މެދުއިރުމަތީގެ ހަމަނުޖެހުންތަކާ ގުޅިގެން ދުނިޔޭގެ ބާޒާރުގައި ތެލުގެ އަގު އުފުލުމާއެކު، ރާއްޖޭގައި ވެސް ކުއްލި ގޮތަކަށް ތެލުގެ އަގު ބޮޑުކުރުމާ ގުޅިގެން ކުރީގެ ކޮމިއުނިކޭޝަން މިނިސްޓަރ އަދި ޕީޕަލްސް ނޭޝަނަލް ފްރަންޓް (ޕީއެންއެފް) ގެ ސެކްރެޓަރީ ޖެނެރަލް މުޙައްމަދު މަލީހް ޖަމާލް ސަރުކާރަށް ވަރަށް ބޮޑަށް ފާޑުވިދާޅުވެއްޖެއެވެ.

ބާޒާރުގައި ތެލުގެ އަގު ބޮޑުވެފައި މިވަނީ، ތެލުގެ އަގާ މެދު ކަންބޮޑުވާން ނުޖެހޭ ކަމަށާއި އަގު ބޮޑުވާނެ ކަމުގެ އެއްވެސް އިޝާރާތެއް ނެތް ކަމަށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވިދާޅުވިތާ އެންމެ ދެ ދުވަސް ފަހުންނެވެ.

ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ) އިން އިއްޔެ ގެނައި ބަދަލާއެކު، ޕެޓްރޯލް ލީޓަރަކުން 18.6 އިންސައްތަ އަދި ޑީސަލް ލީޓަރަކުން 26 އިންސައްތަ ވަނީ ބޮޑުކޮށްފައެވެ. މި ބަދަލާއެކު ޕެޓްރޯލް ލީޓަރެއްގެ އަގު 16.01 ރުފިޔާއަށް އުފުލިފައިވާއިރު، ޑީސަލް ލީޓަރެއްގެ އަގު ވަނީ 17.54 ރުފިޔާއަށް އަރާފައެވެ. ސަރުކާރު ކުންފުނީގެ އިތުރުން، އަމިއްލަ ކުންފުންޏެއް ކަމަށްވާ ހޯކްސް އިން ވެސް ވަނީ މި ރޭޓުން ތެލުގެ އަގު ބޮޑުކޮށްފައެވެ.

މިކަމާ ގުޅިގެން ސޯޝަލް މީޑިއާގައި ހިއްސާކުރެއްވި ޕޯސްޓެއްގައި މަލީހް ވިދާޅުވީ، ދައުލަތުގެ މުޅި އާމްދަނީ ރިކަރަންޓް ހަރަދުތަކަށް އިސްރާފު ނުކޮށް، ވަރުގަދަ ރިޒާވެއް ބިލްޑް ކުރުމުގެ މުހިންމުކަން މިފަދަ ދަނޑިވަޅުތަކުގައި ފެނިގެންދާ ކަމަށެވެ.

މަލީހް އިތުރަށް ވިދާޅުވީ، ރިޒާވެއް ބިލްޑް ކުރުމުގެ ބޭނުމަކީ ދުނިޔޭގެ ބާޒާރަށް އަންނަ މިފަދަ ކުއްލި ލޮޅުންތަކުގެ ބުރަ އާންމު ރައްޔިތުންގެ ބޯމައްޗަށް ޖެހުމުގެ ބަދަލުގައި، އެ "ޝޮކް" ދައުލަތުން އެބްޒޯބް ކުރުން ކަމަށެވެ.

އަދި ތެލުގެ އަަގު އުފުލެން ޖެހެނީ ތެލުގެ ރިޒާވެއް ބިލްޑު ކޮށްފައި ނުވާތީ އަތުގައި އެއްވެސް އެއްްޗެއް ނެތުމުން ކަމަށް ވިދާޅުވެ މަލީހް ވަނީ ސަރުކާރުގެ އިގްތިސާދީ ސިޔާސަތަށް ވަރަށް ބޮޑަށް ފާޑުވުދާޅުވެފައެވެ.