއެވެ. މިއީ ވިޖޭ ވަރްމާ ސަނީ ޑިއޯލްއާއެކު ފެނިގެންދާ ފުރަތަމަ ފިލްމަށް ވާއިރު، މި ދެ ތަރިންގެ ކުރިމަތިލުންތައް ބަލާލުމަށް ފޭނުން ތިބީ ވަރަށް ބޮޑު އިންތިޒާރެއްގައެވެ.

ފެބްރުއަރީ 27 ވަނަ ދުވަހު ޝޫޓިން ފެށި މި ފިލްމުގެ މަސައްކަތް ޖުލައި 2026 އަށް ނިންމާލެވޭނެ ކަމަށް ލަފާކުރެވެއެވެ. އަދި ފިލްމު ސިނަމާތަކަށް ގެނައުމަށް އަމާޒު ހިފާފައިވަނީ 2027 ވަނަ އަހަރުގެ ކުރީކޮޅުގައެވެ.

މި ފިލްމަކީ ފަރްހާން އަޚްތަރު އަދި ރިތޭޝް ސިދްވާނީގެ "އެކްސެލް އެންޓަޓައިންމަންޓް" އާއި މަޝްހޫރު ޑައިރެކްޓަރު އޭ.އާރް މުރުގަދޯސް ގުޅިގެން އުފައްދާ ފިލްމެކެވެ. ފިލްމު ޑައިރެކްޓް ކުރަނީ އަލަށް ޑައިރެކްޝަނަށް ނުކުންނަ ބާލާޖީ ގަނޭޝްއެވެ. އޭނާއަކީ ވަނީ މީގެކުރިން މުރުގަދޯސްގެ ގިނަ ފިލްމުތަކެއްގައި އެސިސްޓެންޓް ޑައިރެކްޓަރެއްގެ ގޮތުގައި މަސައްކަތްކޮށްފައެވެ.

ސަނީ ޑިއޯލް އެންތޮނީގެ މަސައްކަތް ފަށާފައިމިވަނީ އޭނާގެ ފިލްމު "ބޯޑަރ 2" އަށް ބޮޑު ތަރުހީބެއް ލިބެމުންދާ ދަނޑިވަޅެއްގައެވެ. 1971 ވަނަ އަހަރުގެ އިންޑިއާ-ޕާކިސްތާން ހަނގުރާމައަށް ބިނާކޮށް އުފެއްދި އެ ފިލްމަށް މިހާތަނަށް އިންޑިއާއިން އެކަނިވެސް 327 ކްރޯޑް ރުޕީސް ލިބިފައިވާއިރު، ދުނިޔޭގެ ބާޒާރުގައި 450 ކްރޯޑް ރުޕީސްއާ ގާތްކުރާ އަދަދަކަށް އާމްދަނީ ލިބިފައިވެއެވެ.