ބޮލީވުޑްގެ މަޝްހޫރު ފިލްމު "ބާގަމްބާގް" ގެ ދެވަނަ ބައިގެ މަސައްކަތް ފެށުމަށް ތައްޔާރުވަމުން ދަނިކޮށް، ގާނޫނީ މައްސަލައެއް ކުރިމަތިވެ އެ ފިލްމުގެ ޝޫޓިން މެދުކަނޑާލައިފިއެވެ.

ބޮލީވުޑް ހަންގާމާއިން ރިޕޯޓްކޮށްފައިވާ ގޮތުގައި، މި މައްސަލަ އުފެދިފައިވަނީ މަޝްހޫރު ޕްރޮޑިއުސަރު އެކްތާ ކަޕޫރާއި ޑައިރެކްޓަރު ރާޖް ޝާންދިލްޔާއާ ދެމެދުގައެވެ. މި މައްސަލައާ ގުޅިގެން އަންނަ މާރޗް މަހުގެ 2 ވަނަ ދުވަހު އިންޑިއާގެ ލަކްނައުއާއި އެހެނިހެން ސަރަހައްދުތަކުގައި ފެށުމަށް ހަމަޖެހިފައި އޮތް ޝޫޓިންގެ ތާވަލު މިހާރު ވަނީ އުވާލާފައެވެ.

މި މައްސަލަ ކުރިމަތިވީ ރާޖް ޝާންދިލްޔާ އެކްތާ ކަޕޫރާއެކު ތިން ފިލްމެއް އުފެއްދުމަށް އެއްބަސްވުމެއްގައި ސޮއިކޮށްފައި ވަނިކޮށް، އެކްތާގެ ހުއްދައެއް ނެތި އަދި އެއްބަސްވުމާ ޚިލާފަށް އެހެން ބެނަރތަކަކަށް ދެ ފިލްމެއްގެ މަސައްކަތް ކޮށްދިނުމުންނެވެ. އެކްތާގެ ފަރާތުން ރާޖްގެ އިތުރުން ފިލްމުގެ ޕްރޮޑިއުސަރުން ކަމަށްވާ އަޝްވިން ވަރުދޭއާއި ކޭޕް އޮފް ގުޑް ފިލްމްސްއަށް ވެސް ވަނީ ގާނޫނީ ނޯޓިސް ފޮނުވާފައެވެ.

މި ފިލްމުގެ މުހިންމު ރޯލުތަކުން ފެންނާނެ ކަމަށް ބެލެވުނު އަކްޝޭ ކުމާރު، މަނޯޖް ބަޖްޕާއީ އަދި ޕަރޭޝް ރާވަލްގެ ތާރީޚުތައް ވެސް މިހާރު ވަނީ ދޫކޮށްލާފައެވެ. މާރޗް މަހު 25 ދުވަހުގެ މުއްދަތަށް ހަމަޖައްސާފައި އޮތް މި ޝޫޓިން މެދުކަނޑާލަން ޖެހުމުން، ފިލްމުގެ މުސްތަގުބަލާ މެދު ވަނީ ސުވާލު އުފެދިފައެވެ. ސަބަބަކީ މި އެކްޓަރުންނަކީ ޖޫން މަހުން ފެށިގެން އެހެން ފިލްމުތަކަކަށް ވަގުތު ދީފައިވާ ބަޔަކަށް ވާތީއެވެ.

މި މައްސަލަ ހައްލުކުރުމަށް ފިލްމާ ގުޅުންހުރި ފަރާތްތަކުން މަސައްކަތް ކުރަމުންދާއިރު، ކުރިއަށް އޮތް ތަނުގައި މިފިލްމުގެ މަސައްކަތް އަލުންފަށާއިރު އާ ޑައިރެކްޓަރަކު ފެނުމަކީ އެކަށީގެންވާ ކަމަކެވެ.